မတ်မလီု၊ မေ ၁၂
ဒဒန်ကြုၚ်အုက် နွံဒၟံၚ်လ္တူဂၠံၚ်ကွဳစက် လ္ဂုၚ်−မတ်မလီု ပ္ဍဲကွာန်ယှိုဲယျံၚ်ပျ ပယျဵုပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ် ထပ်ဒးဒုၚ်ဗ္တိုဟ်မာၚ်တုဲ ပရေၚ်ကပေါတ်ဗၞိက်ဂေတ်ဂြိပ် ဒေသသ္ကုတ်သၠုၚ်ကျာ ဒေါအ်ဒေၚ်အာယျဂှ် တၠကမၠောန်ပရေၚ်ပိုန်ဒြပ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒဒန်ကြုၚ်အုက်ဝွံ ပ္ဍဲဂိတုမေ ၁၁ အခိၚ်နူဂယး ၜိုတ် ၄ နာဍဳဂှ် ဒးဒုၚ်ဗ္တိုဟ်လဝ်မာၚ်တုဲ သီုကဵုဒဒန်ကောန်ကရေတ်သှ်ေဒၟံၚ်မွဲကရေက် ကၠာတေံဂှ်ကီု သီုကဵုဒဒန်ကလေၚ်ပလေဝ်လဝ်တၟိ ဒဒန်ဘေလဳ သီုၜါတၞုၚ် သရိုဟ်စှ်ေလီုလာ်အာတုဲ ဂၠံၚ်ဍာန်ဆက်စၠောံ ပိုတ်အာရ။
ဒဒန်ဏံဝွံ နွံဒၟံၚ် လ္တူဂၠံၚ်ကွဳစက် လ္ဂုၚ်−မတ်မလီုတုဲ သီုကဵုဒှ်ဂၠံၚ် ဒးရပ်စပ်ဒၟံၚ်အဓိက ပ္ဍဲအရာအာကၠုၚ်တရဴကီု၊ ပ္ဍဲအရာပလံၚ်ကပေါတ်ဗၞိက် ဒေသတၞၚ်သဳ၊ တွဵုရးကရေၚ်၊ တွဵုရးဍုၚ်မန် ဒေသသ္ကုတ်သၠုၚ်ကျာ ဍုၚ်ဗၟာဂှ်ရ။
ဟိုတ်နူဒဒန်ကြုၚ်အုက် သရိုဟ်စှ်ေလီုလာ်အာလဝ်တုဲ ကပေါတ်ဗၞိက်တိတ်နူဒေသသ္ကုတ်သၠုၚ်ကျာတံဂှ် ပလံၚ်ပ္တိုန်ဟွံဂွံရတုဲ ကပေါတ်ဗၞိက်နူဒေသတၞဟ်ဟ်တံဂှ်လေဝ် မ္ၚးနူကဵုပၠောပ်ပ္တိုန်ဟွံဂွံဂှ် ပရေၚ်အာကၠုၚ်တရဴတံလေဝ် ဒေါအ်ဒေၚ်အာယျဂှ် ဂွံတီကေတ်ရ။
တၠကမၠောန်ပရေၚ်ပိုန်ဒြပ်မွဲတၠဂှ် ဒဒန်ကြုၚ်အုက် နွံဒၟံၚ် လ္တူဂၠံၚ်ပျဳထံၚ်သုဂှ် လီုအာတုဲ စပ်ကဵုပရေၚ်ကပေါတ်ဗၞိက်ဇွောဝ်စှ်ဂှ်ေတှ်ေ ပရေၚ်ဇီုကပိုက်ဇၞော်ဇၞော် နွံကၠုၚ်မာန်တုဲ ၚုဟ်ဖျာတံ ထပ်သၠုၚ်တိုန်ကၠုၚ်မာန်ရောၚ် ဟီုရ။
“ညအ် လီုယျတှ်ေ တၚ်နွံပၟိက် မွဲမွဲတ္ၚဲဂှ် ဟွံအောန်ပုဟ်။ ကပေါတ်ဗၞိက်တံဂှ် ဟွံအောန်ပုဟ်ဟီုတှ်ေ အရာတံဏံ ပိုတ်သ္ကုတ်အာမ္ဂး ဒှ်ဒဒိုက်တၟာဂလိုၚ်ဏောၚ်လေဝ်။ ဒၞါဲဏံ ဝါတ်ဂှ်တှ်ေ ဂၠံၚ်ကရတ်ဟွံမွဲပုဟ်။ ကလေၚ်ပလေဝ်မ္ဂးလေဝ် အောန်အိုတ် ၜိုတ်မွဲသတ္တာဟ လအ်မာန်ဏောၚ်ဂှ် အဲထေၚ်ကေတ်ရ။ ထ္ပက်ဒဒန် ဘေလဳတံမ္ဂးလေဝ် ၜိုတ်မွဲသတ္တာဟဂှ် လအ်ဏောၚ်။ ဗီုလဵုဒှ်ဒှ် ဗၞိက်တံဂှ်တှ်ေ ၜိုတ်မွဲသတ္တာဟဂှ် ကြေပ်ဂြတ်ဏောၚ်။ ၚုဟ်ဗၞိက်ဖျာတံ တိုန်အာဏောၚ်၊ ဗၞိက်နွံတံဂှ်လေဝ် ပိုတ်သ္ကုတ်ဏောၚ်ဟီုမ္ဂး ၚုဟ်ဂှ် တိုန်တွဵုရဏောၚ်” သာ်ဝွံ သ္ဂးရ။
