မတ်မလီု၊ မေ ၁၄
တွဵုရးဍုၚ်မန် ကြဴနူဒဒန်ကြုၚ်အုက် မၞုံဗ္ဒါဲကွာန်ယှိုဲယံၚ်ပျ ပယျဵုပွိုၚ်ဍုၚ်သဓီုကဵု ပွိုၚ်ဍုၚ်ၜဳကလေၚ် ဒးဒုၚ်ဗ္တိုဟ်မာၚ်တုဲဂှ် အပ္ဍဲတွဵုရး စတုဲဒးဂဗဒၟံၚ် ကၠေၚ်စက်ပိုတ်အိုတ်တံယျဂှ် ညးဒေသတံကဵု တၠကမၠောန်သွံရာန်ကၠေၚ်စက်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒဒန်ကြုၚ်အုက် နွံဒၟံၚ်လ္တူဂၠံၚ်ကွဳစက် လ္ဂုၚ်−မတ်မလီုဂှ်ဝွံ တုဲကၠုၚ် ပ္ဍဲဂိတုမေ ၁၁ အခိၚ်နူဂယး ၜိုတ် ၂ နာဍဳဂှ် ဒးဒုၚ်ဖံက်ဗ္တိုဟ်မာၚ်တုဲ ဒဒန်ကောန်ကရေတ် သှ်ေဒၟံၚ်ကၠာတေံကဵု ဒဒန်ဘေလဳ ကလေၚ်သိုၚ်လဝ်တၟိ သီုၜါတၞုၚ် သရိုဟ်လီုအာလဝ်ရ။
ဒၟါနူဒဒန်သရိုဟ်လီုအာလဝ်တုဲ သီုကွဳစက်ဇၞော်၊ ကွဳစက်ဍောတ် မပါလုပ် စနူကဵုကွဳလိုန်ဓာတ်တံဒှ်တမ် တတ်ကၠောံအာကၠုၚ်ဟွံဂွံရတုဲ ကွဳစက်ဍောတ်တ်လ္ၚဵုတံ အာကၠုၚ်ဒၟံၚ် နူကဵုဂၠံၚ်ကွာန်တံနွံကီုလေဝ် ကွဳစက်ဇၞော်ဇၞော်တံ အာကၠုၚ်ဟွံဂွံတုဲ ဒးဒေါအ်ဒေၚ်ဒၟံၚ်ရ။
ကွဳစက်ဖ္ဍိုက်ဗၞိက်ဂမၠိုၚ် မပါလုပ် ကွဳစက်ဖ္ဍိုက်ပ္တိုန်လဝ် ကၠေၚ်စက်ဂမၠိုၚ် လုပ်စိုပ်ဟွံမွဲရတုဲ အပ္ဍဲတွဵုရးဂှ်တှ်ေ သီုဍုၚ်မတ်မလီု မပါလုပ် ပွိုၚ်ဍုၚ် ဟွံအောန်နူကဵု ၇ ပွိုၚ်ဍုၚ် ကၠေၚ်စက်ပိုတ်အိုတ်ဂှ် စတုဲဒးဂဗကၠုၚ်ဒၟံၚ်ရ။
ညးဒေသမတ်မလီုမွဲတၠဂှ် ဆေၚ်ကၠေၚ်စက်ဗွဲမဂၠိုၚ် ကၠေၚ်စက် ပိုတ်ကၠုၚ်တုဲ ဒးပြေၚ်ရေၚ် မၚ်ရာန်ဒၟံၚ်တုဲ ဒးဆေၚ်ဒၟံၚ်မုက်ကဵု အကြေပ်အဂြတ်ကၠေၚ်စက်ယျရောၚ် ဟီုရ။
“ကၠေၚ်ဂှ်တှ်ေ ပ္ဍဲဍုၚ်ဂှ် ၜိုတ်တြဴဆေၚ်တှ်ေ မွဲဆေၚ်ရဂွံ။ ဒးပြေၚ်ရေၚ်ဒၟံၚ်ဂှ် ဂၠိုၚ်။ ဇၟာပ်ဆေၚ်ဂှ် ဟွံမွဲပုဟ်။ ကၠေၚ်ဂှ်တှ်ေ ဒှ်အခက်အခုဲရ။ အကာဲအရာဂၠံၚ်ဍာန် ကၟာတ်တုဲ လဆောဝ်လဆောဝ်မ္ဂးလေဝ် ဟွံဒေါအ်ဟွံဂွံ ဒးစုတ်ရဏောၚ်ဟီုမ္ဂး ပ္ဍဲသ္ကဲဂၠံၚ် မွဲဗူ ၜိုတ် ၇၀၀၀ လေဝ် ဒးစုတ်ဂှ်ရ။ သွံ ၈၀၀၀ လေဝ် ဒးစုတ်ဂှ်ရ။ ဒးဟီုမ္ဂး ကၠေၚ်ဂှ်ကြေပ်ဂြတ်အာယျ” သာ်ဝွံ သ္ဂးရ။
