မတ်မလီု၊ မေ ၁၄
ပ္ဍဲတွဵုရးဍုၚ်မန် ပ္ဍဲပွိုၚ်ဍုၚ် ဒပ်ပၠန်ဂတးရပ်လွဟ်ဂမၠိုၚ် လေပ်ချဳဒရာၚ်တံဂှ် နူဒပ်ကံၚ်ဇြဳပၞာန် ထံၚ်ကၠုၚ်ပရိုၚ် နကဵုက္ၜၚ်ကျာ အရိုဟ်ဒဒှ်တ္ၚဲ အဆက်က်တံနွံရောၚ် ဂွံတီကေတ် ဇရေၚ်ညးဒေသတံရ။
အပ္ဍဲအကြာတ္ၚဲတံဏံ ဒပ်ကံၚ်ဇြဳပၞာန်ဝွံ နူဌာန်ဂအုပ်ပၞာန်ရးအဂၞဲ လ္တူဍုၚ်မတ်မလီုဂှ် အခိၚ်ဗ္တံမ္ဂး ထံၚ်ကၠုၚ်ပရိုၚ် နကဵုက္ၜၚ်ကျာသၞေၚ်ဝဲ ပ္ဍဲပွိုၚ်ဍုၚ်သဓီု၊ ၜဳကလေၚ်၊ မုဟ်ဍုၚ်၊ ဇြပ်ဗု ကေုာံ ပွိုၚ်ဍုၚ်ရေဝ် အဆက်က်ရ။
ညးဒေသပွိုၚ်ဍုၚ်ရေဝ်မွဲတၠဂှ် အပ္ဍဲဒေသညးတံ အကြာ ၁၁ နာဍဳကဵု ၁၂ နာဍဳဂှ် ဂွံမိၚ်ကေတ်ဒၟံၚ် ရမျာၚ်ဗြုလွဟ်ထတ်တ်တုဲ ဒှ်ဒၟံၚ်ကြပ်အရိုဟ်ဗ္တံဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“လၟုဟ်တှ်ေ ဂွံမိၚ်ကေတ်ဒၟံၚ် ဗြုက္ၜၚ်ကျာ ကြပ်အရိုဟ်ဗ္တံရဏောၚ်။ ဆ္ဂး အခိၚ်ဗ္တံတှ်ေ က္ၜၚ်ကျာဂှ် ဟွံဂွံဆဵုပုဟ်။ ဗ္တံ အကြာ ၁၁ နာဍဳကဵု ၁၂ နာဍဳဂှ် ရမျာၚ်ဂှ်တှ်ေ ဂွံမိၚ်။ ပဝ်ဒၟံၚ် သၠုၚ်ၚ်ကွေံကွေံလေဝ် ဟွံသေၚ်ပုဟ်။ ရမျာၚ်ဂှ်တှ်ေ ဂွံမိၚ်ကေတ် ထတ်တ်ရ” သာ်ဝွံ သ္ဂးရ။
ပ္ဍဲပွိုၚ်ဍုၚ်မုဟ်ဍုၚ်ဂှ်လေဝ် ပ္ဍဲကဵုကွာန် ဒၞါဲဒပ်ပၠန်ဂတးရပ်လွဟ်ဂမၠိုၚ် လုပ်စိုပ်ချဳဒရာၚ်လေပ်တံကဵု ပ္ဍဲကဵုကၠအ်ထၜိုတ် ဗ္ဒါဲဗ္ဒါဲတံဂှ် အခိၚ်သ္ဂါဗ္တံ ဂွံမိၚ်ကေတ်ဒၟံၚ် ရမျာၚ်က္ၜၚ်ကျာဒပ်ကံၚ်ဇြဳပၞာန် ပဝ်ယာန်ဒၟံၚ်တံရောၚ် ဂွံတီကေတ် ဇရေၚ်ညးဒေသတံရ။
မွဲလ္ပာ်ဂှ်ပၠန် အပ္ဍဲကွာန်ယာန်ဒံၚ်၊ ကွာန်လှာ၊ သၞေဟ်ပဒဝ် ကေုာံ ကွာန်ဗ္ဒါဲဗ္ဒါဲဂမၠိုၚ် ပ္ဍဲပွိုၚ်ဍုၚ်မုဟ်ဍုၚ် ဒၞါဲဗော်ဍုၚ်မန်တၟိ AD လုပ်စိုပ်ချဳဒရာၚ်တံဂှ် အကြာတ္ၚဲတံဏံ ကောန်ဒပ်ကံၚ်ဇြဳပၞာန်တံ အာကၠုၚ်ချဳဒရာၚ်ဒၟံၚ် သီုဗ္တံသီုတ္ၚဲတံ နွံဒၟံၚ်ရ။
ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် ဖျေံသ္ဇိုၚ်ဍုၚ်ရေဝ် MSRF နာဲနဂါဂှ် ဒၞါဲဒပ်ပၠန်ဂတးတံ ဖျေံလဝ်ဗ္ဒိုပ်တံဂှ် ဒပ်ကံၚ်ဇြဳပၞာန် ဗက်ဂၠိုက်ဂၠါဲ အခိၚ်ဗ္တံတုဲ သွက်ဂွံဝေၚ်ပၞာန် ပလေဝ်ပလေတ်ပ္ကတ်ပ္ကေၚ်ဒၟံၚ်ရောၚ် ညးဟီုထ္ၜးလဝ် လညာတ်ညးရ။
