မတ်မလီု၊ မေ ၁၀
ပ္ဍဲတွဵုရးဍုၚ်မန် ကရောံဗ္ၜတ်ဂမ္တဴသ္ကာတ်ဂှ် ဒမြိပ်ထၜိုတ်တိတ်လေဝ် ယအ်စှ်ေအာတီတီဂှ်ရ ကၠအ်ထၜိုတ်ဗွဲမဂၠိုၚ် ကၠာရာသဳဟွံဂွံအိုတ်ဂှ် ဒးကၟာတ်ကၠုၚ်နွံရောၚ် တၠကမၠောန်ထၜိုတ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကမၠောန်ကၠအ်ထၜိုတ် အပ္ဍဲတွဵုရးဂှ် လၟေၚ်သၞာံ နူဂိတုသေပ်တေမ်ဗာ စဵုကဵုဂိတုဂျောန် ကၠောန်ၜိုတ်ဒၟံၚ်ကီုလေဝ် ပ္ဍဲသၞာံဏံ ဟိုတ်နူဒမြိပ်တိတ် ယအ်စှ်ေကၠုၚ်ဂှ်ရ စနူဂိတုဨပရဴ သတ္တာဟလက္ကရဴအိုတ်ဂှ်တုဲ ကၟာတ်ကၠုၚ်ကၠအ်ထၜိုတ်တံ နွံကၠုၚ်ရ။
ကၠအ်ထၜိုတ်ဂမၠိုၚ်ဝွံ ဟိုတ်နူဗ္ၜတ်ဂမ္တဴတုဲ ဒမြိပ်ထၜိုတ်တိတ် ယအ်စှ်ေကၠုၚ်ကီု၊ ခရိတ်ကောန်ကလောန်၊ ခရိတ်ပလံၚ်ဗစိုပ်တံသၟးဟွံက သီုကဵုခရိတ်အိုတ်နာနာတံဂှ် က္ဍၚ်တုဲ သြန်လုပ်ကဵုသြန်တိတ် ဟွံကိတ်ဂှ်ရ ဒးကၟာတ်ကၠုၚ်အိုတ်ရ။
“ယအ်အာ ၜိုတ် ၃ ဂအုံ ၂ ဂအုံရ။ တၠကၠအ်တံလေဝ် ဟွံကိတ်ရပုဟ်လေဝ်။ ကၠအ်ဟွံကိတ်တံဂှ်တှ်ေ ဒေါအ်ထောံယျ။ ဆ္ဂး လ္ၚဵုတံဂှ်လေဝ် တၟော်ဟွံကိတ်ကီုလေဝ် တၠကၠအ်ရံၚ်သွက်ကောန်ကလောန်တံဂှ်တှ်ေ သှ်ေဏောၚ်။ တုဲပၠန် ကၠအ်ထၜိုတ်တိတ်တ်တံဂှ် သှ်ေဏောၚ်။ သှ်ေၜိုတ်ဏံရဏောၚ်” သာ်ဝွံ တၠကမၠောန်ထၜိုတ်မွဲတၠ ဟီုရ။
ထၜိုတ်ယအ်ဂှ်ဝွံ ဟိုတ်နူဗ္ၜတ်ဂမ္တဴ သ္ကာတ်မြဟ်ဂှ်ကီု နူကဵုရာသဳထၜိုတ်စတေံရ ၚုဟ်ဝါဲဓာတ် က္ဍၚ်ဒၟံၚ် ဂၠိုၚ်ကဵုဆတုဲ ကဵုအကာဲအရာ စုတ်ဟွံမာန်တံဂှ်လေဝ် ဆက်စပ်ဒၟံၚ်အဓိကရောၚ် တၠကမၠောန်ထၜိုတ်တံ သ္ဂးအိုတ်ရ။
တၠကမၠောန်ထၜိုတ်မွဲတၠဂှ်လေဝ် ဒမြိပ်ထၜိုတ်တိတ် ယအ်စှ်ေအာဂှ်ဝွံ ယအ်စှ်ေကၠုၚ် စဵုကဵုတၟော်ပရေၚ်ပိုန်ဒြပ်ဟွံကိတ်တုဲ ပ္ဍဲဗွဝ်ဖျာဂှ်လေဝ် ၚုဟ်ထၜိုတ်ထေက်ကဵုဂွံဂှ် ဟွံဂွံဒၟံၚ်ပုဟ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဒမြိပ်တိတ်ဂှ်တှ်ေ ကလေၚ်ယအ်စှ်ေအာ ၜိုတ်ကဝက်ပြၚ်ၚ် ဟီုဂွံရ။ အခိၚ်တၟော်ဟွံကိတ်ဂှ် ကောန်ရဲခွါတ်ထၜိုတ်ကဵု ပိုယ်တံ တၠကၠအ်တံဂှ်တှ်ေ ဒးချိၚ်ဆဒၟံၚ်တုဲ ကောန်ရဲခွါတ်ထၜိုတ်တံဂှ် ၜိုတ်ဍေံတံဂွံ တၟော်ဟွံကိတ်တှ်ေ ဟွံခွါတ်မွဲသာ် ကၠအ်ဇူထောံလေဝ် နွံရ။ သွံထၜိုတ်ဂှ်တှ်ေ အောန်စှ်ေကၠုၚ်ကွေံကွေံရ။ အောန်ကၠုၚ်ကီုလေဝ် ၚုဟ်ဂှ် ၜိုတ်ထေၚ်လဝ်ဂှ် ဟွံတိုန်ကၠုၚ်ဏီပုဟ်” သာ်ဝွံ သ္ဂးရ။
ပ္ဍဲဗွဝ်ဖျာထၜိုတ်ဂှ် ထၜိုတ်ထအၚ်ယေက် Local 3 မွဲပံၚ်ဂှ် ဂွံဒၟံၚ် ဗ္ဒါဲ ၁၉၀၀ ဒ္ကေဝ်ကီုလေဝ် ဒမြိပ်တိတ် အောန်စှ်ေကၠုၚ် တီတီဂှ်ရ ရဲကၠုၚ်သွံ ဗီုကၠာတေံ စဵုကဵုဟွံမွဲ အောန်ကၠုၚ်ဂှ် ဂွံတီကေတ် ဇရေၚ်ဒေၚ်ရာန်ထၜိုတ်တံရ။
အခိၚ်လၟုဟ် နူကဵုရုၚ်စက်မွဲကဆံၚ် ဍုၚ်ကြုက် ရာန်ဒၟံၚ်ထၜိုတ်တံ ဂၠိုၚ်အိုတ်ကီုလေဝ် လ္ပာ်ဍုၚ်သေံဂှ်တှ်ေ ရာန်ကၠုၚ်ဗီုကၠာတေံ ဟွံမွဲရတုဲ ၜိုတ်ညိညရဟေၚ် ရာန်ဒၟံၚ်တံ နွံဂှ် သ္ဂးရ။
တွဵုရးဍုၚ်မန် ပိုၚ်ပြဳလဝ် တိတဵုထၜိုတ် ၅ ကိုဋ်ဨကပြၚ်ဂှ်ဝွံ လ္ဂောံကဵုဗ္ၜတ်ကၟိန်ဍုၚ်မ္ဂး ဒှ်တွဵုရး တဵုလဝ်ထၜိုတ်ဂၠိုၚ်အိုတ်မွဲတုဲ လၟေၚ်သၞာံ လျိုၚ်တာန်ထၜိုတ် တိတ်ဒၟံၚ်မွဲကိုဋ်ပြၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