ဘုတ်ပြၚ်း၊ မေ ၉

ကရောၚ်ပၞာန် ကၠုၚ်ကဵုအရီုဗၚ်ပၞာန် ကုကုန်ဗ္ဒိုပ်ကံၚ်ဇြဳပၞာန် ၁၀၂၀ နွံဒၟံၚ်ပယျဵုပွိုၚ်ဍုၚ်(ဘုတ်ပြၚ်း)ကဵု ပွိုၚ်ဍုၚ်တၞၚ်သဳ ရးတၞၚ်သဳဂှ် ဒးဒုၚ်ကြတ်ဗ္တိုက်လဝ်တုဲ ဗီုပြၚ်ဒက်ပ္တန်ကရောၚ်ပၞာန်လီုတုဲ ဒးဆုတ်ကလေၚ်လဝ်ဒပ်ရောၚ် ဂွံတီကေတ် ဇရေၚ်ကရောၚ်ပၞာန်ပံၚ်ကောံ BLACK COBRA COLUMN ရ။

ကုန်ဗ္ဒိုပ်ကံၚ်ဇြဳပၞာန် ၁၀၂၀ ဖျေံလဝ်ဒပ် နကဵုဇြဟတ်ဒပ် ၜိုတ် ၃၀ ဂှ် စနူဂိတုဨပရဴ ၃၀ တုဲကၠုၚ်တေံတုဲ ဒပ်ပံၚ်ကောံ ဂကောံဇြဟတ်ပၠန်ဂတးတံ လုပ်စိုပ်ဗ္တိုက်လဝ်တုဲ ပေါဲဗ္တိုက်ၜါလ္ပာ် သ္ကာတ်မြဟ်လဝ်ရ။

ကံၚ်ဇြဳပၞာန် ကၠုၚ်ကဵုအရီုဗၚ်ပၞာန် သွက်ပေါဲဗ္တိုက်ဂှ်ကဵု ကရောၚ်ပၞာန်ပျူသဝ်ထဳဂှ် ဒပ်ပံၚ်ကောံ ဂကောံဇြဟတ်ပၠန်ဂတးတံ ကြတ်ဗ္တိုက်လဝ် ကြပ်အရိုဟ်တ္ၚဲဂှ်ရ ဒပ်ထ္ကးပြးအာတုဲ ဆုတ်ကလေၚ်အာလဝ်ရောၚ် ညးဒုၚ်တာလျိုၚ်လလောၚ်ပရိုၚ် ကရောၚ်ပၞာန် BLACK COBRA COLUMN ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

အပ္ဍဲပေါဲဗ္တိုက် က္တဵုဒှ်လဝ် နူဂိတုဨပရဴ ၃၀ စဵုကဵုဂိတုမေ ၆ ဂှ် သီုကဵုဇွကောန်ဒပ်ကံၚ်ဇြဳပၞာန်တံ မပါလုပ် သီဂွံလဝ် လွဟ်လက်နက်မကမ်၊ ကပေါတ်အရပ်စပ်ပၞာန်ဂမၠိုၚ် ကေုာံ သီုကဵုကပေါတ်ဆက်စပ်ဂမၠိုၚ်ရောၚ် သ္ဂးရ။

အတိုၚ်တၚ်လလောၚ်တြး ကရောၚ်ပၞာန် BLACK COBRA COLUMN လလောၚ်ပ္တိတ်လဝ်ဂှ်မ္ဂး အပ္ဍဲပေါဲဗ္တိုက်ဂှ် သၞာဲဒဴကံၚ်ဇြဳပၞာန်တံ မပါလုပ် ဗွဲမဂၠိုၚ်ဂၠေၚ် ကၠေံဗ္ဒန်အာလဝ်တုဲ မၞိဟ်ကလိဂွံဝပ် ၁၀ တၠပြၚ်ဂှ်လေဝ် ပလံၚ်ဏာ ဍုၚ်ဘုတ်ပြၚ်း နကဵုဂၠုၚ်ဖ္ဍိုက်ညးအာတရဴဂှ် ဂွံတီကေတ်ရ။

မွဲလ္ပာ်ဂှ်ပၠန်လေဝ် ဂြောဝ်ဂတာ ပျူသဝ်ထဳ သၟဝ်တဲကံၚ်ဇြဳပၞာန်တံဂှ်လေဝ် သ္ဂောံပံၚ်တောဲကဵု ကရောၚ်ပၞာန် BLACK COBRA COLUMN ဂှ် ကေတ်ကၠုၚ်အဆက်တံ နွံဒၟံၚ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

အပ္ဍဲပေါဲဗ္တိုက်ဂှ် နူဗ္ဒိုပ်ဒပ်ကျာကံၚ်ဇြဳပၞာန် ဖျေံသ္ဇိုၚ်ထဝါဲကဵု ဗိက်ဂှ် ကၠုၚ်ဘိုၚ်ပန်ကဵုဒၟံၚ် နကဵုက္ၜၚ်ကျာ K8W ကေုာံ Mi-2 တံတုဲ ကွာန်ပွန်ပၞာန်ဟွံသေၚ်တံဂှ်လေဝ် ဗ္တိုက်ဂြာတ်ဒၟံၚ်မခတိုဟ်ရောၚ် သ္ဂးရ။

ဟိုတ်နူပရေၚ်ဗ္တိုက်တရဴကျာ ကံၚ်ဇြဳပၞာန်တုဲ ကွာန်အေးချမ်းသာ၊ ရွာသာယာ၊ မနိုးရုံး တံ မပါလုပ် ကွာန်ပွဳပွူဗ္ဒါဲဗ္ဒါဲဂှ် ၅ ကွာန်ဟွံက ဒးဂြိပ်ဒဴပါဲဒလေတ်အာ ဒၞါဲဗၠးဘဲတံဂှ် ဂွံတီကေတ်ရ။

အခိၚ်လၟုဟ် ဒပ်ပံၚ်ကောံ ဂကောံဇြဟတ်ပၠန်ဂတးတံ ဘိုၚ်ပူဗိုၚ်ကၟာတ်လဒဵုလဝ် ကုန်ဗ္ဒိုပ်ကံၚ်ဇြဳပၞာန် ၁၀၂၀ ဂှ်တုဲ ကရောၚ်ပၞာန်ကၠုၚ်ကဵုပၞာန်အရီုတံဂှ်လေဝ် ကြတ်ဗ္တိုက်လဝ်ရ။

ပ္ဍဲရးတၞၚ်သဳဂှ် စနူဂိတုဨပရဴ တုဲကၠုၚ်တေံတုဲ ပ္ဍဲဍုၚ်ဘုတ်ပြၚ်း၊ ပဠဝ်၊ တၞၚ်သဳ၊ တယိတ်ချံၚ် ကေုာံ ဍုၚ်ထဝါဲတံ ပေါဲဗ္တိုက်ၜါလ္ပာ် သာသ္ကာတ်မြဟ်ကၠုၚ်ဂှ် ဂွံတီတေက် ဇရေၚ်ဒပ်ပံၚ်ကောံ ဂကောံဇြဟတ်ပၠန်ဂတးတံရ။

ပရိုၚ်−သြၚ်လောန်တိုၚ်(မ်)

ဗီု−BLACK COBRA COLUMN

Leave a Reply

Your email address will not be published. Required fields are marked *