တယိတ်ချံၚ်၊ မေ ၁၁
ရးတၞၚ်သဳ ပွိုၚ်ဍုၚ်တယိတ်ချံၚ် ပ္ဍဲကွာန်ကနက်သဳရိဂှ် ပေါဲဗ္တိုက်ဟွံမွဲမွဲသာ် ဟိုတ်နူဒပ်ကံၚ်ဇြဳပၞာန် ပန်ဗ္တိုက်ကဵု နကဵုတရဴဍာ်၊ တရဴကျာတံဂှ်တုဲ မၞိဟ်တြုံဒေသ ၃ တၠ ထပ်ချိုတ်အာလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂိတုမေ ၁၀ အခိၚ်နူဂယး ၜိုတ် ၁၂ နာဍဳဂှ် ဒပ်ကံၚ်ဇြဳပၞာန်ဝွံ ပေါဲဗ္တိုက်ဟွံမွဲမွဲသာ် ထောံလဝ်မခတိုဟ် ပ္ဍဲကွာန်ကနက်သဳရိ ဗ္ဒါဲ ၂၀ မ နကဵုက္ၜၚ်ကျာသၞေၚ်ဝဲ ၂ ဖ္ဍိုက်၊ ဂျက်ဖိုက်တာ ၁ ဖ္ဍိုက်တုဲ က္ၜၚ်ပၞာန်ဒပ်ဍာ်ဂှ်လေဝ် ပန်လဝ် ကဵုလွဟ်ဇၞော်ကီုရ။
ဟိုတ်နူပရေၚ်ဗ္တိုက်တရဴဍာ်၊ တရဴကျာ ကံၚ်ဇြဳပၞာန်တုဲ ကိုဝ်နံၚ်ဂဝ်၊ ကိုဝ်နာၚ်ကျဳ ကေုာံ ကိုဝ်ညဳဥူ အာယုက် ၄၀ ပြၚ်တံ မံၚ်ဒၟံၚ်အပ္ဍဲသ္ၚိဂှ် ချိုတ်အာလဝ်တုဲ ညးဇီုကပိုက်ကလိဂွံဝပ်တံလေဝ် နွံဒၟံၚ်ရောၚ် သ္ဂးရ။
အပ္ဍဲပရေၚ်ဗ္တိုက်ဏံဂှ် သ္ၚိဒၟံၚ် ညးဍုၚ်ကွာန်ကောန်အရာပ်တံ ဇီုကပိုက်လီုလာ်အာလဝ် နွံတုဲ ညးဒေသဗွဲမဂၠိုၚ် ထောံလသာသ္ၚိဌာန် ဒးဂြိပ်ဒဴပါဲဒလေတ်အာဂှ်ရ လၟိဟ်သ္ၚိလီုလာ်အာဂှ် ဟွံဂွံတီကေတ် ချိုတ်တ်ပၠိုတ်တ်ဏီရ။
တုဲကၠုၚ် ပ္ဍဲဂိတုမေ ၈ တေံဂှ်လေဝ် ဟိုတ်နူကံင်ဇြဳပၞာန် ဗ္တိုက်ကွာန်ကနက်သဳရိ ကွာန်ရၚေဝ် နကဵုပၞာန်ကျာတုဲ မာၚ်ပိုၚ်သု ကေုာံ မာၚ်ဟုၚ်ပျေအ်ဖျဵု ညးသၟတ်ဒေသ အာယုက် ၁၆ သၞာံတံဂှ် ချိုတ်အာလဝ် ဒၞါဲဂှ်တုဲ ကောန်ၚာ်သၟတ် ဟွံအောန်နူကဵု ၆ တၠ ကလိဂွံလဝ်ဝပ်ရ။
ဒပ်ကံၚ်ဇြဳပၞာန် ဒးဒုၚ်သီလဝ် ဗ္ဒိုပ်(ပဲဒက်) နူဒေသတယိတ်ချံၚ်ဂှ်ဝွံ ပေါဲဗ္တိုက်ဟွံမွဲမွဲသာ် ဆက်ကလိလောန်ကၠုၚ် ပရေၚ်ဗ္တိုက်တရဴကျာ စွံပွန်ကုညးဍုၚ်ကွာန်ကောန်အရာပ်တံဂှ်ရ။
ဟိုတ်နူပရေၚ်ဗ္တိုက် ဒပ်ကံၚ်ဇြဳပၞာန်တုဲ ညးဒေသ နူကဵုကွာန်ရၚေဝ်၊ ကျဲမေန်ကုန်၊ ကျံက်ခမံက် ကေုာံ ကွာန်ကနက်သဳရိ နူပွိုၚ်ဍုၚ်တယိတ်ချံၚ်တံ ဂၠိုၚ်ကဵုလ္ၚီ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