ဒဒန်ကြုၚ်အုက်ဝွံ ပ္ဍဲအရာပလံၚ်ပ္တိုန် ပၠောပ်ကပေါတ်ဗၞိက် ဒေသသ္ကုတ်သၠုၚ်ကျာဂှ် ဒှ်ဂၠံၚ်အဓိကမွဲတုဲ ကသၞေဝ်ကေဝ် အုဲအေၚ်လောဲ ကပေါတ်ဗၞိက်တံဏံဂှ်တှ်ေ ပရေၚ်ဇီုကပိုက်ဇၞော်မာန်တုဲ ကပေါတ်ဗၞိက်တၞဟ်ဟ်တံလေဝ် အခိၚ်လအ်လမာန်ရောၚ် ညးဆက်ဟီုရ။
တၠကမၠောန်ယာန်မွဲတၠဂှ်လေဝ် ဟိုတ်နူဒဒန်လီုအာတုဲ လၟေၚ်တရဴတံ လဇုဲလဇ လအ်လ ဒးက္တဵုဒှ်ဒၟံၚ်တုဲ ယဝ်ရပလေဝ်ဒဒန် ဗွဲမဂတာပ်အခိၚ် ဟွံမာန်မ္ဂး ကပေါတ်ဗၞိက်ဂေတ်ဂြိပ် လဇုဲလဇဏောၚ်တုဲ လၟေၚ်တရဴတံလေဝ် ဒးဒေါအ်အာဏောၚ်ဂှ် ဟီုရ။
“ ဒှ်အခက်အခုဲဂှ်တှ်ေ ရဲအာတရဴတံ အခိၚ်လအ်လဏောၚ်။ ကွဳစက်တံဂှ် ကၟာတ်ဒၟံၚ် ဒဵုကဵုအခိၚ်လၟုဟ်ဟီုတှ်ေ ညးအာတရဴဂှ်နွံ။ ကပေါတ်ဗၞိက်တံဂှ်လေဝ် လဇုဲလဇလအ်လတံ ဒှ်ဏောၚ်။ အခိၚ်လအ်ဏောၚ်ဟီုမ္ဂး အကာဲအရာဂှ်တှ်ေ ပရေံအာကွေံကွေံဏောၚ်။ ဂၠံၚ်ဍာန်ပလံၚ်ဗစိုပ်တံ ပိုတ်အိုတ်တုဲ ကပေါတ်ဗၞိက်ဂေတ်ဂြိပ်ဂှ် လဇုဲလဇအိုတ်ဏောၚ်။ ညးအာတရဴတံဂှ်တှ်ေ ဒးဒေါအ်ဒေၚ် ပရေၚ်အာကၠုၚ်တံဏောၚ်။ ၜိုတ်ဏံဂှ် ညာတ်လဝ်ရ။ လဇုဲတှ်ေ ၜိုတ်လဇုဲဂှ် ညးအာတရဴတံကဵု ကပေါတ်ဗၞိက်တံ ဒှ်ဒဒိုက်ဏောၚ်” သာ်ဝွံ သ္ဂးရ။
ဒဒန်ကြုၚ်အုက်လီုတုဲ တတ်ကၠောံဟွံဂွံဂှ်ရ ဒးပလီုလဝ် လၟေၚ်တရဴသီုဖအိုတ်တုဲ ကုညးအာတရဴတံကဵု ရဲပလံၚ်ကပေါတ်ဗၞိက်တံဂှ်တှ်ေ ဒးကလေၚ်ကဵုလှုဲတံ၊ ကလေၚ်အပ်ကပေါတ်တံဂှ် ဒးကၠောန်ကဵုဒၟံၚ်ရောၚ် ညးဆက်ဟီုရ။
ဒဒန်ကြုၚ်အုက်ဂှ် သၞာံတုဲကၠုၚ် ပ္ဍဲဂိတုဂျောန် ၂၉ တေံဂှ်လေဝ် ဒပ်ပံၚ်ကောံ KNLA တံ ဗ္တိုဟ်ထ္ကးလဝ်မာၚ်တုဲ ဒဒန်မွဲကရေက် သရိုဟ်စှ်ေအာတုဲ အခိၚ်ဒဒန်သရိုဟ်စှ်ေအာဂှ် ကွဳစက်ၜါဖ္ဍိုက် ဒတုံစှ်ေအာလဝ် သၟဝ်ဒဒန်ဂှ်ရ မၞိဟ်ချိုတ်အာလေဝ် နွံလဝ်ရ။
ကြဴနူဂှ်တုဲ ဒပ်ပံၚ်ကောံ ကံၚ်ဇြဳပၞာန် ကၠုၚ်စိုပ်စၟဳတ် အခိၚ်ဒဒန်သရိုဟ်ဂှ်လေဝ် ထပ်ဒးဒုၚ်ဗ္တိုက်လဝ်တုဲ သၞာဲဒဴၜါတၠ ချိုတ်အာလဝ်တုဲ သ္ကိုပ်ဍုၚ်ဒပ်သဓီု ကေုာံ သၞာဲဒဴကဆံၚ်ဇၞော်ဇၞော်ဂမၠိုၚ် မပါလုပ် သၞာဲဒဴနူဌာနမဆေၚ်စပ် ဗ္ဒါဲ ၃၀ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