မတ်မလီု၊ မေ ၁၂
အပ္ဍဲကာလသီအဝဵု ပွိုၚ်ပိသၞာံပြၚ်ဏံ အလုံဍုၚ်မွဲ ဗ္ဒါဲ ၉၀ ပွိုၚ်ဍုၚ် ဒးဒုၚ်ထပိုတ်လဝ် လာၚ်ဖုၚ် ကေုာံ လာၚ်အေန်တာနိတ်တံရောၚ် ဂွံတီကေတ် အတိုၚ်တၚ်နၚ် နူကဵုဂကောံ(အသံ) လလောၚ်ပ္တိတ်လဝ်ရ။
အတိုၚ်တၚ်နၚ် ဂကောံ(အသံ) ဂှ်မ္ဂး နူ ၂၀၂၁ စဵုကဵု ၂၀၂၄ ဂိတုမာတ်အိုတ် ပါဲနူလ္ဂုၚ်ကဵု နေဗျဳဒဝ်တုဲ ရးဒေသသှ်ေတံကဵု တွဵုရးတံဂှ်တှ်ေ ဒးဒုၚ်ထပိုတ်လဝ် လာၚ်ဖုၚ်ကဵု လာၚ်အေန်တာနိတ်တံတုဲ ပ္ဍဲကဵုဏံ ရးသက်ကိုၚ်ကဵု တွဵုရးရခေၚ် ဂၠိုၚ်အိုတ် မဒှ်ရ။
ပ္ဍဲကဵုဒးဒုၚ်ထပိုတ်လဝ် လာၚ်ဖုၚ်ကဵု လာၚ်အေန်တာနိတ်တံဂှ် နူရးသက်ကိုၚ်ဂှ် ၂၇ ပွိုၚ်ဍုၚ်၊ နူရခေၚ်ဂှ် ၁၇ ပွိုၚ်ဍုၚ်၊ နူရးသေံဂှ် ၉ ပွိုၚ်ဍုၚ်၊ ကချေၚ်ဂှ် ၈ ပွိုၚ်ဍုၚ်၊ ကရေၚ်ဍာဲဂှ် ၅ ပွိုၚ်ဍုၚ်၊ နူဗဂေါဂှ် ၃ ပွိုၚ်ဍုၚ်၊ နူရးမဂွဵုကဵု ရးတၞၚ်သဳဂှ် ၄ ပွိုၚ်ဍုၚ်စၟအ်အ် မဒှ်တုဲ တွဵုရးဍုၚ်မန်၊ ဨရာဝတဳ ကေုာံ ရးမာန္တလေဝ်တံဂှ် မွဲပွိုၚ်ဍုၚ်စၟအ်အ် အပံၚ်ဖအိုတ် စဵုကဵု ၈၇ ပွိုၚ်ဍုၚ် ပါလုပ်ရ။
ဟိုတ်ဍေံဂှ်တှ်ေ ပ္ဍဲဒေသပေါဲဗ္တိုက်သ္ကာတ်မြဟ်တံဂှ် ဒပ်ပၞာန်ဗၟာ ရပ်စပ်ဗျူဟာထပိုတ်ပန်ထပိုတ်ဂှ်တုဲ သွက်ဂွံကၟာတ်လဒဵု တၚ်နၚ်ပရိုၚ်ဇွောဝ်စှ်ေ ဇရေၚ်ညးဍုၚ်ကွာန်ဒေသတံမာန်၊ သွက်ဂွံထပိုတ် ဒဒှ်မဆက်စပ်ကဵု ကမၠောန်ပၠန်ဂတးတံဂှ် ဍဵုဍိုက်ဒၟံၚ် နကဵုတၚ်ရန်တၟံနွံနွံရောၚ် ဂကောံ(အသံ) သ္ဂးလဝ်ရ။
မွဲလ္ပာ်ဂှ်ပၠန် တိုၚ်တာဝါပရေၚ်ဆက်စၠောံတံ ဂွံဂေတ်ဂြိပ်မာန်ဂှ် ဟိုတ်နူကၠေၚ်စက်ပိုတ်ဒၟံၚ်ဂှ်ရ လာၚ်ဖုၚ်ကဵု လာၚ်အေန်တာနိတ် ပိုတ်ဒၟံၚ်တံ နွံတုဲ ဂွံကံက်စရၚ်သၟတ်ဒေသတံ ဂွံလုပ်ပၞာန် ဟွံဗဗွဲဓဝ်ဂှ်တုဲ ထပိုတ်လဝ်လာၚ်ဖုၚ်၊ လာၚ်အေန်တာနိတ်ရ။
