ၜၚ်ကံက်၊ မေ ၉
ဂကောံဇြဟတ်ပၠန်ဂတး ဍုၚ်ဗၟာတံကဵု သ္ကိုပ်ဝန်ဇၞော်တြေံ ဍုၚ်သေံ တက်ဇြေန်ယှေန်နာဝါထြာ သဳကၠဳဂှ်ဝွံ ဒှ်ပရေၚ်သဳကၠဳ ကဆံၚ်ပူဂဵုတုဲ ဟွံဆက်စပ်ကဵု မူဝါဒကာဍုၚ်သ္အာၚ်ဍုၚ်သေံ မဆက်စပ်ကဵုဍုၚ်ဗၟာပုဟ်ဂှ် ဝန်ဇၞော်ကာဍုၚ်သ္အာၚ် ဍုၚ်သေံ မာရေတ်သာန်ဂဳယောန်ပေါန်သာ ဟီုလဝ် ပ္ဍဲဂိတုမေ ၇ တေံရ။
ကိစ္စဏံဝွံ ဒှ်ကိစ္စပရေၚ်အပ္ဍဲဍုၚ် ဍုၚ်ဗၟာဏောၚ်တုဲ အလဵုအသဳသေံ ပါလုပ်ဆက်စပ်ဟွံမွဲပုဟ်ဂှ် မာရေတ် ဟီုလဝ်တုဲ သ္ပဒတန်လဝ် ပရေၚ်ဆဵုဂဗ အကြာတက်ဇြေန်ကဵု ဂကောံဇြဟတ်ပၠန်ဂတးတံဂှ်ရ။
တက်ဇြေန်ဝွံ မၞိဟ်တီညာတ်ဂၠိုၚ်တုဲ အဆက်အစေန်လေဝ် ဂၠိုၚ်ဟီုဂှ် ပိုယ်တံ ဒးဒုၚ်ဝန်ဏောၚ်တုဲ သွက်သ္ဂောံသောၚ်ကလး ပြသၞာဍုၚ်ဗၟာဂှ် ညးရီုဗၚ်မာန်ရောၚ် ဒဒှ်ရပတှ်ေစှ်ေစိုတ်ဂှ် ကၠာကောံဓရီုလၟေၚ်သတ္တာဟ ဂကောံဝန်ဇၞော်ဂမၠိုၚ် ဂွိုအ်စိုပ်ဂှ် မာရေတ် ဟီုလဝ် ပ္ဍဲသ္ၚိအလဵုအသဳရ။
တက်ဇြေန် ကေုာံ ဂကောံဇြဟတ်ပၠန်ဂတးဍုၚ်ဗၟာတံ ဆဵုဂဗသဳကၠဳဂှ်ဝွံ အလဵုအသဳသေံ ပါလုပ်ဆက်စပ်ဟွံမွဲပုဟ်ဂှ် ညးဟီုဗပေၚ်ဏာလဝ်ရ။
သွက်ဂွံသောၚ်ကလး ပဋိပက္ခရပ်လွဟ် က္တဵုဒှ်ဒၟံၚ် ပ္ဍဲဍုၚ်ဗၟာဂှ်တုဲ တက်ဇြေန် ဒဒှ်ရဆဵုဂဗသဳကၠဳလဝ်ကဵု ကေအိုၚ်အိုဝ်၊ ကေအိုၚ်အေ၊ အာန်ယူဂျဳတံဂှ် နိဿဲကေတ် ပရိုၚ်တမ်ရိုဟ် မစုက်လုက်ကဵု တက်ဇြေန်တုဲ ဌာန်ပရိုၚ်ဗဳအိုဝ်အေ ထ္မံက်ထ္ၜးလဝ် ပ္ဍဲဂိတုမေ ၆ တေံရ။
တက်ဇြေန်ဝွံ ဆဵုဂဗကဵု ဂကောံရပ်လွဟ် မၞုံတွဵုရးသေံတံ မပါလုပ် သီုကဵုဂကောံတၞဟ်ဟ်တံဂှ်တုဲမှ ကၠောန်သ္ပလဝ် ပရေၚ်ဆဵုဂဗတံဏံရောၚ်ဂှ် ထ္မံက်ထ္ၜးလဝ် ပ္ဍဲပရိုၚ်ဗဳအိုဝ်အေရ။
နကဵုအလဵုအသဳသေံ ပံၚ်တောဲရေၚ်တၠုၚ်အာကဵု ဍုၚ်အာဇြဳယာန်တၞဟ်ဟ်တံတုဲ ရေၚ်တၠုၚ်အာ သွက်ပရေၚ်ၜိုဟ်လလမ်၊ ပရေၚ်ညိၚ်ဝတ် ကေုာံ ပရေၚ်ပံၚ်ကောံ ဍုၚ်ဗၟာဏောၚ်တုဲ မူဝါဒကာဍုၚ်သ္အာၚ်ညးတံ အပြံၚ်အလှာဲဟွံမွဲပုဟ်ဂှ် မာရေတ် ဟီုရ။
ပ္ဍဲဍုၚ်ဗၟာ ယဝ်ရပေါဲဗ္တိုက်တံ ဂၠိၚ်သ္ၚောဲဒၟံၚ်ဏောၚ်မ္ဂး နကဵုဍုၚ်သေံ ဇီုကပိုက်ဒးအာ တိုက်ရိုက်ဏောၚ်တုဲ ပ္တိတ်ဒၟံၚ်ဇြဟတ် သွက်ပရေၚ်ၜိုဟ်လလမ်ရောၚ် မာရေတ် ဟီုလဝ်ကီုလေဝ် ဟီုလဝ်ဗွဲလစှ်ေဂှ် ဟွံမွဲရ။
ဝန်ဇၞော်ကာဍုၚ်သ္အာၚ်တၟိ မာရေတ်ဂှ်ဝွံ ဒှ်ညးကေၚ်ဒက်လဝ်မိတ် ကုတက်ဇြေန် အခိၚ်ဗွဲမလအ်လမွဲ မဒှ်ရ။
Ref: Bangkok Post