ကျာ်ထဝ်၊ မေ ၁၀
ဗၠာဲသၟိၚ်ၜါတၠ နူဗ္ဒိုပ်ဗၠာဲသၟိၚ်ၝောံဍုၚ်ကျာ်ထဝ် တွဵုရးဍုၚ်မန်ဂှ်ဝွံ နကဵုတၚ်စောဲစပ် ကဵုပရိုၚ် ဇရေၚ်ဒပ်စဵုဒၞါညးဍုၚ်ကွာန် PDF တံဂှ်ဂးတုဲ ဒပ်ကံၚ်ဇြဳပၞာန် ရပ်ၜုၚ်တက်ပျဲပျာံဒၟံၚ်ရောၚ် ဂၠိုက်ဂၠါဲဂွံတီကေတ် နူဗွိုၚ်ဒပ်ဗၠာဲသၟိၚ်တံရ။
ပ္ဍဲဂိတုမေ ၅ တုဲကၠုၚ်တေံ ဒပ်ကံၚ်ဇြဳပၞာန် လုပ်စိုပ်ရပ်ဒက်လဝ် အကြာပ်ဒပ်ဗၠာဲသၟိၚ်ထိၚ်ရး မၞုံယၟု သဵုရာဇာကဵု ဗၠာဲသၟိၚ်ထိၚ်ယာန် ဝဏ္ဏသဵုတံ အပ္ဍဲဗ္ဒိုပ်ဗၠာဲသၟိၚ်ရ။
အတိုၚ်ဂလာန် ကောန်ဒပ်ဗၠာဲသၟိၚ်တံဂှ်မ္ဂး ဗၠာဲသၟိၚ်ၜါတၠ ဒးဒုၚ်ရပ်ဒက်လဝ်ဂှ်ဝွံ အခိၚ်ဒပ်ကံၚ်ဇြဳပၞာန် စၟဳတ်ဂှ် ကဵုပရိုၚ်ကဵု ဇရေၚ် PDF နူခရိုၚ်သဓီုတံဂှ်ကီု၊ ပလံၚ်ဗစိုပ်ကဵုစရၚ်ယၟု ကုညးမဆက်စပ်ကဵု ကံၚ်ဇြဳပၞာန်တံဂှ်ကီု၊ ဟီုဂးတက်လဝ်ကျာ ကု PDF တံဂှ် စၟဳတ်ဂွံဆဵုကေတ်ရောၚ် သ္ဂးရ။
ပ္ဍဲအရာစၟဳတ်ဗၠာဲသၟိၚ် ရပ်ဒက်ဏာၜါတၠဂှ် ရပ်ဒက်ပျံပျာံတုဲ စၟဳတ်ဒၟံၚ်ရောၚ် ဂွံတီကေတ်ကီုလေဝ် ရပ်ဒက်လဝ် ပ္ဍဲဒပ်လဵုရောဟီုဂှ် ဟွံဂွံတီကေတ်ဏီပုဟ်ဂှ် ဗၠာဲသၟိၚ်ဟွံမိက်ထ္မံက်ယၟုမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အတိုၚ်သွဟ်စၟဳတ်ဂွံ နူကဵုစၟဳတ်လဝ်ဗၠာဲသၟိၚ်ၜါတၠ ဒးဒုၚ်ရပ်လဝ်ဂှ်မ္ဂး ကောန်ဒပ်ဗၠာဲသၟိၚ် ထပ်ဒးဒုၚ်ရပ်တံလေဝ် နွံကၠုၚ်မာန်ရောၚ် သ္ဂးရ။
အခိၚ်လၟုဟ် ဖန်ဇန်ဒၟံၚ် သွက်ဂွံပံက်ဂဗုတ် ကုဗၠာဲသၟိၚ်ၜါတၠ ဒပ်ကံၚ်ဇြဳပၞာန် ရပ်ဒက်လဝ်တံ နကဵုသၞောဝ်ဒပ်ဗၠာဲသၟိၚ်သၟးဟွံက သီုကဵုသၞောဝ်ဗ္တိုက်သရိုဟ် ပကီုပရာပ်တံရောၚ် ဂွံတီကေတ်ရ။
ပ္ဍဲတွဵုရးဍုၚ်မန် အပ္ဍဲကာလသီအဝဵုဏံ ဟိုတ်နူဟွံမိက်ယိုက်ဂၠေၚ်လျိုၚ်ပၞာန် သၟဝ်တဲကံၚ်ဇြဳပၞာန်တုဲ ကောန်ဒပ်ဗၠာဲသၟိၚ် ဂၠိုၚ်ကဵုကၠံ သ္ပလဝ် CDM တုဲ ဟွံသ္ပ CDM မွဲသာ် ကောန်ဒပ်ဗၠာဲသၟိၚ် ကဵုဒၟံၚ်ပရိုၚ် အပ္ဍဲဗ္ဒိုပ်တံလေဝ် နွံဒၟံၚ်ရ။
အတိုၚ်တၚ်နၚ် အလဵုအသဳညဳသၟဟ်ဂကူ NUG ဂှ်မ္ဂး အပ္ဍဲကာလသီအဝဵုဏံ ဗၠာဲသၟိၚ် ကေုာံ ကောန်ပၞာန် သ္ပလဝ် CDM ဟွံအောန်နူကဵု ၁၈၀၀၀ နွံဒၟံၚ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