မတ်မလီု၊ မေ ၁၀
နူကဵုကောံဓရီု ဂကောံမဟာမိတ်၊ ဂကောံက္ဍိုက်ပ် ဂကောံရပ်လွဟ်ကောန်ဍုၚ်အရၚ် ဒေါအ်ပန်ပှော် ၇ ဂကောံဂှ် ဒက်ပ္တန်လဝ် ကမ္မတဳကမၠောန်ရောၚ် ညးမၞုံအခေါၚ်ဟီုဂး သ္ကိုပ်ဗိုလ်ဇၞော် သဝ်ကျဝ်ညောအ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမေ စၟတ်တ္ၚဲ ၇ ကဵု စၟတ်တ္ၚဲ ၈ ဂှ် နဒဒှ်အလန်ကိုပ်ကၠာအိုတ် ကၠောန်ဗဒှ်လဝ် ကောံဓရီုဂကောံမဟာမိတ်၊ ကောံဓရီုဂကောံက္ဍိုက်ပ် နကဵု Video Conferencing တုဲ ကမၠောန်နွံပၟိက် သွက်လၟေၚ်ကမၠောန်ပရေၚ်ၜိုဟ်လလမ်တံဂှ် ပါ်ကဏ္ဍတုဲ ဂွံကၠောန်ၜိုတ်မာန်ဂှ် ဒက်ပ္တန်လဝ် ကမ္မတဳကမၠောန် ၆ ရ။
ပ္ဍဲကဵုဏံ ကမ္မတဳသဳကၠဳပရေၚ်ဍုၚ်ကွာန်၊ ကမ္မတဳကေၚ်ကာဍုၚ်သ္အာၚ်၊ ကမ္မတဳပလေဝ်ပလေတ်ပရေၚ်ဂီုကၠီု၊ ကမ္မတဳစဵုဒၞါကောန်အရာပ် ကေုာံ ကမ္မတဳကဵုအရီုဗၚ် စပ်ကဵုပရေၚ်ဗ္စာရဏာမၞိဟ်၊ ကမ္မတဳဂၠါဲသြန်ဗွဝ် ကေုာံ ကမ္မတဳ ကေၚ်ကာညးဗြဴ ကေုာံ သၟတ်တံ ပါလုပ်ရ။
အတိုၚ်သၞောဝ်သ္ဇိုၚ်ဂှ်မ္ဂး ကမ္မတဳကမၠောန် သီု ၆ ဏံဂှ်ဝွံ ဒးရေၚ်တၠုၚ်အာကမၠောန် သၟဝ်ကောပ်ကာဲ ဂကောံညးအုပ်ကာတံရဏောၚ်ဂှ် သ္ကိုပ်ဗိုလ်ဇၞော် သဝ်ကျဝ်ညောအ် ဟီုလဝ် သာ်ဏံရ။
“အဓိကဂှ်တှ်ေ အတိုၚ်သၞောဝ်သ္ဇိုၚ်မ္ဂး ကမ္မတဳသီု ၆ ဏံဂှ် ဒးရေၚ်တၠုၚ်အာကမၠောန် သၟဝ်ကောပ်ကာဲစၞောန်ဂၠံၚ် ဂကောံညးအုပ်ကာတံဏောၚ်။ မွဲကမ္မတဳတှ်ေ ပိုယ်တံ မွဲဂကောံ မၞိဟ်မွဲရ။ ဒက်လဝ် ကဵုမၞိဟ် ၇ တၠ။ ပ္ဍဲကဵုဏံ ပိုယ်တံ ရုဲစှ်ကေတ် Coordinator (သ္ကိုပ်ပ္ညဳပ္ညပ်) မွဲတၠတုဲ ပအပ်ကဵုလဝ်တာလျိုၚ် နွံရ” သာ်ဝွံ သ္ဂးရ။
