တဳဟဳရာန်၊ မေ ၁၃
ပ္ဍဲအဳရာန် သွက်ဂွံကၠောန်ပ္တိတ် ဗုမ်နျူကလဳယျာတံဂှ် ပိုၚ်ပြဳလဝ် ယူရေနဳယာန်ရုမ်မ်ဂပ်ပ်ယျရောၚ် အေဂျေန်ဇြဳအဏုမျူဍုၚ်နာနာ ကြဴနူကဵုသတိတုဲဂှ် အမာတ်ကၠတ်ထဝ်မွဲတၠဂှ် ပ္ဍဲဂိတုမေ ၁၀ တေံ လလောၚ်တြးကၠုၚ် ဒဒှ်ရပ္ဍဲအဳရာန် ပိုၚ်ပြဳလဝ် လွဟ်လက်နက်နျူကလဳယျာဂမၠိုၚ်ယျ မဒှ်ရ။
နကဵုလညာတ်ညးမ္ဂး ညးတံ ပိုၚ်ပြဳလဝ် လွဟ်လက်နက်နျူကလဳယျာယျကီုလေဝ် ဟွံလလောၚ်တြးဏီဂှ် အမာတ်ကၠတ်ထဝ် အာမက် ဗက်ယှာယက် ဟီုလဝ်ဂှ် ဌာန်ပရိုၚ်အဳရာန် Rouydad 24 ထ္မံက်ထ္ၜးလဝ်ရ။
အကြာအဳရာန်ကဵု ဍုၚ်ဇြဟတ်ဇၞော်ဇၞော်တံဂှ် တၚ်တုပ်စိုတ်နျူကလဳယျာမွဲ ကလိဂွံလဝ်ကီုလေဝ် ဒဝ်နေဝ်ထြာပ်ဟီုဂှ်တှ်ေ တၚ်တုပ်စိုတ်ဏံဝွံ တာဒၞါကၠေံ နူပွအဳရာန်ပ္တိတ်ဇြဟတ် သွက်သ္ဂောံဂွံလွဟ်လက်နက်နျူကလဳယျာ မာန်ဟွံသေၚ်ဂှ်တုဲ ပ္ဍဲသၞာံ ၂၀၁၈ တေံ နုက်တိတ်လဝ်အမေရိကာန် နူတၚ်တုပ်စိုတ်ဂှ်ရ။
အတိုၚ်တၚ်တုပ်စိုတ်ဏံမ္ဂး သွက်ကတိ အဳရာန်ကဵုလဝ် ဒဒှ်ရညးတံ ဟွံပ္တိတ်ဇြဟတ် သွက်ဂွံကၠောန်ပ္တိတ် လွဟ်လက်နက်နျူကလဳယျာတံဂှ်တုဲ ရုပ်သီကဵုလဝ် ပရေၚ်ကၟာတ်လဒဵုကေတ်အရေဝ်စပ်ကဵုပရေၚ်ပိုန်ဒြပ် မဖျေံစၟတ်လဝ် လ္တူညးတံ ဗွဲမဂၠိုၚ်ဂၠေၚ်ရ။
တုဲကၠုၚ် ပ္ဍဲဂိတုမာတ်တေံ အာမက် ဘာယှာယက် ဂွံကလေၚ်ဒုၚ်ရုဲစှ် ပ္ဍဲကၠတ်ထဝ်အဳရာန်ဂှ် ဟိုတ်ကၟိန်ဍုၚ်ဂမၠိုၚ် ဂွံဆေၚ်မုက်ဒိဓဗတ်ဒၟံၚ်ညးသ္ကအ်ဂှ်ဝွံ ဒၟါနူဇြဟတ်ဟွံသၟဟ်တး မဒှ်တုဲ ယဝ်ရဇြဟတ်တုပ်ဒၟံၚ်မ္ဂး သ္ဇက်ဒးဆေၚ်မုက်ဒိဓဗတ်ဟွံမွဲပုဟ်ဂှ် ဟီုရ။
ဟိုတ်ဂှ်ရ ဇြဟတ်ပၞာန်အဳရာန် ညံၚ်ဂွံတုပ်ကဵု အမေရိကာန်ဂှ် ဒးကၠောန်ဏောၚ် ညး ဟီုဗပေၚ်လဝ်ရ။
သွက်သ္ဂောံကၠောန်သာ်ဏံဂှ်တှ်ေ နကဵုအဳရာန် ဒးပိုၚ်ပြဳလဝ် လွဟ်လက်နက်နျူကလဳယျာတံဏောၚ်ဂှ် ညးဟီုရ။
ညးလ္ၚတ်ဂမၠိုၚ်ဂှ်တှ်ေ အာမက် ဘာယှာယက်ဝွံ ဒှ်အမာတ်ကၠတ်ထဝ်တုဲ ဟိုတ်နူဟွံပါလုပ် ပ္ဍဲညးဖျေံသ္ဂုတ်သွာတ် စပ်ကဵုနျူကလဳယျာ ဂကောံအလဵုအသဳဂှ်တုဲ ဂလာန်ညးဟီုဂှ်ဝွံ သ္ဇက်စိုတ်ဒးလုပ်စခိုဟ်ရောၚ် ညးဟီုလဝ်ရ။
ဆ္ဂး ကြဴနူတၚ်လလောၚ်တြးညး မံက်တိတ်ကၠုၚ်တုဲ ဂွံၜါတ္ၚဲဂှ် ဥက္ကဌ ကံၚ်ဇြဳမဟာဗျူဟာ စပ်ကဵုပရေၚ်ဍုၚ်သ္အာၚ် အဳရာန်ဂှ် နကဵုအဳရာန် ကၠောန်ပ္တိတ်လွဟ်လက်နက်နျူကလဳယျာမာန်ယျဂှ် ဟီုလဝ်ရ။
နကဵုညးတံ ကၠောန်ပ္တိတ်လွဟ်လက်နက်နျူကလဳယျာ မာန်ယျကီုလေဝ် ဒဒှ်ရသ္ဂုတ်သွာတ်လဝ် ဟွံကၠောန်ပ္တိတ်ဂှ် ညးဟီုရ။
ဆ္ဂး ယဝ်ရဒးဒုၚ်ဘပဠကၠုၚ် ဒတုဲဖဵုပရေၚ်ပိုန်ဒြပ်အဳရာန်မ္ဂး အကာဲအရာပြံၚ်လှာဲအာမာန်ဏောၚ်ဂှ် ညး ဟီုဗပေၚ်လဝ်ရ။
Ref: FoxNews