တံၚ်ဥူ၊ မေ ၁၅
ပ္ဍဲခရိုၚ်တံၚ်ဥူ ဒပ်မဟာ ၂ တိဍာ်အုပ်ဓုပ်ကဝ်တူလေဝ်ဂှ် ဟိုတ်နူပရေၚ်ဗ္တိုက်ဒပ်ကံၚ်ဇြဳပၞာန် နကဵုလွဟ်ဇၞော် ကေုာံ တရဴကျာတံတုဲ သီုကောန်ၚာ်သၟတ်မွဲတၠ မပါလုပ် ညးဍုၚ်ကွာန်ကောန်အရာပ် ၅ တၠ ချိုတ်တုဲ ဟွံအောန်နူကဵု ၆ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်လလောၚ်တြးဗဟဵု KNU ရ။
တုဲကၠုၚ် ပ္ဍဲဂိတုမေ ၅ အခိၚ်ဇိုၚ်သဝ်တ္ၚဲ ၄ နာဍဳဝိုက်ဂှ် နူဒပ်ကျာကံၚ်ဇြဳပၞာန် ဟိုတ်ဟွံမွဲမွဲသာ် ကၠောန်သ္ပဗ္တိုက်ဏာလဝ် ခရိုၚ်တံၚ်ဥူ KNU ပွိုၚ်ဍုၚ်(သံတောၚ်ကြီး) ပ္ဍဲကဵုကွာန် (သေ့ခူဒဲ) ကဵု ကွာန် (ဘဲခလေးခို) မၞုံဒေသသ္ကုတ်ဗၟံက် (ကလေ့လို) နကဵုပၞာန်ကျာရောၚ် ပါလုပ် ပ္ဍဲတၚ်လလောၚ်တြးဂှ်ရ။
ဒပ်ကျာကံၚ်ဇြဳပၞာန် ဗ္တိုက်လဝ်ကဵုက္ၜၚ်ကျာ ပ္ဍဲကွာန်(ဘဲခလေးခို) ၅ ဝါတုဲ ကောန်ၚာ်သၟတ် မၞုံအပ္ဍဲကွာန်မွဲတၠ ဒးချိုတ်အာလဝ်တုဲ ကောန်အရာပ် ၃ တၠ ဇီုကပိုက်ကလိဂွံလဝ်ဝပ်ရ။ ဗ္တိုက်လဝ်ပၞာန်ကျာ သီုကဵုပ္ဍဲကွာန် (သေ့ခူဒဲ) ၂ ဝါတုဲ ညးဍုၚ်ကွာန် ဇီုကပိုက်ဒးဟွံမွဲကီုလေဝ် ဘာကျာ် ကေုာံ စမြိုၚ်ဂမၠိုၚ် ဒးလီုလာ်အာလဝ်ရောၚ် ထ္မံက်ထ္ၜးလဝ်ရ။
ဒပ်ကံၚ်ဇြဳပၞာန်ဝွံ ကၠုၚ်စိုပ်ထောံလဝ်မခတိုဟ် လျိုင် ၅၀၀ ပံၚ် ၅ မ ပ္ဍဲကွာန်(ဘဲခလေးခို) နကဵုက္ၜၚ်ကျာတုဲ ဟိုတ်နူပရေၚ်ဗ္တိုက်ဏံတုဲ သၟတ်ဗြဴ အာယုက် ၅ သၞာံမွဲတၠ ချိုတ်အာလဝ်တုဲ မၞိဟ်တြုံၜါတၠကဵု မၞိဟ်ဗြဴမွဲတၠ ကလိဂွံလဝ်ဝပ်ရောၚ် ဇာဇၞိက်အထံက်အရီု ပရေၚ်ၜိုဟ်လလမ်ကရေၚ် KPSN လေဝ် လလောၚ်ပ္တိတ်လဝ်ရ။
သ္အာၚ်နူဂှ်ပၠန် ပ္ဍဲဂိတုမေ ၁၃ အခိၚ်ဗ္တံ ၜိုတ် ၉ နာဍဳ ၄၅ မိနေတ်ဂှ် နူဒပ်ကံၚ်ဇြဳပၞာန် ခလရ ၇၃ ဖျေံသ္ဇိုၚ်ဇယိတ်ကျဳ ပန်ပှော်ကဵုလွဟ်ဇၞော် ပ္ဍဲခရိုၚ်တံၚ်ဥူ KNU ၊ ပွိုင်ဍုင်ထာန်တပေန်၊ ဂကောံကွာန်ဇယိတ်ကျဳ သ္ကုတ်သၠုၚ်ကျာ ပ္ဍဲကဵုကွာန် ( ရွာလေးကုန်း) တုဲ ကောန်အရာပ် ၄ တၠ ဒးချိုတ်အာလဝ်တုဲ ၃ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်လလောၚ်တြးရ။
စွံပွန် လ္တူညးဍုၚ်ကွာန်ကောန်အရာပ်တုဲ ဟိုတ်နူပရေၚ်ဗ္တိုက်ပန်ပှော် နူဒပ်ကံၚ်ဇြဳပၞာန်တုဲ ကောန်ကွာန်ဒေသဂမၠိုၚ် အရာဟွံဂီုကၠီု ကေုာံ ပွမဒးဖေက်ဂၟံက်တံ သာသ္ကာတ်မြဟ်ကၠုၚ်တုဲ ကောန်ကွာန်ဂမၠိုၚ်လေဝ် ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရောၚ်ဂှ် ဂကောံအခေါၚ်အရာမၞိဟ်ကရေၚ် KHRG လေဝ် လလောၚ်ပ္တိတ် ဟီုဂးလဝ်ရ။
အပ္ဍဲတိဍာ်အုပ်ဓုပ်ကဝ်တူလေဝ်ဂှ် ဒပ်ကံၚ်ဇြဳပၞာန် ကလိလောန်ဒၟံၚ် ပွမဖံက်ပ္ကဝ်အခေါၚ်အရာမၞိဟ်တံ အရိုဟ်ဒဒှ်တ္ၚဲ အဆက်က်တုဲ ညးဍုၚ်ကွာန်ဂမၠိုၚ် ဒးဒုၚ်စသိုၚ်ဒၟံၚ် အရာဟွံဂီုကၠီု သီုစိုတ်၊ သီုကာယတံဂှ်တုဲ ညးဍုၚ်ကွာန်ဗွဲမဂၠိုၚ်ဂၠေၚ်ဝွံ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်အိုတ်ရောၚ်ဂှ် ဂွံတီကေတ် အတိုၚ်တၚ်လလောၚ်တြး KNU ရ။
ပရိုၚ်−သြၚ်လောန်တိုၚ်(မ်)
ဗီု−KPSN