ညးတာလျိုၚ် ဂကောံ(အသံ) မွဲတၠဂှ် ထပိုတ်ထောံ လာၚ်ဆက်စၠောံတံဂှ်ဝွံ ဒှ်လွဟ်ဂစိုတ်မၞိဟ်ကံၚ်ဇြဳပၞာန်တံ သ္ၚိတ်တ်မွဲရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ထပိုတ်ထောံ သီုအေန်တာနိတ် သီုလာၚ်ဆက်စၠောံတံဂှ်တှ်ေ လွဟ်ဂစိုတ်မၞိဟ်သ္ၚိတ်တ်မွဲရဏောၚ်ဂှ် နကဵုအဲ ဒုၚ်ဂိုၚ်ကေတ်ရ။ ဟိုတ်ဂှ်ရ ပိုယ်တံ သ္ပစၟတ်သမ္တီ ချိုတ်တ်ပၠိုတ်တ်တုဲ စၟဳတ်တၚ်နၚ်ဂမၠိုၚ်တုဲ ကံက်လဝ်ရ။ မူဟိုတ်ရောဟီုတှ်ေ ပ္ဍဲဒေသဒးဒုၚ်ထပိုတ်လဝ်ဂှ်ဝွံ ပွပကီုပရာပ်တံ၊ ပွဂစိုတ်ကမၠက်ဂကူမၞိဟ်တံဂှ် ကလိလောန်ဒၟံၚ် အဆက်က်ရောၚ် ဂွံဆဵုကေတ်ရ။ အေ ဂှ်တှ်ေ အရာတံဏံဂှ် ညံၚ်ပရိုၚ်ဇွောဝ်စှ်ေ ဟွံဂွံစိုပ် ဗွဲမပြဟ်၊ တၚ်နၚ်တံဏံ ညံၚ်ဂွိုအ်စိုပ် ဍုၚ်သ္အာၚ်ဂမၠိုၚ်၊ ညးဍုၚ်ကွာန်ရေၚ်သ္ကအ် ညံၚ်လှာဲဂတးညးသ္ကအ်ဟွံဂွံ နကဵုတၚ်ရန်တၟံဗွဲမဂၠိုၚ်ဂၠေၚ် ဍေံတံ(စကစ) ထပိုတ်ဒၟံၚ်ရ” သာ်ဝွံ သ္ဂးရ။
နဒဒှ်ဖဵုအဆက်လက္ကရဴဂှ်တှ်ေ ညးဒေသ နူဒေသထပိုတ်လဝ် လာၚ်ဖုၚ်၊ လာၚ်အေန်တာနိတ်တံ ပ္ဍဲအရာရေၚ်တၠုၚ်ကမၠောန်ကၟိတ်တံဂှ် ဒးဂဗဒၟံၚ်အခက်အခုဲတုဲ ပရိုၚ်ဇွောဝ်စှ်ေအပ္ဍဲဒေသ ဒေါအ်ဒေၚ်တုဲ လၟေၚ်ဒဒှ်တ္ၚဲ ဒးဂွိၚ်ဒၟံၚ်ကဵု ပရေၚ်ဗ္တိုက်တရဴကျာ ဒပ်ပၞာန်ဏောၚ်ဂှ် ဂကောံ (အသံ) သ္ဂးရ။
