မတ်မလီု၊ မေ ၁၅
အတိုၚ်သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ဂယိုၚ်ပ္တိုန်လဝ်ဂှ် ပ္ဍဲတွဵုရးဍုၚ်မန် ပ္ဍဲဂိတုမေ ၁၄ တေံ ထပ်ပံက်ဏာလဝ် တန်ဗ္တောန်ကွတ်ပၞာန် လၟေၚ် ၂ ရောၚ် ဂွံတီကေတ် အတိုၚ်တၚ်လလောၚ်တြး ကံၚ်ဇြဳပၞာန်ရ။
တန်ဗ္တောန်ကွတ်ပၞာန် လၟေၚ် ၂ ဂှ် ပံက်လဝ် ပ္ဍဲဘာတန်ဗ္တောန်ကဆံၚ်သၠုၚ်ဒပ်ပၞာန်ဗၟာ စၟတ် ၄ မကော်ဂး တကက ၄ ဖျေံသ္ဇိုၚ်ကွာန်ဝါကလိ ပွိုၚ်ဍုၚ်ဇြပ်ဗုဂှ်ရ။
အတိုၚ်ဗီုဓာတ်စၟတ်သမ္တီ ကံၚ်ဇြဳပၞာန် လလောၚ်ပ္တိတ်လဝ်ဂှ်မ္ဂး ပ္ဍဲတန်ဗ္တောန်ကွတ်ပၞာန် လၟေၚ် ၂ ဂှ် ညးဒးဒုၚ်ပကောံပကောန်ပၞာန် ကဵုကၠံ တိုန်စိုပ်ဒၟံၚ်ရောၚ် ဂွံဆဵုကေတ်ရ။
ညးဒးဒုၚ်ပကောံပကောန်ပၞာန် ပ္ဍဲတန်ဗ္တောန် လၟေၚ် ၂ တံဂမၠိုၚ်ဝွံ ညးဒးဒုၚ်ရပ်ဒက်အတေၚ်အဓမ္မ၊ နူသ္ကိုပ်အုပ်ဓုပ်ကွာန်အရာပ် မဆေၚ်စပ်တံ ရာန်ကဵုလှုဲတုဲ ပလံၚ်ဏာလဝ်တန်ဗ္တောန်တံ ပါလုပ်ဂၠိုၚ်အိုတ်ရောၚ် ဂွံတီကေတ် အတိုၚ်ဂလာန် ညးမစုက်လုက်ကဵုကံၚ်ဇြဳပၞာန်တံရ။
စပ်ကဵုလၟိဟ်တန်ဗ္တောန် တိုန်စိုပ်ဒၟံၚ် ပ္ဍဲတန်ဗ္တောန်ကွတ်ပၞာန် လၟေၚ် ၂ ဂှ်တုဲ လ္ပာ်ကံၚ်ဇြဳပၞာန် လလောၚ်ပ္တိတ်ကၠုၚ်ဂှ် ဟွံဂွံဆဵုကေတ်ရ။
အတိုၚ်သၞောဝ်ယိုက်ဂၠေၚ်လျိုၚ်ပၞာန် စၟအ်ကောန်ဍုၚ်အာယုက်ပေၚ်တုဲ မ္ဒးလုပ်ပၞာန်ဂှ်မ္ဂး တန်ဗ္တောန်ကွတ်ပၞာန် လၟေၚ် ၁ ဂှ် ပ္ဍဲဂိတုဨပရဴ ၈ တုဲကၠုၚ်တေံ စပံက်လဝ်ရ။
အတိုၚ်လိက်ဒုၚ်စဳရေၚ် ဂကောံလ္ၚတ်ကေၚ်ကာဗၟာ ကေုာံ ပဋိပက္ခ BACS လလောၚ်ပ္တိတ်လဝ်ဂှ်မ္ဂး ပ္ဍဲတန်ဗ္တောန်ကွတ်ပၞာန် လၟေၚ် ၁ တွဵုရးဍုၚ်မန်ဂှ် ညးဒးဒုၚ်သ္ပကောန်ပၞာန် ဗၞတ် ၂၀၀ ပြၚ် နွံဒၟံၚ်ရောၚ် ဂွံတီကေတ်ရ။
အလုံဍုၚ်မွဲ သွက်တန်ဗ္တောန်ကွတ်ပၞာန် လၟေၚ် ၁ ဂှ် ညးသၟတ် ၄၃၀၀ ပြၚ် ဒးဒုၚ်ပကောံပလဝ်ကောန်ပၞာန်တုဲ ပလံၚ်ဗစိုပ်လဝ် ပ္ဍဲဘာတန်ဗ္တောန် ၁၅ ဘာရောၚ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် BACS ရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram