ၜဳကလေၚ်၊ မေ ၁၆
ကွာန်အပ္ဍဲပွိုၚ်ဍုၚ်ၜဳကလေၚ် တွဵုရးဍုၚ်မန်တံဂှ် ဟိုတ်နူဒပ်ကံၚ်ဇြဳပၞာန် ပန်ပှော်ကဵုလွဟ်ဇၞော်တုဲ ညးဒေသ ၅၀၀၀ ပြၚ် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် အတိုၚ်ဂလာန် ညးတာလျိုၚ် ခရိုၚ်သဓီု KNU ရ။
တုဲကၠုၚ် ပ္ဍဲဂိတုမေ ၁၁ တေံ ကြဴနူဒဒန်ကြုၚ်အုက် နွံလ္တူဂၠံၚ်ကွဳစက်လ္ဂုၚ်−မတ်မလီု ပ္ဍဲကွာန်ယှိုဲယံၚ်ပျ ပွိုၚ်ဍုၚ်ၜဳကလေၚ် ဒးဒုၚ်ဗ္တိုဟ်ထ္ကးမာၚ်တုဲဂှ် နူဒပ်ကံၚ်ဇြဳပၞာန် ပန်ပှော်လဝ်လွဟ်ဇၞော် အပ္ဍဲကွာန်ဂမၠိုၚ် ဒၞါဲညးဍုၚ်ကွာန်ကောန်အရာပ်တံ မံၚ်တန်တဴဂှ်ရ။
ဒၟါနူဒပ်ကံၚ်ဇြဳပၞာန် ပန်ပှော်လဝ်လွဟ်ဇၞော် နူဂိတုမေ ၁၁ စဵုကဵုဂိတုမေ ၁၄ အပ္ဍဲပွိုၚ် ၄ တ္ၚဲဂှ်တုဲ ညးဍုၚ်ကွာန်ဒေသ ၅၀၀၀ ပြၚ် နူကဵုကွာန်ယှိုဲယံၚ်ပျ၊ အဝန်ကျဳ၊ ဇြဳဝန်၊ ခလံက်အေန်၊ မယာန်ကုန်တံ ဒးဂြိပ်ဒဴပါဲဒလေတ်ဒၟံၚ်ရောၚ် သ္ဂးရ။
ဟိုတ်နူ ဘဲလွဟ်ဇၞော်ကံၚ်ဇြဳပၞာန်တုဲ ညးဒေသဂမၠိုၚ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲ သီုကဵုလ္တူဍုၚ်ၜဳကလေၚ်ကဵု ဍုၚ်သဓီုတံဂှ်တုဲ ဒဵုကဵုအခိၚ်လၟုဟ် ဟွံဂံၚ်စဴဌာန်ဒၟံၚ်အိုတ်ဏီပုဟ်ဂှ် ဂွံတီကေတ်ရ။
ဒဒန်ကြုၚ်အုက် ဒးဒုၚ်ဖံက်ဗ္တိုဟ်မာၚ်တုဲ ပ္ဍဲဂိတုမေ ၁၁ တေံ နူဒပ်အမၠံက်ကံၚ်ဇြဳပၞာန် စၟတ် ၃၁၄ ဖျေံသ္ဇိုၚ်ကွာန်ဇြဳဝန်ဂှ် ပန်စုတ်လဝ်လွဟ်ဇၞော်တုဲ ဒတုံဗ္တိုဟ်ထ္ကးအာလဝ် ပ္ဍဲကွာန်အဝန်ကျဳကဵု ကွာန်ဒံက်ယိတ်တုဲ ပါလုပ်သီုကဵုကောန်ၚာ်သၟတ်ဂှ် ညးဒေသ ၃ တၠ ချိုတ်တုဲ ၁၄ တၠ ကလိဂွံလဝ်ဝပ်ရ။
သ္အာၚ်နူဂှ်ပၠန် ပ္ဍဲဂိတုမေ ၁၂ ကဵု ၁၃ တေံဂှ်လေဝ် လ္တူဂၠံၚ်ကွာန်မိုဝ်ကံၚ်ကဵု ကွာန်ယှိုဲယံၚ်ပျတံဂှ် လွဟ်ဇၞော်ဒပ်ပၞာန် ဒတုံဗ္တိုဟ်ထ္ကးအာလဝ်တုဲ ညးအာတရဴ ၂ တၠ ချိုတ်တုဲ ၁ တၠ ကလိဂွံလဝ်ဝပ်တုဲ ကွဳစက်မွဲဖ္ဍိုက်လေဝ် လီုလာ်အာလဝ်ကီုရ။
အပ္ဍဲကာလသီအဝဵုဏံ ပ္ဍဲပွိုၚ်ဍုၚ်ၜဳကလေၚ် ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော်တုဲ ညးဍုၚ်ကွာန်ကောန်အရာပ် ဂၠိုၚ်ကဵုဠက် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် အတိုၚ်တၚ်လလောၚ်တြး ခရိုၚ်သဓီု KNU ရ။
ပရိုၚ်−သြၚ်လောန်တိုၚ်(မ်)
ဗီု−KHRG