“လ္ပာ်သၞတံ ပလေဝ်ပလေတ်ဒၟံၚ် သွက်ဂွံဝေၚ်ပၞာန် အခိၚ်ဗ္တံဟာဂှ် ပိုယ်တံ ထေၚ်ခယျကေတ်ရ။ ဥပမာစှ်ေနူက္ၜၚ်ကျာ ကဵုဇုက်တုဲ နူကဵုဒၞါဲ သၟာပၠန်ဂတးတံ ဟွံထေၚ်လဝ်တံဂှ် လ္ပာ်လက္ကရဴဒှ်ဒှ် သွက်ဂွံဗ္တိုက် ပလေဝ်ပလေတ်ဒၟံၚ်ဏောၚ်ဂှ် ထေၚ်ကေတ်ရ။ ပြဟ်ဟ်ဏံ ဒၞါဲဂွံဖျေံတံ Dropping Point တံ ဒၞါဲသ္ဂောံဝေၚ်အာပၞာန် တုဲပၠန် ဒၞါဲဒပ်ပိုယ်တံ ဖျေံလဝ်သ္ဇိုၚ်တံဂှ် ဍေံတံ ဗက်ဂၠိုက်ဂၠါဲဒၟံၚ် အခိၚ်ဗ္တံရ။ ညာတ်၊ ဟွံညာတ် ပ္ကတ်ပ္ကေၚ်ဒၟံၚ်ရောၚ်ဂှ် အဲညာတ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲအရာပလံၚ်ဇွောံမ သွက်ကောန်ဒပ်ကံၚ်ဇြဳပၞာန် စိုပ်ဒၟံၚ်မုက်ပၞာန်တံဂှ် ညံၚ်ဂွံဗၠးနူပရေၚ်ကြတ်ဗ္တိုက် နူဒပ်ပၠန်ဂတးတံဂှ် နကဵုက္ၜၚ်ကျာ ထံက်ပၚ်ပလံၚ်ဒၟံၚ် အခိၚ်ဗ္တံလေဝ် ဒှ်မာန်ရောၚ် နာဲနဂါ ဆက်ဟီုရ။
အပ္ဍဲဂိတုဨပရဴ သတ္တာဟဒုတိယတုဲကၠုၚ်တေံ သွက်ဂွံထိၚ်ဒက် ပေါဲဗ္တိုက် နူတွဵုရးဍုၚ်မန်ကဵု တွဵုရးကရေၚ်တံမာန် ဒုက္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် သဵုဝေန် အခိၚ်စၞောန်ဒၟံၚ်ပရေၚ်ပၞာန် ပ္ဍဲဌာန်ဂအုပ်ပၞာန်ရးအဂၞဲဂှ် ဒပ်ပံၚ်ကောံပၠန်ဂတးတံ အာစိုပ်ဗ္တိုက်လဝ် နကဵုဒရုၚ်ရ။
ကြဴနူဂှ်တုဲ ပ္ဍဲဒေသၜဳဂြာၚ် မၞုံပွိုၚ်ဍုၚ်ကျာ်မြဟ် တွဵုရးဍုၚ်မန်ဂှ် အကြာဒပ်မဟာမိတ်ပၠန်ဂတးတံကဵု ဒပ်ကံၚ်ဇြဳပၞာန်တံ ပေါဲဗ္တိုက်ဆေၚ်မုက်ဒိဓဗတ်ဗလးတိတံ သ္ကာတ်မြဟ်လဝ်တုဲ လ္ပာ်ရေဝ်ကဵုဇြပ်ဗုဂှ်လေဝ် ဗ္ဒိုပ်ဒပ်ကံၚ်ဇြဳပၞာန်လ္ၚဵု ဒးဒုၚ်လုပ်စိုပ်ဗ္တိုက်လဝ်ရ။
ဟိုတ်ဂှ်ရ ဒပ်ကံၚ်ဇြဳပၞာန်ဝွံ ပ္ဍဲတွဵုရးဍုၚ်မန် ဒၞါဲဒပ်ပၠန်ဂတးရပ်လွဟ် ချဳဒရာၚ်ဇြဟတ်ခိုဟ်တံကဵု ပ္ဍဲဒေသ လေပ်ဝေၚ်တဴပၞာန်တံဂှ် အခိၚ်ဗ္တံ ထံၚ်ဒၟံၚ်ပရိုၚ် ကဵုက္ၜၚ်ကျာရ။
ပရိုၚ်−သြၚ်လောန်တိုၚ်(မ်)
ဗီု−CJ