တၞၚ်သဳ၊ မေ ၁၁
ပေါဲဗ္တိုက်ပၠန်ဂတးက္ညၚ် သွက်သၞောတ်တၠအဝဵုပၞာန် ဂွံသရိုဟ်စှ်ဂှ်ေဝွံ ပေါဲဗ္တိုက်သ္ကာတ်မြဟ်ကၠုၚ် ကြပ်အလုံရးတၞၚ်သဳမွဲတုဲ မုက်ပၞာန် သာသ္ကာတ်မြဟ်ကၠုၚ်ဂှ် ဒပ်ပံၚ်ကောံ ဂကောံဇြဟတ်ပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ရးတၞၚ်သဳ နွံဒၟံၚ်သ္ကုတ်သၟဝ် ပ္ဍဲဗီုတိဍုၚ်ဗၟာ တၞုၚ်အိုတ်ဂှ် စနူဂိတုဨပရဴ တုဲကၠုၚ်တေံတုဲ ပေါဲဗ္တိုက်အကြာဒပ်ကံၚ်ဇြဳပၞာန် ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံ သာသ္ကာတ်မြဟ်ကၠုၚ်တုဲ လ္ပာ်ဂကောံဇြဟတ်ပၠန်ဂတးတံ ဝေၚ်ကၠုၚ်ပၞာန် စဵုကဵုပေါဲဗ္တိုက်သီဗ္ဒိုပ်တံရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ပ္ကောံပ္ကေဝ်ဂွံလဝ်ဂှ်မ္ဂး ပ္ဍဲရးတၞၚ်သဳ ပွိုၚ်ဍုၚ် နွံ ၁၀ ဍုၚ်ဂှ် ပါဲနူပွိုၚ်ဍုၚ်ဗိက်ကဵု ပွိုၚ်ဍုၚ်ကအ်သံၚ်တုဲ သှ်ေပွိုၚ်ဍုၚ် ၈ ဂှ်တှ်ေ ပေါဲဗ္တိုက်တံ သ္ကာတ်မြဟ်ကၠုၚ်ရ။
ဒၞါဲဂကောံဇြဟတ်ပၠန်ဂတးတံ ချဳဒရာၚ်ဇြဟတ်ခိုဟ် ပ္ဍဲပွိုၚ်ဍုၚ်တၞၚ်သဳ၊ ပဠဝ်၊ ကျောန်သု၊ ဘုတ်ပြၚ်း၊ ထဝါဲ၊ တယိတ်ချံၚ်၊ လံၚ်လုၚ် ကေုာံ ပွိုၚ်ဍုၚ်ဍာ်ဗုတံဂှ် ပေါဲဗ္တိုက်တံ သာသ္ကာတ်မြဟ်ကၠုၚ်တုဲ သီဂွံလဝ် ဗ္ဒိုပ်ဒပ်ကံၚ်ဇြဳပၞာန် ဟွံအောန်နူကဵု ၇ ရ။
ဒုသ္ကိုပ်ကရောၚ်ပၞာန် ကရောၚ်ပၞာန်ဖေဝ်ဒရာ ကိုဝ်မေန်ထက်ဂှ် နူစပၠန်ဂတး ပြဟ်ဟ်တေံ ဂကောံရပ်လွဟ်ဒကးပြးဒၟံၚ်တံဂှ် ပ္ကောံပ္ကေဝ်မာန်လဝ်တုဲ ပွမကဵုအမိၚ်တံ မြက်ဇက်ကၠုၚ်တုဲ ထ္မံက်ကၠုၚ်ပေါဲဗ္တိုက်သီဗ္ဒိုပ်တံမာန်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပ္ဍဲအခိၚ်ပၠန်ဂတးပြဟ်ဟ်တေံဂှ် ဂကောံသီုဖအိုတ်ဂှ် ပ္ကောံဟွံမာန်ပုဟ်။ ဗွဲကြဴဏံ ပိုယ်တံသီုဖအိုတ် သီု KNLA ကေုာံ သီု PDF တံ ပံၚ်ကောံတုဲ ကၠောန်ကၠုၚ်မာန်ရ။ ညးဍုၚ်ကွာန်တံ ထံက်ဂလာန်ဂှ်လေဝ် အဓိကဂှ် လ္ပာ်ဒပ်ပၠန်ဂတးပိုယ်တံ ထံက်ပၚ်ကၠုၚ်သြန်လှုဲတံ ဂၠိုၚ်ကၠုၚ်ရ။ ဂၠိုၚ်ကၠုၚ်တုဲ ပိုယ်တံ ပ္ကောံဂွံကၠုၚ် လွဟ်လက်နက်မကမ်တံ တၟာဂလိုၚ်ရ။ ပကောံကၠုၚ်လွဟ်လက်နက်မကမ်တံဗက် လုပ်ကၠုၚ်ပေါဲဗ္တိုက်သီဗ္ဒိုပ်ပိုယ်တံ ဂၠိုၚ်ၚ်မာန်ရောၚ် ထေၚ်ကေတ်ရ” သာ်ဝွံ သ္ဂးရ။
ပေါဲဗ္တိုက်တံ သာသ္ကာတ်မြဟ်ကၠုၚ်ဗက် လ္ပာ်ကံၚ်ဇြဳပၞာန်လေဝ် ညံၚ်ဂွိုအ်ဒးဗလးတဲ ဗ္ဒိုပ်ဒပ်တံဂှ် စဵုဒၞါကၠုၚ် သီုကဵုဒပ်ဍာ်၊ ဒပ်တိုက်၊ ဒပ်ကျာတံတုဲ ကလိလောန်ကၠုၚ် သီုကဵုပရေၚ်ဗ္တိုက်တရဴကျာ စွံပွန် ကုညးဍုၚ်ကွာန်ကောန်အရာပ်တံဂှ်ရ။
ဒပ်ကံၚ်ဇြဳပၞာန် ဒးဒုၚ်သီလဝ် ဗ္ဒိုပ်ဒပ်(ပဲဒက်) မၞုံပွိုၚ်ဍုၚ်တယိတ်ချံၚ် ပ္ဍဲဂိတုမေ ၈ တေံဂှ်ဝွံ ဗ္တိုက်ကၠုၚ်တရဴကျာ စွံပွန်ကုညးဍုၚ်ကွာန်ကောန်အရာပ်တံ သၞာံအဆက်က်တုဲ ညးဒေသကနက်သဳရိ ဟွံအောန်နူကဵု ၅ တၠ ချိုတ်တုဲ ဗ္ဒါဲ ၁၀ တၠ ဇီုကပိုက်ကလိဂွံလဝ်ဝပ်ရ။
မွဲလ္ပာ်ဂှ်ပၠန် ပေါဲဗ္တိုက်တံ သာသ္ကာတ်မြဟ်ကၠုၚ်ဗက် မွဲဒမြိပ်ဂၠံၚ်ဇၞော်ပျဳထံၚ်သုဂှ်လေဝ် ကွဳစက်ဂမၠိုၚ် အာကၠုၚ်ဟွံဂွံတုဲ သၟာပရေၚ်ပိုန်ဒြပ်တံ ဒးဆေၚ်ကၠုၚ်မုက် ကျဗြံတံသၟးဟွံက ညးအာတရဴတံလေဝ် ကၟာတ်ဒးမံၚ် အပ္ဍဲပေါဲဗ္တိုက်တံ နွံဒၟံၚ်ရောၚ် ညးဒေသလံၚ်လုၚ်မွဲတၠ ဟီုလဝ်သာ်ဏံရ။
