တၞၚ်သဳ၊ မေ ၁၂
ဂိတုမေ ၁၂ အခိၚ်နူဂယးဂှ် သီဂွံလဝ် ကုန်ဗ္ဒိုပ်ကံၚ်ဇြဳပၞာန် ပွိုက် ၁၀၂၀ ပၟိက်ဇၞော်သွက်ပရေၚ်ပၞာန် မၞုံပယျဵုပွိုၚ်ဍုၚ်ဘုတ်ပြၚ်း ကဵု ပွိုၚ်ဍုၚ်တၞၚ်သဳ ပ္ဍဲရးတၞၚ်သဳဂှ် ဂွံတီကေတ် အတိုၚ်ဂလာန် ညးတာလျိုၚ် ဒပ်ပံၚ်ကောံ ဂကောံဇြဟတ်ပၠန်ဂတးတံရ။
ကုန်ဗ္ဒိုပ် ပွိုက် ၁၀၂၀ ဏံဂှ် ဒပ်ပံၚ်ကောံ ဂကောံဇြဟတ်ပၠန်ဂတးတံ စထ္ပက်ပၞာန်ဗ္တိုက်လဝ် ပ္ဍဲဂိတုဨပရဴ ၃၀ တုဲကၠုၚ်တေံတုဲ ဂွံ ၁၂ တ္ၚဲဂှ် သီဂွံလဝ် အလုံဗ္ဒိုပ်မွဲရ။
ကောန်ဒပ်ကံၚ်ဇြဳပၞာန် နူကုန်ဗ္ဒိုပ် ပွိုက် ၁၀၂၀ ဒၞါဲဒပ်ပံၚ်ကောံ ဂကောံဇြဟတ်ပၠန်ဂတးတံ ဗိုၚ်ကၟာတ်လဒဵုလဝ်ဂှ် ဂြိပ်တိတ်အာနူဗ္ဒိုပ် သီုဖအိုတ်တုဲ သီဂွံလဝ်ပေၚ်ၚ်မဒှ်ရ။
အခိၚ်လၟုဟ် ကုန်ဗ္ဒိုပ် ၁၀၂၀ ဂှ် ဒပ်ပံၚ်ကောံ ဂကောံဇြဟတ်ပၠန်ဂတးတံ ၚးတးပသောၚ်ဒၟံၚ်တိဍာ်ဂှ်ရ ခြာဟွံလအ် လလောၚ်ပ္တိတ်ကဵု ဗွဲလစှ်ေဏောၚ်ဂှ် သ္ဂးရ။
ကုန်ဗ္ဒိုပ် ၁၀၂၀ ဝွံ နွံဒၟံၚ် လ္တူဂၠံၚ်ကွဳစက် ဗိက်−ဘုတ်ပြၚ်း−ကအ်သံၚ် မဒှ်သ္ကုတ်ဂၠံၚ်ပျဳထံၚ်သုဂှ်တုဲ သွက်ကံၚ်ဇြဳပၞာန်ဂှ် ဒှ်ဗ္ဒိုပ်ပၟိက်ဇၞော် လ္ဂောံကဵုပရေၚ်ပၞာန်မွဲလေဝ် မဒှ်ရ။
ညံၚ်ကုန်ဗ္ဒိုပ်ဏံ ဂွိုအ်စှ်ေအာဂှ် လ္ပာ်ကံၚ်ဇြဳပၞာန် ဗလးလဝ်ကဵု ကရောၚ်ပၞာန်ကဵုအရီုဗၚ်တံကီုလေဝ် ဟိုတ်နူဒပ်ပံၚ်ကောံ ဂကောံဇြဟတ်ပၠန်ဂတးတံ လုပ်ကြတ်ဗ္တိုက်အကြာတုဲ ဗီုပြၚ်ဒက်ပ္တန်လီုအာတုဲ ဒးဆုတ်ကလေၚ်လဝ်ဒပ်ရောၚ် ဂွံတီကေတ်ရ။
အတိုၚ်တၚ်နၚ် နူသြၚ်လောန်တိုၚ်(မ်) ပ္ကောံပ္ကေဝ်ဂွံလဝ်ဂှ်မ္ဂး ပ္ဍဲရးတၞၚ်သဳ အပ္ဍဲသၞာံဏံ ဒပ်ပံၚ်ကောံ ဂကောံဇြဟတ်ပၠန်ဂတးတံ သီဂွံလဝ် ဗ္ဒိုပ်ဒပ်ကံၚ်ဇြဳပၞာန် စဵုကဵု ၈ ရ။
ပရိုၚ်−သြၚ်လောန်တိုၚ်(မ်)
ဗီု−Black PDF