တၞၚ်သဳ၊ မေ ၁၇
ပ္ဍဲရးတၞၚ်သဳ ပေါဲဗ္တိုက်ဂမၠိုၚ် သာသ္ကာတ်မြဟ်ကၠုၚ်ဂှ် လၟိဟ်ညးပါဲဒဴဘဲပၞာန် ဂၠိုၚ်တိုန်ကၠုၚ် စဵုကဵုပွဳပွူ ၆၀၀၀၀ ရောၚ် ဂွံတီကေတ် ဇရေၚ်ဂကောံသုတေသန ဖျေံသ္ဇိုၚ်ဒေသ FE5 Tanintharyi ရ။
စနူဂိတုဨပရဴတုဲကၠုၚ်တေံတုဲ ပ္ဍဲရးတၞၚ်သဳ ပွိုၚ်ဍုၚ်ထဝါဲ၊ ပဠဝ်၊ တၞၚ်သဳ၊ တယိတ်ချံၚ် ကေုာံ ပွိုၚ်ဍုၚ်ဍာ်ဗုတံဂှ် ပေါဲဗ္တိုက်အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံ သာသ္ကာတ်မြဟ်ကၠုၚ်တုဲ လၟိဟ်ညးပါဲဒဴဘဲပၞာန် ထပ်ဂၠိုၚ်တိုန်ကၠုၚ်ရ။
ညးဍုၚ်ကွာန်ပါဲဒဴဘဲပၞာန်ဂမၠိုၚ်ဝွံ ပေါဲဗ္တိုက်ဂမၠိုၚ် သာသ္ကာတ်မြဟ်ကၠုၚ်တုဲ ဒပ်ကံၚ်ဇြဳပၞာန် ဟိုတ်နူထောံဂြာတ်မခတိုဟ် နကဵုက္ၜၚ်ကျာဂှ်တုဲ ဒးထောံလသာသ္ၚိဌာန် ဒးဂြိပ်ဒဴပါဲဒလေတ်တံ ဂၠိုၚ်တိုန်ကၠုၚ် တီတီဂှ် ညးတာလျိုၚ် FE5 Tanintharyi မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
လၟိဟ်ညးပါဲဒဴဘဲပၞာန် ထပ်ဂၠိုၚ်တိုန်ကၠုၚ်ဂှ်ရ စနူကဵုဇွောံမစၞစ၊ ဂဥုဲဇဗ၊ ဂၠိက်ယာတ်၊ ကၟဳဒဒၚ် ကေုာံ အရပ်စပ်ညးဗြဴလၟေၚ်ဂိတုတံ ဒှ်တမ် နွံပၟိက်ဂၠိုၚ်တိုန်ဒၟံၚ်ရောၚ် သ္ဂးရ။
မွဲလ္ပာ်ဂှ်ပၠန် အဟိန်ပေါဲဗ္တိုက်သာသ္ကာတ်မြဟ်ကၠုၚ်ဂှ် ဒပ်ကံၚ်ဇြဳပၞာန် ဗ္တိုက်ကၠုၚ်ကဵုတရဴကျာ ကေုာံ လွဟ်ဇၞော်တံ သာကၠောန်သ္ပကၠုၚ်ဂှ်ရ သၟာဗ္ၚဒေသဂမၠိုၚ်ဝွံ ကလောန်ကၠအ်ဂူဝါတံဂှ် ဟွံဂွံကၠောန်ရပုဟ်ဂှ် ဂွံတီကေတ်ရ။
ပရေံအိုတ်ဂှ်မ္ဂး ပ္ဍဲကၠအ်ဂူဝါ ကေုာံ ပ္ဍဲဒၞါဲမၞိဟ်အာကၠုၚ်တံဂှ် ကံၚ်ဇြဳပၞာန် ပစူလဝ်မာၚ်တုဲ ကၠောန်ကၠုၚ်ဂှ်ရ လိုန်ဒးမာၚ်တုဲ ကောန်အရာပ်ဇီုကပိုက်ချိုတ်တံ ဆက်က္တဵုဒှ်ဒၟံၚ်ရောၚ် သ္ဂးရ။
အပ္ဍဲရးတၞၚ်သဳဂှ် လၟိဟ်ညးပါဲဒဴဘဲပၞာန်လၟိုန်ဂှ် ပွဳပွူ ၂၀၀၀၀ နွံတုဲ ညးဒဴပၞာန်သှ်ေတံဂှ်တှ်ေ အခိၚ်ပေါဲဗ္တိုက်ဒှ် ပါဲဘဲပၞာန်အိုတ်တုဲ ပေါဲဗ္တိုဟ်ဟွံဒှ်မ္ဂး စဴမံၚ်ဌာန်ဒၟံၚ်အိုတ်ရ။
ညးမရီုဗၚ်ကဵုဒၟံၚ်ပရေၚ်ပါဲဒဴဘဲပၞာန် သွက်ညးပါဲဒဴဘဲပၞာန်လၟိုန်တံဂှ် ရီုဗၚ်ကဵုဒၟံၚ် သွက်ပရေၚ်စသုၚ်မံၚ်စံၚ်၊ သွက်ပရေၚ်ထတ်ယုက်တုဲ သွက်ညးပါဲဒဴဘဲပၞာန်ယာယဳတံဂှ်တှ်ေ အလဵုညးပါဲဒဴဘဲပၞာန်ဂမၠိုၚ် ဒးဖန်ဇန်ဒၟံၚ် သွက်ဂွံစသုၚ်အိုတ်ဏောၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−နွေဦးမေတ္တာ