သဓီု၊ မေ ၁၂
တွဵုရးဍုၚ်မန် ပွိုၚ်ဍုၚ်သဓီု ကွာန်နံၚ်ဗိုဝ် သ္ကုတ် (အနန်းကုန်း) ပ္ဍဲဝါခဠာတ် သၟတ်ဗြဴမွဲတၠ ဒးဒုၚ်ဂစိုတ်လဝ်ရောၚ် ညးတာလျိုၚ် ဂကောံဟံၚ်ပြာ်မှာဇန်တံကဵု ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂွံဆဵုကေတ်လဝ် မမိုဝ်နန္ဒာထောန် အာယုက် ၂၄ သၞာံ ကောန်ကလောန်ဝိုၚ် (အန်ဂလုံး) ချိုတ်ဒၟံၚ် ပ္ဍဲဝါခဠာတ် နကဵုဘဲဝပ်ထ္ပက်လဝ်ဂမၠိုၚ်ရ။
အခိၚ်ဂွံကလေၚ်ဆဵုကေတ်ဇွ မမိုဝ်နန္ဒာထောန်ဂှ် ချိုတ်ဒၟံၚ်နကဵုဝပ် ထ္ပက်လဝ်ပ္ဍဲစးဂှ်မွဲတဲ၊ နော်တဲပုၚ် စာ်ထောၚ်၊ နော်တဲပါဲ ဒးဒုၚ်ထ္ပက်လဝ်တံဂှ်ကီု၊ သီုကဵုဒးလဝ်ဝပ်ပ္ဍဲတဲပါဲ၊ ဒးဒုၚ်ထ္ပက်လဝ် သြိုဟ်လ္ပာ်ပါဲတံ မဒှ်ရ။
အတိုၚ်ဂလာန်ညးဒေသတံဂှ်မ္ဂး မမိုဝ်နန္ဒာထောန်ဝွံ ညးဒေသသဓီုဟွံသေၚ် ကၠုၚ်နူတွဵုရးသေံ ကၠောန်ဒၟံၚ်ကလောန် ပ္ဍဲဝိုၚ်အာဝါဒေ အာန်ဂလုံတံဂှ်တုဲ မူဟိုတ်ဂွံဒးဒုၚ်ဂစိုတ်ရောဟီုဂှ် ဟွံဂွံတီကေတ်ပုဟ်ဂှ် သ္ဂးရ။
ဇွရုပ် မမိုဝ်နန္ဒာထောန် ချိုတ်အာလဝ်ဂှ် ပလံၚ်ဗစိုပ်ကဵုလဝ် ဇရေၚ်ရုၚ်ဂဥုဲပွိုၚ်တိုက် ဒုၚ်ဇယိတ် နကဵုအရီုဗၚ်ဂကောံဟံၚ်ပြာ်မှာဇန်တံဂှ် ဂွံတီကေတ်ရ။
ကွာန်နံၚ်ဗိုဝ် သ္ကုတ်(အနန်းကုန်း)ဂှ် ကၠောန်ဒၟံၚ်ဝိုၚ်ဝေၚ်အာဝါဒေတံ လအ်ကဵုဂိတုယျတုဲ ပ္ဍဲဂိတုမေ သတ္တာဟပထမဂှ်လေဝ် ဗ္ဒါဲခုၚ်ဝိုၚ်ဝေၚ်ဂှ် ဟိုတ်နူမာၚ်ဗ္တိုဟ်ထ္ကးအာတုဲ ရဲကၠုၚ်ဝိုၚ်ဝေၚ်လ္ၚဵု ဇီုကပိုက်ကလိဂွံလဝ်ဝပ်ရ။
တုဲကၠုၚ် ပ္ဍဲဂိတုမာတ် ၃၀ တေံဂှ်လေဝ် ကွာန်နံၚ်ဗိုၚ် လက္ကရဴဆေၚ်ဍာ်လက်ဖက် (အကောင်းကြိုက်) သ္ကဲဂၠံၚ်အာကျာ်သက္ကဂှ် တၠကမၠောန်ဖဴဍိုတ်မွဲတၠ ဒးဒုၚ်ဂစိုတ်လဝ်တုဲ ဒဵုကဵုအခိၚ်လၟုဟ် ရပ်မၞိဟ်တၠဒုဟ်ဟွံဂွံဏီပုဟ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