ၜဳကလေၚ်၊ မေ ၁၆
ပပ္တံနူဂိတုမေ ၁၅ တုဲ လ္တူဒဒန်ကြုၚ်အုက် နွံလ္တူဂၠံၚ်ပျဳထံၚ်သု လ္ဂုၚ်−မတ်မလီု မဒးဒုၚ်ဖံက်ဗ္တိုဟ်လဝ်မာၚ်ဂှ် ကဵုလဝ်အခေါၚ် ကွဳစက်သ္ၚိ တတ်ကၠောံအာကၠုၚ်ယျဂှ် ဂွံတီကေတ် ဇရေၚ်ညးဒေသတံကဵု ညးအာတရဴတံရ။
ဒဒန်ကြုၚ်အုက် နွံပ္ဍဲကွာန်ယှိုဲယံၚ်ပျ ပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ်ဝွံ တုဲကၠုၚ် ပ္ဍဲဂိတုမေ ၁၁ တေံ ဟိုတ်နူဒးဒုၚ်ဗ္တိုဟ်ထ္ကးမာၚ်တုဲ ပါဲနူကဵုဒဒန်ကောန်ကရေတ် သှ်ေဒၟံၚ်ကၠာတေံဂှ် ဒဒန်ဘေလဳ ကလေၚ်သိုၚ်လဝ်တၟိ သီုၜါတၞုၚ် သရိုဟ်စှ်ေလီုအာလဝ်ရ။
ပၞောဝ်ကဵုဒဒန်ၜါတၞုၚ် သရီုလီုစှ်ေအာဂှ် ဒဒန်ကောန်ကရေတ်ဂှ် ညံၚ်ဂွံတတ်ကၠောံအာကၠုၚ် ယာယဳဂွံတုဲ ဗဝ်ဂအုံစုတ်ဗတဳ၊ တၟအ် ပလေဝ်တုဲဂှ် ကွဳစက်သ္ၚိ သၠုၚ်ၚ်တံဂှ်ဟေၚ် စကဵုအခေါၚ်တတ်ကၠောံဒၟံၚ်ရောၚ် ဂွံတီကေတ်ရ။
ညးဒေသၜဳကလေၚ်မွဲတၠဂှ် ပလေဝ်လဝ်ဒဒန်ဂှ်ဟွံသေၚ် ပ္ညဳတိတုဲ နူကဵုလ္တူဒဒန်ကဝ်ဂှ် ကွဳစက်သ္ၚိသၠုၚ်ၚ်တံသၟးရ ကဵုအခေါၚ်တတ်ကၠောံဒၟံၚ်တုဲ ကွဳစက်နူၜဳကလေၚ် အာသဓီုသၟးရ ကဵုကွာ်ဒၟံၚ်ရောၚ် ဟီုရ။
ကွဳစက်ဖ္ဍိုက်ဗၞိက်တံကဵု ကွဳစက်ညးအာတရဴ (မှန်လုံ) တံဂှ် ကဵုအခေါၚ်တတ်ကၠောံဒၟံၚ် နူကဵုဂၠံၚ်ကွာန် ယှိုဲယံၚ်ပျကဵု ကွာန်မိုဝ်ကံၚ်တံဂှ်တုဲ ဂၠံၚ်ကၟာတ်ဆိုအ် ဆက်က္တဵုဒှ်ဒၟံၚ်ဖိုဟ်ရောၚ် သ္ဂးရ။
ဒဒန်ကြုၚ်အုက် ဒးဒုၚ်ဖံက်ဗ္တိုဟ်ပလီုလဝ်ဂှ် သွက်ဂွံသိုၚ်ခၞံအာ ဒဒန်ယာယဳ ဗွဲမပြဟ်ဂှ် ပ္ဍဲဂိတုမေ ၁၂ တေံ သ္ကိုပ်ဝန်ဇၞော် တွဵုရးဍုၚ်မန် ဥူအံၚ်ကျဳတုၚ် စၞောန်ပ္ညုၚ်လဝ်ရ။
ပ္ဍဲဂိတုမေ ၁၃ ဂကောံကၠုၚ်သိုၚ်ဒဒန်ယာယဳ ဒးဒုၚ်ဗ္တိုက်ကဵုဒရုၚ်တုဲ ဒေါအ်ဇူလဝ် ပရေၚ်သိုၚ်ခၞံရောၚ်ဂှ် ဂွံတီကေတ် ဇရေၚ်ညးမစုက်လုက်ကဵု ကံၚ်ဇြဳပၞာန်တံရ။
ဒဒန်ကြုၚ်အုက်ဝွံ နွံဒၟံၚ် လ္တူဂၠံၚ်ကွဳစက်ပျဳထံၚ်သု မတ်မလီု−လ္ဂုၚ်တုဲ သွက်ပရေၚ်သွံရာန်ဗၞိက် ဒေသသ္ကုတ်သၠုၚ်ကျာဍုၚ်ဗၟာ မပ္တံကဵုတွဵုရးဍုၚ်မန်၊ တွဵုရးကရေၚ် ကေုာံ ရးတၞၚ်သဳတံဂှ်တှ်ေ ဒှ်သ္ကုတ်ဂၠံၚ်ပၟိက်ဇၞော်မွဲရ။
ပရိုၚ်−သြၚ်လောန်တိုၚ်(မ်)
ဗီု−Nat Tar/CJ