ကၞောတ်ၜဳရေဝ်၊ မေ ၁၁
တိဍာ်ပၟိက်ဇၞော် သွက်ဗော်ဍုၚ်မန်တၟိ ဂကောံရပ်လွဟ်ကောန်ဍုၚ်အရၚ်ဂှ် လ္ပာ်ကံၚ်ဇြဳပၞာန် သွက်ဂွံဂွံကၠာတဲဂှ် ဖ္တိုက်ဖ္အောဝ်တြးကၠုၚ်ဝါဒ ပ္ဍဲချာန်နေဝ်ထလဳဂရာမ် ဒပ်ပၞာန်ထံက်ဂလာန်တံဂှ်ရ။
ပေတိုဝ်မဳဒဳယျာ လ္ပာ်ကံၚ်ဇြဳပၞာန်ဂှ် တိဍာ်ဗော်ဍုၚ်မန်တၟိ ပ္ဍဲညဳသာဂှ် ဘာကောန်ဂကူမန်ဂမၠိုၚ် နွံတုဲ ပ္ဍဲတိဍာ်ဏံဂှ် ဟိုတ်နူပရေၚ်ပညာ၊ ပရေၚ်ပိုန်ဒြပ် ပြေပြံၚ်ဒၟံၚ်ဂှ်ရ ဒှ်ဒၟံၚ်ဂြိုဟ်က္တာန် ဗော်ဍုၚ်မန်တၟိရောၚ် ပ္ဍဲဂိတုမေ ၇ တေံ ထ္မံက်ထ္ၜးလဝ်ရ။
သ္အာၚ်နူဂှ်ပၠန် ပ္ဍဲတွဵုရးဍုၚ်မန်ဂှ် ဒးစွံသတိ လ္ပာ်လက္ကရဴဏောၚ်တုဲ ယဝ်ရထံက်ထ္ၜးတိဍာ်တံဏံမာန်မ္ဂး ဇကု (ကံၚ်ဇြဳပၞာန်) ဒှ်ညးဂွံလဝ်စေဝ်လ္တူရဏောၚ်ဂှ် စန်ဒက်ဆဝ်မ္ၚုဟ်လဝ် သွက်ကံၚ်ဇြဳပၞာန်ရ။
မွဲလ္ပာ်ဂှ်ပၠန် လမျီုဍေံတံ နွံဒၟံၚ် ပ္ဍဲကျာ်ပိရောၚ် ထ္မံက်ထ္ၜးလဝ်တုဲ ဍုၚ်ဝွံ ဒှ်ဍုၚ်ပယျဵု စုက်ဒၟံၚ်ကဵု ဍုၚ်သၚ်ခဠပူရဳ လ္ပာ်ဍုၚ်သေံ ဒၞါဲဌာန်ဂအုပ်၊ ဒတုဲဖဵု၊ ကောန်ဇာတ်၊ ဘာဗ္တောန်လိက်၊ ကဝ်လိက်၊ ရုၚ်ဂဥုဲ ဗော်ဍုၚ်မန်တၟိနွံတံဂှ်ရောၚ် သ္ဂးရ။
စပ်ကဵုရဲထံက်ဂလာန်ဒပ်ပၞာန်တံ ချူပ္တိုန်ဆဝ်မ္ၚုဟ်လဝ်သာ်ဏံတုဲ နူကဵုသြၚ်လောန်တိုၚ်(မ်) ဂ္စါန်ဆက်စၠောံသၟာန်သၟုက် ဇရေၚ်ညးမၞုံအခေါၚ်ဟီုဂး ဗော်ဍုၚ်မန်တၟိ နာဲအံၚ်မ္ၚဵုကီုလေဝ် ကၟာတ်လဝ်ဖုၚ်တုဲ နူအောန်လာၚ်လေဝ် ကေတ်အဆက်ဟွံဂွံလဝ်ရ။
နူကဵုထလဳဂရာမ်ချာန်နေဝ် ရဲထံက်ဂလာန်ဒပ်ပၞာန်တံဂှ် တြးဝါဒဆဝ်မ္ၚုဟ် စပ်ကဵုဗော်ဍုၚ်မန်တၟိဂှ်ဝွံ အပ္ဍဲကာလသီအဝဵုဏံ ဂွံဆဵုကေတ် အလန်ပထမကိုပ်ကၠာအိုတ်တုဲ ဂကောံပါ်တိတ် NMSP-AD လလောၚ်တြးပၞာန် ကုကံၚ်ဇြဳပၞာန်တုဲ ဂွံဗၞတ်ပွိုၚ်ပိဂိတုဂှ် ဆဝ်မ္ၚုဟ်ကၠုၚ်သာ်ဏံရ။