“ပေါဲဗ္တိုက်တံဂၠိုၚ်တိုန်ကၠုၚ်၊ ပဋိပက္ခဗီုတံဏံ ဂၠိုၚ်တိုန်ကၠုၚ်ဗက် လ္ပာ်ဏံဂှ် ဘဝကဆံၚ်ဒၟံၚ်မၞိဟ်တံ သီုဖအိုတ် သဝ်စှ်ေကၠုၚ်ရ။ ဒှ်ဒၟံၚ်ဗီုပြၚ် မပ္တံကဵုပရေၚ်ပိုန်ဒြပ် ပရေၚ်မၞိဟ်တံသီုဖအိုတ်ဂှ် သဝ်ဒၟံၚ်ရ။ ကွဳစက်တံဂှ်လေဝ် ကၟာတ်ဒးဒၟံၚ်လ္ပာ်ဂှ်ဂှ် တၟာလအ်ရ။ ရံၚ်အာလ္ပာ်သၟာပရေၚ်ပိုန်ဒြပ်တံတှ်ေ တုဲပၠန် ညးအာတရဴတံဂှ်လေဝ် လ္ပာ်ဏံတှ်ေ မၞိဟ်တိုန်ကၠုၚ်နူလ္ပာ်ကအ်သံၚ်တံဂှ်တှ်ေ စဵုကဵုအခိၚ်လၟုဟ် ကၟာတ်ဒးမံၚ် ပ္ဍဲဂၠံၚ်တံဖိုဟ် ဒှ်မံၚ်ဗီုဂှ်ရ။ တုဲပၠန် ကၟာတ်ဒးမံၚ်သၟးဟွံက လၟုဟ်ဂှ် လ္ပာ်ဂှ်ဂှ် ဒှ်မံၚ်အကာဲအရာပရေံကွေံကွေံမွဲတဲတှ်ေ သီုဒးဂွိၚ်မံၚ်ကဵု ဂြာတ်မခတိုဟ်ကဵုက္ၜၚ်ကျာတံဏီရ” သာ်ဝွံ ညးသ္ဂးရ။
သ္အာၚ်နူဂှ်ပၠန် အပ္ဍဲပေါဲဗ္တိုက် ရးတၞၚ်သဳတံဂှ် ဒၞါဲပွန်ပၞာန်ဟွံသေၚ်တံဂှ် ကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာတံ အဆက်က်တုဲ ညးဒေသကွာန်ဂမၠိုၚ်ဝွံ ညာတ်က္ၜၚ်ကျာဗက် ဖေက်ဒၟံၚ်အိုတ်တုဲ ဒှ်ဒၟံၚ်အကာဲအရာ သာ်လဵုမှ ဟွံဂီုကၠီုရပုဟ်ဂှ် ညးဆက်ဟီုရ။
မွဲလ္ပာ်ဂှ်ပၠန် ဟိုတ်နူပေါဲဗ္တိုက်သီဗ္ဒိုပ် ကေုာံ ပၞာန်ထ္ပက် နူဂကောံဇြဟတ်ပၠန်ဂတးတံဂှ်တုဲ ဇၟာပ်ပွိုၚ်ဍုၚ်ဂှ် လၟိဟ်မၞိဟ်ပါဲဒဴဘဲပၞာန် နွံဒၟံၚ်ဂၠိုၚ်ကဵုလ္ၚီတုဲ သွက်ညးပါဲဒဴဘဲပၞာန်တံဂှ် နွံပၟိက်ကၠုၚ်ကဵု ဇွောံမစၞစ ကေုာံ ဂဥုဲဇဗတံ သၠုၚ်တိုန်ကၠုၚ်ရောၚ် ဂွံတီကေတ် အတိုၚ်ဂလာန် ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ပါဲဒဴဘဲပၞာန်တံရ။
အတိုၚ်တၚ်နၚ် ဂကောံသုတေသန FE5 Tanintharyi ဂှ်မ္ဂး ပ္ဍဲရးတၞၚ်သဳဂှ် ညးဍုၚ်ကွာန်ပါဲဒဴဘဲပၞာန် ဟွံအောန်နူကဵု ၅၀၀၀၀ နွံဒၟံၚ်တုဲ ဟိုတ်နူပေါဲဗ္တိုက်လၟုဟ်တံတုဲ အကာဲအရာလၟိဟ်ညးပါဲဒဴဘဲပၞာန် ထပ်သၠုၚ်တိုန်ကၠုၚ်တံ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media