ထဝါဲ၊ မေ ၁၅
သၞေဟ်ကၚ်စၟဳတ်လုပ်ဍုၚ်ကံၚ်ဇြဳပၞာန် မၞုံအရာပ်(အိမ်ရှေ့ပြင်) ပွိုၚ်ဍုၚ်ထဝါဲ ရးတၞၚ်သဳ ဒးဒုၚ်လုပ်စိုပ်ဗ္တိုက်တုဲ ကောန်ဒပ်ကံၚ်ဇြဳပၞာန် ၂ တၠ ချိုတ်အာလဝ်ရောၚ် ဂွံတီကေတ် ဇရေၚ်ဒပ်ပၞာန်ဗထူရ။
တုဲကၠုၚ် ဂိတုမေ ၁၃ အခိၚ်လဒေါဝ်တ္ၚဲ ၜိုတ် ၁၂ နာဍဳဝိုက်ဂှ် တမ်ဒပ် ၂၇ ဒပ်ပၞာန်ဗၠးၜးကောန်ဂကူကရေၚ် KNLA ကဵု ဒပ်ပၞာန်ဗထူတံ လုပ်စိုပ်ဗ္တိုက်လဝ် သၞေဟ်ကၚ်စၟဳတ် ဖျေံလဝ်ဒပ် နကဵုဇြဟတ်ပွဳပွူ ၂၀ ဂှ်ရ။
ဟိုတ်နူပရေၚ်ဗ္တိုက်ဏံတုဲ ဗ္ဒါဲဘာ်နာဍဳ က္တဵုဒှ်လဝ်ပရေၚ်ပန်ပှော် ၜါလ္ပာ်တုဲ ကောန်ဒပ်ကံၚ်ဇြဳပၞာန် ၂ တၠ ချိုတ်အာလဝ်ဂှ် ဂွံဆဵုကေတ်တုဲ ဒၞါဲဂဒုက်ပၞာန် ဗာန်ကာတံဂှ်လေဝ် လီုလာ်အာလဝ်ရောၚ် ညးဒုၚ်တာလျိုၚ် လလောၚ်ပရိုၚ် ဒပ်ပၞာန်ဗထူ ကောန်သ္ဂံၚ်ထာတ်မျာတ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သၞေဟ်ကၚ်စၟဳတ် ဒးဒုၚ်ဗ္တိုက်ဂှ်ရ သၞေဟ်ကၚ်စၟဳတ် ဂၠံၚ်လုပ်ဍုၚ်ထဝါဲတံဂှ် ဒပ်ကံၚ်ဇြဳပၞာန် ကၟာတ်ထောံယာယဳတုဲ ကၠောန်သ္ပစၟဳတ်ဂၠိုက်ဂၠါဲကၟာတ်လဒဵုလဝ်တုဲ ရပ်ဒက်ဏာလဝ် မၞိဟ်တြုံဒေသ ၂ တၠရ။
တ္ၚဲဏံ လ္ပာ်ကံၚ်ဇြဳပၞာန် ပတေၚ်ဂြတ်စၟဳတ်လဝ် သၞေဟ်ကၚ်လုပ်ဍုၚ်ထဝါဲ နကဵုဇြဟတ်ဒပ် ဗွဲမဂၠိုၚ်ဂၠေၚ်ရောၚ် ဂွံတီကေတ် အတိုၚ်ဂလာန် ညးဒေသတံရ။
အပ္ဍဲလၟေၚ်ဒဒှ် သၞေဟ်ကၚ်လုပ်ဍုၚ် ဒးဒုၚ်ဗ္တိုက်ဂှ် ဒပ်အမၠံက်ကံၚ်ဇြဳပၞာန် ဖျေံသ္ဇိုၚ်ထဝါဲ ပန်ပှော်လဝ်လွဟ်ဇၞော်တုဲ ညးတြုံ အာယုက် ၇၀ သၞာံ ဒၟံၚ်ကွာန် (မောၚ်မယ်ရှောၚ်) မွဲတၠ ဇီုကပိုက်ကလိဂွံလဝ်ဝပ်တုဲ သ္ၚိဒၟံၚ် ၂ မ လီုလာ်အာလဝ်ရောၚ် ဂွံတီကေတ် ဇရေၚ်ညးဒေသတံရ။
အတိုၚ်လိက်ဒုၚ်စဳရေၚ် ဂကောံသုတေသန FE5 Tanintharyi ဂှ်မ္ဂး ပ္ဍဲရးတၞၚ်သဳ စနူဂိတုဨပရဴတုဲကၠုၚ်တေံတုဲ ပေါဲဗ္တိုက်ဂမၠိုၚ် သာသ္ကာတ်မြဟ်ကၠုၚ်တုဲ လ္ပာ်ကံၚ်ဇြဳပၞာန် သာတုဲကၠောန်ကၠုၚ်ပရေၚ်ဗ္တိုက်တရဴကျာတံရောၚ် ပ္ဍဲဂိတုမေ ၁၄ တေံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−Ba Htoo Army