ၜဳကလေၚ်၊ မေ ၁၄
ဒဒန်ကြုက်အုက် ဗ္ဒါဲကွာန်ယှိုဲယံၚ်ပျ ပွိုၚ်ဍုၚ်ၜဳကလေၚ် ပ္ဍဲတွဵုရးဍုၚ်မန် ဒးဒုၚ်ဗ္တိုဟ်ထ္ကးမာၚ်တုဲဂှ် ဒပ်ကံၚ်ဇြဳပၞာန် ပန်လဝ်လွဟ်ဇၞော် ကြာန်န်တုဲ ကောန်အရာပ် ၃ တၠ ချိုတ်တုဲ ၁၂ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်ဂလာန်ညးဒေသတံရ။
ပ္ဍဲဂိတုမေ ၁၁ အခိၚ်နူဂယး ၜိုတ် ၂ နာဍဳဂှ် ဒပ်ပံၚ်ကောံ ဂကောံဇြဟတ်ပၠန်ဂတးတံ ပစူမာၚ်ဗ္တိုဟ်လဝ် ဒဒန်ကြုၚ်အုက်ဂှ်တုဲ ဒဒန်ကောန်ကရေတ်သှ်ေဒၟံၚ်ကၠာတေံ မွဲကရေက်ဂှ်ကီု ဒဒန်ကလေၚ်ပလေဝ်လဝ်တၟိ ဒဒန်ဘေလဳ သီုၜါတၞုၚ် သရိုဟ်စှ်ေလီုအာလဝ်ရ။
စပ်ကဵုဒဒန်ကြုၚ်အုက် ဒးဒုၚ်ဗ္တိုဟ်ထ္ကးဂှ်တုဲ ပ္ဍဲကဵုတ္ၚဲဂှ် အခိၚ်နူဂယး ၜိုတ် ၅ နာဍဳ နူဒပ်အမၠံက်ကံၚ်ဇြဳပၞာန် စၟတ် ၃၁၄ ဖျေံသ္ဇိုၚ်ကွာန်ဇြဳဝန်ဂှ် ပန်နၚ်လွဟ်ဇၞော်ကြာန်န် အပ္ဍဲကွာန်အဝန်ကျဳကဵု ကွာန်ဒံက်ယိတ် ဟွံအောန်နူကဵု ၁၀ မရ။
ဟိုတ်နူမကမ်လွဟ်ဇၞော် ဒတုံဗ္တိုဟ်ထ္ကးအာတုဲ သမ္ဘာတၠသ္ၚိၜါတၠ အာယုက် ၄၁ သၞာံ သဝ်ဇြဝ်မေန်ထောန်ကဵု နတ်မျာတ်တုၚ်တံ မပါလုပ် ညးဒေသ ၃ တၠ ချိုတ်အာလဝ်တုဲ ကောန်ၚာ်သၟတ်ၜါတၠ မပါလုပ် ၄ တၠ ဇီုကပိုက်ကလိဂွံလဝ်ဝပ်ရ။
သ္အာၚ်နူဂှ်ပၠန် အပ္ဍဲလွဟ်ဇၞော် ဒတုံဗ္တိုဟ်ထ္ကးအာလဝ် ကွာန်ယှိုဲယံၚ်ပျဂှ် ကောန်ၚာ်သၟတ် အာယုက် ၂ သၞာံမွဲတၠ မပါလုပ် ညးဍုၚ်ကွာန်ကောန်အရာပ် ၈ တၠ ဇီုကပိုက်ကလိဂွံလဝ်ဝပ်ရောၚ် ညးဒေသတံ ဟီုရ။
ကြဴနူဒဒန်ကြုက်အုက် ဒးဒုၚ်ဗ္တိုဟ်မာၚ်တုဲ နူတမ်ဒပ်ကံၚ်ဇြဳပၞာန် ဖျေံသ္ဇိုၚ်ၜဳကလေၚ်ဂှ် ပန်ပှော်ဒၟံၚ်လွဟ်ဇၞော် အပ္ဍဲကွာန်ဒၞါဲညးဍုၚ်ကွာန်ကောန်အရာပ်တံ သ္ပဒတဴဒၟံၚ်တံ ကြပ်အရိုဟ်ဗ္တံ မဒှ်ရ။
ဟိုတ်နူဒးဒုၚ်ဗ္တိုဟ်မာၚ်တုဲ ဒဒန်ကြုၚ်အုက် သရိုဟ်စှ်ေလီုအာဂှ် လ္ပာ်ကံၚ်ဇြဳပၞာန် သွက်ဂွံသိုၚ်ခၞံအာ ဒဒန်ဘေလဳယာယဳ ဗွဲမပြဟ်ဂှ် စဳဇန်လဝ်တုဲ ပ္ဍဲဂိတုမေ ၁၂ ဂှ်လေဝ် ဒဒန်သရိုဟ်စှ်ေလီုအာဂှ် ဂကောံအလဵုအသဳတွဵုရးဍုၚ်မန် ကံၚ်ဇြဳပၞာန်ခါန်ကၞက်လဝ်တံ ကၠုၚ်စိုတ်စၟဳတ်လဝ်ဏီရ။
ဒဒန်ကြုၚ်အုက်ဂှ် သၞာံတုဲကၠုၚ် ပ္ဍဲဂိတုဂျောန် ၂၉ တေံဂှ်လေဝ် ဂကောံပံၚ်ကောံ KNLA တံ ဗ္တိုဟ်ထ္ကးလဝ်မာၚ်တုဲ ဒဒန်မွဲကရေက် သရိုဟ်စှ်ေလီုလာ်အာလဝ်တုဲ ဒပ်ပံၚ်ကောံကံၚ်ဇြဳပၞာန် ကၠုၚ်စိုပ်စၟဳတ်ဒဒန်ဂှ်လေဝ် ဒးဒုၚ်ဗ္တိုက်လဝ်ဂှ်ရ သၞာဲဒဴၜါတၠ ချိုတ်အာလဝ်တုဲ သီုကဵုသ္ကိုပ်ဍုၚ်ဒပ်သဓီု ကေုာံ သၞာဲဒဴကဆံၚ်ဇၞော်ဇၞော်တံ မပါလုပ် သၞာဲဒဴနူဌာနမဆေၚ်စပ် ဗ္ဒါဲ ၃၀ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−MOI/CJ