တယိတ်ချံၚ်၊ မေ ၁၀
ဟိုတ်နူဒပ်ကံၚ်ဇြဳပၞာန် ထောံမခတိုဟ်ကဵုက္ၜၚ်ကျာ ကုဘာဗ္တောန်လိက် ကွာန်ကနက်သဳရိ ပွိုၚ်ဍုၚ်တယိတ်ချံၚ် ရးတၞၚ်သဳဂှ်တုဲ ကောန်ၚာ်သၟတ် ၂ တၠ ချိုတ်တုဲ ဟွံအောန်နူကဵု ၆ တၠ ဇီုကပိုက်ကလိဂွံလဝ်ဝပ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန် ဒးဒုၚ်သီလဝ် ဗ္ဒိုပ်ဒပ် (ပဲဒက်) ဂှ်ဝွံ ပ္ဍဲဂိတုမေ ၈ အခိၚ်ဇိုၚ်သဝ်တ္ၚဲ ၜိုတ် ၅ နာဍဳဂှ် ပေါဲဗ္တိုက်က္တဵုဒှ်ဟွံမွဲမွဲသာ် ထောံလဝ်မခတိုဟ် လျိုၚ် ၅၀၀ ပံၚ် နကဵုက္ၜၚ်ကျာ ကုဘာဗ္တောန်လိက် ကွာန်ကနက်သဳရိဂှ်ရ။
ဟိုတ်နူဒးဒုၚ်ထောံမခတိုဟ် နကဵုက္ၜၚ်ကျာတုဲ မာၚ်ပိုၚ်သဵုတူ အာယုက် ၁၅ သၞာံ ကဵု မာၚ်ဟုၚ်ပျေအ်ဖျဵု မၚ်ဒၟံၚ်သ္ဂောံတေအ်မခၞံကျာ ပ္ဍဲခဠာတ်မခၞံကျာဘာဗ္တောန်လိက်တံ ညးၜါတၠ ချိုတ်အာလဝ် ဒၞါဲဂှ်တုဲ ကောန်ၚာ်သၟတ် ၆ တၠဟွံအောန် ဇီုကပိုက်ကလိဂွံလဝ်ဝပ်ရ။
ဒပ်ကံၚ်ဇြဳပၞာန် ထောံလဝ်မခတိုဟ် ကုဘာဗ္တောန်လိက် ကွာန်ကနက်သဳရိဂှ်ဝွံ ရုၚ်ဂဥုဲပွိုၚ်တိုက်ကွာန်ရၚေဝ်ဂှ်လေဝ် ထပ်ထောံဏာလဝ်မခတိုဟ်တုဲ ရုၚ်ဂဥုဲပွိုၚ်တိုက်ဂှ် လီုအာတုဲ မၞိဟ်ဇီုကပိုက်ကလိဂွံဝပ် ဟွံမွဲပုဟ်ဂှ် ညးဒေသတံ သ္ဂးရ။
ပ္ဍဲဂိတုမေ ၈ အခိၚ်နူဂယး ၜိုတ် ၈ နာဍဳဂှ် ဒပ်ပံၚ်ကောံ ဂကောံဇြဟတ်ပၠန်ဂတးတံ သီဂွံလဝ် ဗ္ဒိုပ်ဒပ်(ပဲဒက်) ကံၚ်ဇြဳပၞာန် မၞုံသ္ကုတ်ဂၠံၚ်ပျဳထံၚ်သု ဗိက်−ထဝါဲဂှ်ရ။
အပ္ဍဲပေါဲဗ္တိုက်ဗ္ဒိုပ်ဂှ်ဂှ် ရပ်ဂွံလဝ် ကောန်ဒပ်ကံၚ်ဇြဳပၞာန် ၂၂ တၠ ဂျိုၚ်ၚ်တုဲ သီဂွံလဝ် သီုကဵုလွဟ်လက်နက်မကမ် ဗွဲမဂၠိုၚ်ဂၠေၚ်ရောၚ် ဂွံတီကေတ် အတိုၚ်တၚ်လလောၚ်တြး ဒပ်ပံၚ်ကောံ ဂကောံဇြဟတ်ပၠန်ဂတးတံရ။
ဟိုတ်နူဗ္ဒိုပ်ဒပ် (ပဲဒက်) ဒးဒုၚ်သီလဝ်ဂှ်တုဲ ဒပ်ကံၚ်ဇြဳပၞာန်ဝွံ ပေါဲဗ္တိုက်ဟွံမွဲမွဲသာ် ထောံဏာလဝ်မခတိုဟ် နကဵုက္ၜၚ်ကျာ ကုညးဍုၚ်ကွာန်ကောန်အရာပ်တံဂှ်ရ။
ဟိုတ်နူပရေၚ်ဗ္တိုက်ထောံမခတိုဟ် နကဵုက္ၜၚ်ကျာ ဒပ်ကံၚ်ဇြဳပၞာန်ဂှ်တုဲ ညးဍုၚ်ကွာန်ဒေသ ဒၟံၚ်ကွာန်ကနက်သဳရိ၊ ကွာန်ရၚေဝ်၊ ကွာန်ကျဲမေန်ကုန်၊ ကွာန်ကျံက်ခမံက် ကွာန်နူကဵုပွိုၚ်ဍုၚ်တယိတ်ချံၚ်တံဂှ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