ပ္ဍဲကမ္မတဳဂၠါဲသြန်ဗွဝ် ကမ္မတဳသဳကၠဳပရေၚ်ဍုၚ်ကွာန်ဂှ် သ္ဂောံပကောံညးစၞး သ္ပဟွံမာန်ဏီဂှ်ရ ပြဟ်ဟ်ဏံ ဂကောံညးအုပ်ကာတံ ကေတ်လဝ်တာလျိုၚ်တုဲ ကမ္မတဳသှ်ေတံဂှ်တှ်ေ ဂကောံမဟာမိတ်တံ ဒက်လဝ်ဂကောံ နကဵုညးစၞး ၂၈ တၠရောၚ် ညးဆက်ဟီုရ။
ဆ္ဂး ပ္ဍဲကဵုကမ္မတဳကမၠောန် ကေုာံ ဂကောံညးအုပ်ကာဂှ် ညးစၞး ဂအုပ်ဂကောံဗၠးၜးကောန်ဂကူပအိုဝ် PNLO တံ ဟွံပါဏီကီုလေဝ် ပ္ဍဲကဵုကောံဓရီုတံဂှ်တှ်ေ နဒဒှ်ညးကော်ဘိက်ဗွဲတၟေၚ်ဂှ် တိုန်စိုပ်ဒၟံၚ်လၟေၚ်ၚ်နွံရောၚ် သ္ဂးရ။
“ပ္ဍဲကဵုကမ္မတဳဏံဂမၠိုၚ်ဂှ် ညးစၞး PNLO တံ ဟွံပါဏီပုဟ်။ ဆ္ဂး ဇၟာပ်ကောံဓရီုပိုယ်တံကၠောန်ဂှ်ဒှ်ဒှ်၊ ကောံဓရီုကမ္မတဳက္ဍိုက်ပ်ဂှ်ဒှ်ဒှ်၊ နကဵုလိုဝ်ဂိုဝ် PNLO မွဲ ညးစၞးပေၚ်ၚ် ဂွံပါလုပ်မာန် အခိၚ်တၚ်အခက်အခုဲနွံဒၟံၚ်ဏီဂှ် နဒဒှ်ညးကော်ဘိက်ဗွဲတၟေၚ် ပိုယ်တံ ကော်ဘိက်လဝ်လၟေၚ်ၚ်နွံတုဲ တိုန်စိုပ်ဒၟံၚ်လၟေၚ်ၚ်ရောၚ်” သာ်ဝွံ သ္ကိုပ်ဗိုလ်ဇၞော် သဝ်ကျဝ်ညောအ် ဟီုရ။
ပ္ဍဲကဵုဂကောံမဟာမိတ်ဒေါအ်ပန်ပှော်ဂှ် ကံၚ်ဇြဳကလေၚ်ဒက်ပ္တန်ရးသေံ RCSS ၊ ဗော်ဍုၚ်မန်တၟိ NMSP ၊ ဗော်ဗၠးၜးရခေၚ် ALP ၊ ဒပ်ပၞာန်ဒတုဲဖဵု ဒဳမဝ်ကရေဇြဳကရေၚ် DKBA ၊ ကံၚ်ဇြဳၜိုဟ်လလမ်ကရေၚ် KNU/KNLA-PC ၊ ဗော်သွးဒဳမဝ်ကရေတ်တေတ်လာဟူ LDU ကေုာံ ဌာန်ဂအုပ်ဗၠးၜးကောန်ဂကူပအိုဝ် PNLO တံ ပါလုပ်ရ။
အပ္ဍဲဂိတုမာတ်တုဲကၠုၚ်တေံ နူကောံဓရီုဇၞော် ဂကောံဒေါအ်ပန်ပှော် EAO ၇ ဂကောံဂှ် ဒက်ပ္တန်လဝ် ဂကောံမဟာမိတ် (7 EAO Alliance) နူဇမ္ၚောဲတုဲ ဂွံထ္မံက်ရုပ်ရဴ လၟေၚ်ကမၠောန်ဖျေံစၟတ်လဝ် နူကောံဓရီုတံ ဗွဲမစှ်ေကဵုသၞောတ်မာန်ဂှ် ဒက်ပ္တန်လဝ် ဂကောံညးအုပ်ကာရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−EAO Alliance