ညးလ္ၚတ်သ္ၚဳဂၠိပ်ပရေၚ်ပၞာန်မွဲတၠဂှ် ရဲထံက်ဂလာန်ဒပ်ပၞာန်တံ တြးဝါဒ ဆဝ်မ္ၚုဟ်ဂှ်ဝွံ ကၠောန်ဒၟံၚ်အတိုၚ်တြေံရတုဲ ဗော်ဍုၚ်မန်တၟိဂှ်လေဝ် ဆက်အာဒၟံၚ် အတိုၚ်ဂၠံၚ်တရဴ NCA ဂှ်ရ မုမွဲမှ တၟေၚ်ၚ်တၟဟ်ဟ် ဒှ်ကၠုၚ်ဟွံသေၚ်ပုဟ်ဂှ် သ္ပလဝ်တၚ်စၟတ်ရ။
ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF နာဲနဂါဂှ် ပရေၚ်ဆဝ်မ္ၚုဟ်ဏံဝွံ ညံၚ်ဗော်ဍုၚ်မန်တၟိ ဟွံဂွံလုပ်ကၠုၚ် ပ္ဍဲပၠန်ဂတးလၟုဟ်ဏံဂှ် ဒှ်သဘဴတာဒၞါကၠေံ မွဲနဲမွဲဗီုရောၚ် ဟီုထ္ၜးလဝ် လညာတ်ညးရ။
“ဗ္တိုက်ဒၞါဲတံဏံမ္ဂး နကဵုဗော်ဍုၚ်မန်တၟိ ဂိဂၠိုၚ်ဏောၚ် ဍေံတံ( ရဲထံက်ဂလာန်ဒပ်ပၞာန်) ချူလဝ် နဗီုပြၚ်တြးဝါဒဏောၚ်ဂှ် ညာတ်ရ။ ကၠောန်ထောံသာ်ဏံမ္ဂး ဗော်ဍုၚ်မန်တၟိ ညံၚ်ဂွိုအ်လုပ်ကၠုၚ် ပ္ဍဲပၠန်ဂတးဏံဂှ် ဒှ်သဘဴတြးဝါဒ တာဒၞါကၠေံ မွဲနဲမွဲဗီုသက်က်ရဏောၚ်ဂှ် အဲမိက်ဂွံဟီုရ” သာ်ဝွံ သ္ဂးရ။
ဗော်ဍုၚ်မန်တၟိဝွံ ပ္ဍဲသၞာံ ၂၀၁၂ တေံ ထ္ပက်လဝ်လိက်ကသုက်ဒေါအ်ပန်ပှော်ကဆံၚ်တွဵုရး Bilateral Agreement တုဲ ပ္ဍဲသၞာံ ၂၀၁၈ ဂှ် ထ္ပက်လဝ်စၟတ်တဲ ပ္ဍဲလိက်ကသုက်ဒေါအ်ပန်ပှော် အလုံဍုၚ် NCA ရ။
ပ္ဍဲကာလသီအဝဵုဏံ ပြသၞာပရေၚ်ဍုၚ်ကွာန်ဂှ် သွက်ဂွံဂၠါဲသွဟ်သဳကၠဳအာ နကဵုနဲကဲပရေၚ်ဍုၚ်ကွာန်ဂှ် ဗော်ဍုၚ်မန်တၟိ ဒတူလိုၚ်ကၠုၚ်လဝ်တုဲ ပေါဲသဳကၠဳပရေၚ်ၜိုဟ်လလမ် က္ဍိုပ်သ္ကိုပ်ပၞာန် ကော်ဘိက်လဝ်ဂှ်လေဝ် တိုန်စိုပ်လဝ် ဟွံအောန်နူကဵု ၅ ဝါရ။
ပရိုၚ်−သြၚ်လောန်တိုၚ်(မ်)
ဗီု−NMSP