ဗြဝတဳ၊ မေ ၁၄
ကောန်ဒပ်ကံၚ်ဇြဳပၞာန်ၜါတၠ သၟဝ်တဲၝောံဒပ် ၅၅ ပါလုပ်ပ္ဍဲကရောၚ်ပၞာန်အံၚ်ဇေယျ ကဆံၚ်ကၟိန်ဍုၚ် အာစိုပ်ကဵုအရီုဗၚ်ပၞာန် ဍုၚ်ဗြဝတဳ တွဵုရးကရေၚ်ဂှ်ဝွံ လုပ်စိုပ်ဖျေံကၠုၚ်လွဟ် သီုလွဟ်လက်နက်မကမ်ဂမၠိုၚ်ရောၚ် ဂွံတီကေတ် အတိုၚ်တၚ်လလောၚ်တြး ကရောၚ်ပၞာန်ကၠဗုရ။
ကောန်ဒပ်ကံၚ်ဇြဳပၞာန်ၜါတၠ နူၝောံဒပ် ၅၅ ဂှ်ဝွံ ကေတ်နၚ်လွဟ်လက်နက်တုဲ ပ္ဍဲဂိတုမေ ၁၂ ဂှ် လုပ်စိုပ်ဖျေံလဝ်လွဟ် ဇရေၚ်ဒပ်ပံၚ်ကောံ ဂကောံဇြဟတ်ပၠန်ဂတးတံတုဲ စ္ၜုဲစ္ၜော်ကၠုၚ် ဇရေၚ်ဂၠံသြိုဟ်ညးဍုၚ်ကွာန်တံရဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ညးမကၠုၚ်စိုပ်စ္ၜုဲစ္ၜော်ကၠုၚ်ဇရေၚ်ညးဍုၚ်ကွာန်တံ သီုကဵုလွဟ်လက်နက်မကမ် ဍိုက်က်ပေၚ်ၚ်တံဂှ် ဒုၚ်ဒၟံၚ်တၠုၚ်လၟိုန်ရောၚ် ကရောၚ်ပၞာန်ကၠဗု ဒပ်စြေက် ၁ လေဝ် လလောၚ်ပ္တိတ်ကဵုလဝ်သမ္တီရ။
ပ္ဍဲဂိတုမေတုဲကၠုၚ်တေံ ပြဟ်ဟ်ဂှ်လေဝ် ကောန်ဒပ်ကံၚ်ဇြဳပၞာန်ပိတၠ ဝေၚ်ဒၟံၚ်ပၞာန် အပ္ဍဲပွိုၚ်ဍုၚ်ကအ်ကြိက် တွဵုရးကရေၚ်ဂှ်ဝွံ လုပ်စိုပ်ဖျေံကၠုၚ်လွဟ် သီုကဵုလွဟ်လက်နက်မကမ်တံဂှ်ရ ပအပ်ပြာပ်ဖျေံကဵုလဝ်လာပ်ရောၚ် ဂွံတီကေတ် အတိုၚ်တၚ်လလောၚ်တြးဂှ်ရ။
ဒပ်သၟဝ်တဲကံၚ်ဇြဳပၞာန် ပါလုပ်ဒၟံၚ် ပ္ဍဲပရေၚ်ပၞာန်အံၚ်ဇေယျ ကဆံၚ်ကၟိန်ဍုၚ်ဂှ်ဝွံ စနူဂိတုဨပရဴ သတ္တာဟပထမတုဲကၠုၚ်တေံတုဲ နူသဓီု၊ ဘာအၚ်၊ မတ်မလီုမွဲကဆံၚ် ထ္ပက်ကၠုၚ်ဒၟံၚ်ပၞာန် လ္ပာ်ဍုၚ်ကအ်ကြိက်၊ ဍုၚ်ဗြဝတဳရ။
ကရောၚ်ပၞာန်ကံၚ်ဇြဳပၞာန် ကဆံၚ်ကၟိန်ဍုၚ် ကၠုၚ်စိုပ်ကဵုအရီုဗၚ်ပၞာန် ကုဍုၚ်ဗြဝတဳဂှ်ဝွံ စဵုကဵုလအ်ကၠုၚ်ပွိုၚ်မွဲဂိတုပြၚ်ဂှ် ဟွံစိုပ်ကၠုၚ် ဍုၚ်ဗြဝတဳဏီတုဲ စိုပ်ဒၟံၚ်သၟဝ်ကျာဍုၚ်ကအ်ကြိက်ကဵု သ္ကုတ်လ္တူဍာ်လဂေါဝ်တဝ်နဝ် မၞုံဂၠံၚ်ဇၞော်အာယှဂှ်ရောၚ် ဂွံတီကေတ် နူကဵုတမ်ရိုဟ်ပရိုၚ်ပရေၚ်ပၞာန်တံရ။
ဒပ်ပံၚ်ကောံပၠန်ဂတး သၟဝ်ပၠတရဴ KNLA တံ ကြတ်ဗ္တိုက်လဝ် ကရောၚ်ပၞာန်သၟဝ်တဲ ၝောံဒပ်ကံၚ်ဇြဳပၞာန် ၅၅ ပါလုပ်ဒၟံၚ် ပ္ဍဲပရေၚ်ပၞာန်အံၚ်ဇေယျဂှ်ရ ဒပ်ကံၚ်ဇြဳပၞာန်ဝွံ ဇီုကပိုက်ဒးလဝ်ဂၠိုၚ်တုဲ သီုယာန်စၚ်ခြပ်ပသဲ မပါလုပ် ယာန်အရပ်စပ်ပၞာန်တၞဟ်ဟ်တံလေဝ် ဇီုကပိုက်လီုလာ်အာတံ နွံလဝ်ရ။
အခိၚ်လၟုဟ် ကရောၚ်ပၞာန်အရီုဗၚ် ဒးဇီုကပိုက်ကၠုၚ် သာဂၠိုၚ်ကၠုၚ်ဒၟံၚ်ဂှ်ရ ပ္ဍဲပရေၚ်ပၞာန်အံၚ်ဇေယျဂှ် ဗပေၚ်စုတ် တမ်ဒပ်လ္ၚဵု သၟဝ်တဲၝောံဒပ် ၇၇ ဂှ်တုဲ ဂလိုၚ်ပ္တိုန်ဒၟံၚ်ဇြဟတ်ဒပ်တံရောၚ်ဂှ်လေဝ် ဂွံတီကေတ် နူတမ်ရိုဟ်ပရိုၚ်ပရေၚ်ပၞာန်တံရ။
ပရိုၚ်−သြၚ်လောန်တိုၚ်(မ်)
ဗီု−ကရောၚ်ပၞာန်ကၠဗု