ပ္ဍဲကျာ်ထဝ် လွဟ်ဇၞော်စှ်ေတုဲ ကောန်အရာပ်မွဲတၠ ချိုတ်အာ

ကျာ်ထဝ်၊ မေ ၁၁

ဒပ်ကံၚ်ဇြဳပၞာန် ဟိုတ်နူပန်လွဟ်ဇၞော် ပ္ဍဲကွာန်ဇြဳပျံၚ် ၁ ပွိုၚ်ဍုၚ်ကျာ်ထဝ် တွဵုရးဍုၚ်မန်တုဲ မၞိဟ်တြုံဒေသမွဲတၠ ဇီုကပိုက်ချိုတ်အာလဝ်ရောၚ် ဗော်သွးကောန်ဂကူကရေၚ် KNU ဗဟဵု လလောၚ်ပ္တိတ်လဝ် ပ္ဍဲဂိတုမေ ၁၀ တေံရ။

တုဲကၠုၚ် ပ္ဍဲဂိတုမေ ၆ အခိၚ်နူဂယး ၜိုတ် ၅ နာဍဳဂှ် နူဒပ်အမၠံက်ကံၚ်ဇြဳပၞာန် စၟတ် ၃၁၀ ဖျေံသ္ဇိုၚ်ဒုၚ်သယိတ်ဂှ် ပေါဲဗ္တိုက်ဟွံမွဲမွဲသာ် ပန်ဖျေံလဝ်လွဟ်ဇၞော် ပ္ဍဲကွာန်ဇြဳပျံၚ် ၁ ရ။

မကမ်လွဟ်ဇၞော် ဒပ်ကံၚ်ဇြဳပၞာန် ပန်ပှော်ဏာလဝ်ဂှ် ဒတုံဗ္တိုဟ်ထ္ကးအာတုဲ ဥူတာန်အံၚ် အာယုက် ၄၅ သၞာံ ခွါတ်မံၚ်ထၜိုတ် ပ္ဍဲကၠအ်ထၜိုတ် ဒးအာလဝ်ကဝေက်မကမ် အလုံမွဲဇကုရ။

ဗွဲကြဴဂှ် ဥူတာန်အံၚ် ဒးအာလဝ်လွဟ်ဇၞော် မကလိဂွံလဝ်ဝပ် အခိၚ်လွဳဒၟံၚ် ပ္ဍဲဗ္ဒမ်ဂဥုဲအပ္ဍဲဒေသ ဂိတုမေ ၇ အခိၚ်နူဂယး ၜိုတ် ၈ နာဍဳဂှ် ချိုတ်အာလဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး KNU ဂှ်ရ။

ကွာန်ဇြဳပျံၚ် ၁ ဒပ်ကံၚ်ဇြဳပၞာန် ပန်ပှော်လဝ်လွဟ်ဇၞော်ဂှ်ဝွံ ဒှ်တိအုပ်ဓုပ်ခရိုၚ်သဓီု ဒပ်မဟာ ၁ ဗော်သွးကောန်ဂကူကရေၚ် KNU တုဲ ကောန်ဂကူကရေၚ် မံၚ်ဒၟံၚ် ဂၠိုၚ်အိုတ်ရ။

တုဲကၠုၚ် ပ္ဍဲဂိတုဨပရဴ ၂၈ တေံဂှ်လေဝ် ဒပ်ကံၚ်ဇြဳပၞာန် ပန်ပှော်လွဟ်ဇၞော် ပ္ဍဲကွာန်( ဓါးရိုး) ပွိုၚ်ဍုၚ်သဓီုတုဲ ကောန်ကွာန်နံၚ်ဘိုဝ် တီးရိုး အာယုက် ၆၇ သၞာံ ကၠောန်ဒၟံၚ်ကလောန်ကၠအ်သတ်ဂှ် ဒးအာကဝေက်လွဟ်ဇၞော် ချိုတ်အာလဝ်ရောၚ် ဂွံတီကေတ် အတိုၚ်တၚ်လလလောၚ်တြး ခရိုၚ်သဓီု KNU ရ။

ပရိုၚ်−သြၚ်လောန်တိုၚ်(မ်)

ဗီု−KNU