ညးမကဵုဒၟံၚ်အရီုဗၚ် ညးပါဲဒဴဘဲပၞာန်မွဲတၠ နူရးသက်ကိုၚ် ဒၞါဲပၠန်ဂတးရပ်လွဟ် ကုသၞောတ်တၠအဝဵုပၞာန် ဇြဟတ်ခိုဟ်မွဲဂှ် ဟိုတ်နူဒးဒုၚ်ထပိုတ်လဝ်အေန်တာနိတ်တုဲ ပ္ဍဲပရေၚ်ရီုဗၚ်ဟံၚ်ပြာ်တံကဵု ပရေၚ်ဂီုကၠီုညးဒေသတံဂှ် အခက်အခုဲနွံဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“စပ်ကဵုထပိုတ်လဝ်အေန်တာနိတ်လၟုဟ်တုဲ ရဲရီုဗၚ်ဟံၚ်ပြာ်ပိုယ်တံကီု တုဲတှ်ေ အကာဲအရာက္တဵုဒှ်ဒၟံၚ်ပ္ဍဲဍုၚ်တံဂှ် ဟွံဂွံတီကေတ် ဗွဲမဂတာပ်အခိၚ်တုဲ ဒှ်ဒၟံၚ်ညံၚ်ရဴဒလုလဝ်ပရိုၚ်ရ။ ဂွံဂွံလာၚ်ဂှ်တှ်ေ ဒးအာသုၚ်စောဲ မွဲမွဲဒၞါဲ ဟွံသေၚ်မ္ဂး ဒးအာသုၚ်စောဲ ဒၞါဲသတာလေတ်(ခ်) နွံတံဂှ်ရ။ ပရေၚ်ဇီုကပိုက်ဂှ်လေဝ် နွံတၟာဂလိုၚ်ရ။ အကာဲအရာပရေၚ်ဍုၚ်ကွာန် က္တဵုဒှ်ဒၟံၚ် ပ္ဍဲဗလးတိဂှ် ဟွံဂွံတီကေတ် ဗွဲမဂတာပ်အခိၚ်တုဲ ညးပါဲဒဴဘဲပၞာန်တံတှ်ေ ထောံမခတိုဟ်ကဵုက္ၜၚ်ကျာတံ ကရောၚ်ပၞာန်လုပ်ကၠုၚ်တံဂှ်ဟီုမ္ဂး ဒးဒုၚ်ဂစိုတ်ဂယိုၚ်ကီု ဒးဂြိပ်ဒဴကီု ပရေၚ်ဒစးဒုၚ်စဵုဒၞါမုမွဲမှ ကလိဂွံဟွံမာန် အခက်အခုဲတံဏံ နွံရ” သာ်ဝွံ သ္ဂးရ။
ဂကောံ(အသံ) ဂှ်တှ်ေ ပ္ဍဲဒေသပေါဲဗ္တိုက်က္တဵုဒှ်တံဂှ် ဟိုတ်နူထပိုတ်လဝ် လာၚ်ဖုၚ်၊ လာၚ်အေန်တာနိတ်ဂှ်ရ နကဵုညးပါဲဒဴဘဲပၞာန်တံလေဝ် အဆက်ပိုတ်ဒၟံၚ် ကုတၠဒါန် ရီုဗၚ်ဒၟံၚ်ညးတံဂှ်တုဲ ပရေၚ်ထံက်ပၚ်ဇွောံမတံ ကလိဂွံဟွံမာန် ဒှ်ဒၟံၚ်ရောၚ်သ္ဂးရ။
သ္အာၚ်နူဂှ်ပၠန် အခိၚ်ကာလပၠန်ဂတးလအ်ကၠုၚ်ဗက် ပ္ဍဲဒေသဗွဲမဂၠိုၚ်ဂှ် ပရေၚ်ပိုန်ဒြပ်၊ ကမၠောန်ပရေၚ်တဵုလွဳတံ ဂွံဂေတ်ဂြိပ်လၟေၚ်ၚ်မာန်ဂှ် ဟွံလောဲသွာရတုဲ ညးဒေသဗွဲမဂၠိုၚ်ဝွံ ဒးဒတူလိုၚ်ဒၟံၚ် နကဵုသြန် ကောန်ဇာတ်ကၠောန်ဒၟံၚ်ကလောန် ပ္ဍဲဍုၚ်သေံ၊ ဍုၚ်မလေဝ်တံ ပလံၚ်နၚ်တံဂှ် အဓိကရောၚ် ထ္မံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