သ္အာၚ်နူဂှ်ပၠန် ဒၞါဲပြေၚ်ရေၚ် မၚ်ရာန်ကၠေၚ်စက်တံဂှ်လေဝ် အောန်အိုတ် ၜိုတ်မွဲနာဍဳ ဒးမၚ်ရာန်ဒၟံၚ်တုဲ သွက်ကလောန် အခိၚ်လအ်လတံ က္တဵုဒှ်ဒၟံၚ်တုဲ ကွဳစက်ကၠေၚ်တံ ဟွံလုပ်စိုပ်ကၠုၚ်လအ်မ္ဂး ကၠေၚ်စက်အောန် က္တဵုဒှ်ကၠုၚ် ပရေံပရေံမာန်ရောၚ် ညးဆက်ဟီုရ။
တၠကမၠောန်သွံရာန်ကၠေၚ်စက်မွဲတၠဂှ်လေဝ် ကွဳစက်ကၠေၚ်တံ ဂွံလုပ်စိုပ်ဂှ် ဂၠံၚ်ကရတ်ဟွံမွဲဂှ်ရ ကၠေၚ်စက်ပိုတ်အာဏောၚ်တုဲ လ္ပာ်ဍုၚ်သေံဂှ် ပၠောပ်ကၠေၚ်စက်ဂွံကီုလေဝ် ၚုဟ်ထပ်က္ဍၚ်တိုန်ကၠုၚ်မာန်ရောၚ် ဟီုရ။
“ၜိုတ်မွဲသတ္တာဟတှ်ေ ကၠေၚ်ဂှ် ပိုတ်တွဵုဏောၚ်။ အလန်တေံ ဠဒဒန်ဗ္ဒါဲ (ကျိုက်ကော်) ဂှ်တှ်ေ တတ်အာလ္ပာ်ဂၠံၚ်ကွာန်ဂွံမံၚ်။ လၟုဟ် ဒၞါဲဏံဂှ် ဂၠံၚ်ကရတ်ဟွံမွဲ ဒှ်ဒၟံၚ်ရ။ ပိုတ်တှ်ေ ၚုဟ်တိုန်ရဏောၚ်။ ယဝ်ရ အဏံကၠေၚ်ပိုတ်ဏောၚ်ဟီုမ္ဂး ဍေံတံ ပၠောပ်နၚ် နူသေံဏောၚ်။ နူသေံဂှ်တှ်ေ ပၠောပ်ဂှ် ပၠောပ်ဂွံ။ ၚုဟ်ဍေံဂှ်တှ်ေ ထပ်သၠုၚ်တိုန်အာညိပၠန်ဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် ကၠေၚ်စက် ဂွံကလေၚ်လုပ်စိုပ်ကၠုၚ် ဗီုကၠာတေံပၠန်ဟီုမ္ဂး တန်တဴကဵု လ္တူအကာဲအရာ ကလေၚ်သိုၚ်ဒဒန်တုဲ ယဝ်ရသိုၚ်ဒဒန်လအ်မ္ဂး သာတုဲဒးဒုၚ်စသိုၚ်အာ ဘဲဒဏ်ကၠေၚ်စက်ပိုတ်အိုတ်တံဏောၚ်ဂှ် ညးဆက်ဟီုရ။
ဒဒန်ကြုၚ်အုက် သရိုဟ်လီုလာ်အာဂှ် ဂကောံအလဵုအသဳတွဵုရးဍုၚ်မန် ကံၚ်ဇြဳပၞာန် ခါန်ကၞက်ဂှ် ပ္ဍဲဂိတုမေ ၁၂ တေံ အာစိုပ်ကျောဝ်ဗဵုလဝ်တုဲ သွက်ဂွံသိုၚ်ခၞံ ဒဒန်ဘေလဳတၟိ ဗွဲမပြဟ်ဂှ် စၞောန်လဝ် ကုဌာနသိုၚ်ခၞံတံကဵု ကမ္ပဏဳဟိုက်ဝေ ယှိုဲတာန်လွေန်တံကီုလေဝ် အခိၚ်ဒဒန်တုဲဂှ် ဟွံဂွံတီကေတ်ဏီရ။
ဒဒန်ကြုက်အုက်ဝွံ တုဲကၠုၚ် ပ္ဍဲဂိတုဂျောန် ၂၉ တေံဂှ်လေဝ် ဂကောံပံၚ်ကောံ KNLA တံ ဗ္တိုဟ်ထ္ကးလဝ်မာၚ်တုဲ ဒဒန်မွဲကရေက် သရိုဟ်လီုစှ်ေအာတုဲ သီုကၠေၚ်စက်တံ မပါလုပ် ကပေါတ်ဗၞိက်ဂေတ်ဂြိပ် ဒးဒေါအ်အာလဝ် ပိတ္ၚဲဟွံကရ။
ပရိုၚ်−သြၚ်လောန်တိုၚ်(မ်)
ဗီု−CJ