မတ်မလီု၊ မေ ၁၅
ဒဒန်ကြုၚ်အုက် နွံလ္တူဂၠံၚ်ပျဳထံၚ်သု မတ်မလီု−လ္ဂုၚ် ကြဴနူဒးဒုၚ်ဖံက်ဗ္တိုဟ်မာၚ်ပလီုပလာ်တုဲဂှ် ပ္ဍဲဂၠံၚ်ကွာန် လ္ပာ်ဂၠံၚ်သပဝ်ဂှ် သီုကွဳစက်ဖ္ဍိုက်ဗၞိက်တံ မပါလုပ် ယာန်ဖ္ဍိုက်ညးအာတရဴ ဂၠိုၚ်ကဵုကၠံ ကၟာတ်ဆိုအ်ဒၟံၚ် အရိုဟ်ဒဒှ်တ္ၚဲရ။
ဒဒန်ကြုၚ်အုက် နွံပ္ဍဲကွာန်ယှိုဲယံၚ်ပျ ပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ်ဝွံ ပ္ဍဲဂိတုမေ ၁၁ တုဲကၠုၚ်တေံ အခိၚ်နူဂယး ၜိုတ် ၂ နာဍဳ ဟိုတ်နူဒးဒုၚ်ဖံက်ဗ္တိုဟ်မာၚ် ပလီုလဝ်တုဲ သီုဒဒန်ကောန်ကရေတ် သှ်ေဒၟံၚ်တံဂှ်ကီု သီုဒဒန်ဘေလဳ ကလေၚ်သိုၚ်လဝ်တၟိ သီုၜါတၞုၚ် သရိုဟ်စှ်ေ လီုအာလဝ်ရ။
ဟိုတ်နူဒဒန်သရိုဟ်စှ်ေလီုအာလဝ်တုဲ ညးဍုၚ်ကွာန်အာတရဴဂမၠိုၚ်ဝွံ ၜိုန်ရသုၚ်စောဲလဝ် ဂၠံၚ်ကွာန်ယှိုဲယံၚ်ပျကဵု ကွာန်မိုဝ်ကံၚ် မသ္ပဝ်အာဒဒန်ဂှ်ကီုလေဝ် ဟိုတ်နူဂၠံၚ်ဍန်တုဲ လၟိဟ်ကွဳစက် ဂၠိုၚ်ကဵုကၠံ ကၟာတ်ဆိုအ်ဒၟံၚ် အရိုဟ်တ္ၚဲရ။
စပ်ကဵုအကာဲအရာ ကွဳစက်ဖ္ဍိုက်ဗၞိက်ဂမၠိုၚ်ကီု သီုကဵုယာန်ညးအာတရဴဂမၠိုၚ် ကၟာတ်ဆိုအ်ဒၟံၚ် ပ္ဍဲဂၠံၚ်ကွာန်တံဂှ်တုဲ ညးဒေသၜဳကလေၚ်မွဲတၠ ဟီုလဝ် ကုဌာန်ပရိုၚ်သြၚ်လောန်တိုၚ်(မ်) သာ်ဏံရ။
“ကွဳစက်တံဂှ်တှ်ေ ကၟာတ်ဆိုအ်ဒၟံၚ် တၟာဂလိုၚ်ရ။ သီုလ္တူဂၠံၚ်ဇၞော်၊ သီုပ္ဍဲဂြိုပ်ဂှ် ကၟာတ်ဒးဒၟံၚ် တၟာဂလိုၚ်ရ။ လၟိဟ်ကွဳစက်ဂှ် ရိုဟ်လၟိဟ်ဟွံမာန်ပုဟ်။ ဂၠံၚ်ဍန်ကွေံကွေံ။ ကွဳစက်မွဲဖ္ဍိုက်ကဵုမွဲဖ္ဍိုက် ပါဲဟွံဗၠးပုဟ်။ ဂၠံၚ်ဂြိုပ်ဟီုတှ်ေ ကွဳစက်တံဂှ်လေဝ် နွံကဵုလျိုၚ်တုဲ ဒဒန်တံဂှ် ဒုၚ်ဟွံမာန်ပုဟ်။ လ္ပာ်တေံကၟာတ်ဒၟံၚ်တုဲ အာလၟေၚ်ၚ်မ္ဂး ၜိုတ် ၂၀ မိနေတ်ရ လအ်။ ပေါဲဗ္တိုက်ကွေံကွေံလေဝ် ဟွံသေၚ်ပုဟ်။ ရမျာၚ်လွဟ်ဇၞော်တံဂှ် ဂွံမိၚ်ဒၟံၚ်ရ” သာ်ဝွံ သ္ဂးရ။
ဂၠံၚ်ကွာန်တံဏံဝွံ အခိၚ်ဓမ္မတာ တတ်ကၠောံမ္ဂး လအ်စ ၜိုတ် ၂၀ မိနေတ်ရကီုလေဝ် ဂၠံၚ်ကွဳစက် ကၟာတ်ဆိုအ်တုဲဂှ် အောန်အိုတ် နူ ၅ နာဍဳ စဵုကဵု ၈ နာဍဳ လအ်မာန်ရောၚ် ဂွံတီကေတ် အတိုၚ်ဂလာန် ညးဍုၚ်ကွာန်အာတရဴဂမၠိုၚ်ရ။
သ္အာၚ်နူဂှ်ပၠန် ညံၚ်ဒပ်ပၠန်ဂတးတံ လုပ်ဟွံဂွံဂှ် လ္ပာ်ကံၚ်ဇြဳပၞာန် ပန်ပှော်ဒၟံၚ်လွဟ်ဇၞော်၊ လွဟ်ဍောတ်တံ မွဲဏှမွဲဏှဂှ်ရ ဒးဂွိၚ်ဖေက်ဒၟံၚ် လွဟ်ဇၞော်ဒတုံဗ္တိုဟ်ထ္ကးစှ်ေရဂှ် ညးဍုၚ်ကွာန်အာတရဴ ကၟာတ်ဆိုအ်ဒၟံၚ်တံ ဟီုရ။
ဂၠံၚ်ကွာန် သုၚ်စောဲဒၟံၚ်လၟုဟ်ဂှ်ဝွံ သ္ၚောဲဒၟံၚ်ကဵု သ္ၚိမၞိဟ်မံၚ်တံဂှ်ရ သွံတြးကဵု စၞစတံ ဟွံမွဲတုဲ အာတရဴဍောတ် အာတရဴဇၞော် တံဒှ်တမ် ဒှ်ဒၟံၚ်အခက်အခုဲဂှ်ရ ဟွံမွဲပၟိက်မွဲသာ် လ္ပအာကၠုၚ်တရဴတံညိဂှ် ညးဍုၚ်ကွာန်အာတရဴဂမၠိုၚ် ဖ္တိုက်ဖ္အောဝ်လဝ်ရ။
ညးမၞုံအခေါၚ်ဟီုဂး ခရိုၚ်သဓီု ဒပ်မဟာ ၁ ဗော်သွးကောန်ဂကူကရေၚ် KNU ပဒိုဝ်သဝ်အေနာၚ်ဂှ် ၜိုန်ရမိက်ဂွံအာစိုပ်ကဵုအရီုဗၚ် ကုကွဳစက်ကၟာတ်ဆိုအ်ဒၟံၚ်တံဂှ်ကီုလေဝ် ဟိုတ်နူကံၚ်ဇြဳပၞာန် ပန်ပှော်လွဟ်ဇၞော်တုဲ ညးအာတရဴဂမၠိုၚ် ဇီုကပိုက်ဂှ် ဒးဂွိၚ်ဒၟံၚ်တုဲ ရီုဗၚ်ဟွံမာန်ပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ယာန်အာတရဴလၟုဟ်ဂမၠိုၚ် အာကၠုၚ်ဒၟံၚ်ဂှ် အာကၠုၚ်ဒၟံၚ် ပ္ဍဲတိဍာ်ပိုယ်တံ ထိၚ်ဒက်လဝ်တံဂှ်ရ။ ကွဳစက်ဂမၠိုၚ် ကၟာတ်ဆိုအ်ဒၟံၚ်ဂှ်လေဝ် တီမံၚ်ရ။ လ္ပာ်ပိုယ်တံ ကၠောန်ကဵု ညံၚ်ယာန်ဂွံအာကၠုၚ်ဂွံဂှ်မှ ဂကောံပိုယ်နွံဒၟံၚ်ဂှ် ဒပ်ပၞာန်တီအာမ္ဂး ပန်ပှော်ကဵုလွဟ်ဇၞော်တှ်ေ ဂွိၚ်ဖေက်ဒးသီုညးအာတရဴတံဂှ်ရ ဒှ်ဒၟံၚ်အကာဲအရာ ဒးမၚ်ကျောဝ်ဒၟံၚ် နူကဵုမ္ၚးဏံရ” သာ်ဝွံ သ္ဂးရ။
မွဲလ္ပာ်ဂှ်ပၠန် ညးဍုၚ်ကွာန်အာတရဴဂမၠိုၚ်ဝွံ ဟိုတ်နူဂၠံၚ်ကွဳစက် ကၟာတ်ဆိုအ် ပိုတ်သ္ကုတ်ဒၟံၚ်တံဂှ်တုဲ ဍိုက်ဗက်ကၠုၚ် ကွဳပၟတ်မတ်မလီု−လ္ဂုၚ် သာဂၠိုၚ်ကၠုၚ်တုဲ ညးအာတရဴလ္ၚဵုတံဂှ်တှ်ေ အာကၠုၚ်ဒၟံၚ် နူကဵုတရဴကျာတံ နွံဒၟံၚ်ရ။
ဒဒန်ကြုၚ်အုက် ဒးဒုၚ်ဖံက်ဗ္တိုဟ်မာၚ်တုဲ ပရေၚ်ဆက်စၠောံ ဂၠံၚ်ကွဳစက်မတ်မလီု−လ္ဂုၚ် ပိုတ်အာဂှ်ရ အပ္ဍဲဒေသဂှ် ကၠေၚ်စက်တံကီု ၚုဟ်ကပေါတ်ဗၞိက်တံလေဝ် သၠုၚ်တိုန်ကၠုၚ်တုဲ ပိုတ်သ္ကုတ်ဒၟံၚ်ရ။
ဟိုတ်နူဗ္တိုဟ်လဝ်မာၚ်ဒဒန်ဂှ်တုဲ လ္ပာ်ကံၚ်ဇြဳပၞာန် ပလေဝ်လေတ်ဒၟံၚ် သ္ဂောံထ္ပက်ဒဒန်ယာယဳကီုလေဝ် ပ္ဍဲဂိတုမေ ၁၃ တေံ ဂကောံကၠုၚ်စိုပ်ပလေဝ်ပလေတ်ဒဒန် ဒးဒုၚ်ဗ္တိုက်လဝ်ကဵုဒရုၚ်တုဲ ဒေါအ်ဇူလဝ် ပရေၚ်ပလေဝ်ပလေတ်ဂှ်ရောၚ်ဂှ် ဂွံတီကေတ် ဇရေၚ်ညးမစုက်လုက်ကဵု ကံၚ်ဇြဳပၞာန်တံရ။
ဒဒန်ကြုၚ်အုက်ဝွံ နွံဒၟံၚ် လ္တူဂၠံၚ်ပျဳထံၚ်သု မတ်မလီု−လ္ဂုၚ်တုဲ မ္ၚးနူကဵုပရေၚ်သွံရာန်ဗၞိက်ပယျဵု သေံ−ဗၟာဂှ် သီုကဵုဒှ်ဂၠံၚ်ပၟိက်ဇၞော် သွက်ပရေၚ်သွံရာန်ဗၞိက် တွဵုရးဍုၚ်မန်၊ တွဵုရးကရေၚ် ကေုာံ ရးတၞၚ်သဳတံရ။
ပရိုၚ်−သြၚ်လောန်တိုၚ်(မ်)
ဗီု−CJ