တယိတ်ချံၚ်၊ မေ ၁၇
ရးတၞၚ်သဳ ပ္ဍဲပွိုၚ်ဍုၚ်တယိတ်ချံၚ်ဂှ် အကြာဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံဂှ် လၟေၚ်ဒဒှ်တ္ၚဲ ပေါဲဗ္တိုက်က္တဵုဒှ်ဒၟံၚ်တုဲ လ္ပာ်ကံၚ်ဇြဳပၞာန် ကလေၚ်ဗ္တိုက်ဒၟံၚ် နကဵုပၞာန်ကျာ၊ ပၞာန်ဍာ်ဏောၚ်ဂှ် ဂွံတီကေတ် ဇရေၚ်ဂကောံဒပ်စဵုဒၞါညးဍုၚ်ကွာန်တံရ။
ဒပ်ကံၚ်ဇြဳပၞာန် ဒးဒုၚ်သီလဝ်ဗ္ဒိုပ် (ပဲဒက်) ပ္ဍဲဂိတုမေ ၈ တုဲကၠုၚ်တေံဂှ်ဝွံ နူဂၠံၚ်ဍာ်မွဲကဆံၚ် လုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်တယိတ်ချံၚ် နကဵုဇြဟတ်ပွဳပွူ ၇၀ ရ။
အတိုၚ်ဂလာန် ဂကောံဒပ်စဵုဒၞါညးဍုၚ်ကွာန်တံဂှ်မ္ဂး အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံဂှ် ပ္ဍဲဂိတုမေ ၁၄ စဵုကဵု ဂိတုမေ ၁၆ ဗ္ဒါဲပွဳပွူကွာန်ကနက်သဳရိဂှ် ပေါဲဗ္တိုက်ၜါလ္ပာ် သ္ကာတ်မြဟ်ဒၟံၚ်ရောၚ် သ္ဂးရ။
အပ္ဍဲပေါဲဗ္တိုက်ဂှ် လ္ပာ်ကံၚ်ဇြဳပၞာန် နကဵုဂျက်ဖိုက်တာ၊ K8W ကေုာံ က္ၜၚ်ကျာသၞေၚ်ဝဲ Mi-2 တံဂှ် ထောံမခတိုဟ်ဗ္တိုက်ဒၟံၚ် မွဲဒမြိပ်ကွာန်ကနက်သဳရိဂှ်တုဲ က္ၜၚ်ပၞာန်ဒပ်ဍာ်ဂှ်လေဝ် ဘိုၚ်ပန်ကဵုဒၟံၚ်လွဟ်ဇၞော် ဟွံပိုတ်သ္ကုတ်ဂှ် ဂွံတီကေတ်ရ။
ညးဒုၚ်တာလျိုၚ် လလောၚ်ပရိုၚ် ကရောၚ်ပၞာန်ဖေဝ်ဒရာ ကိုဝ်မေန်ထက်ဂှ် အပ္ဍဲပေါဲဗ္တိုက်က္တဵုဒှ်လဝ် ပွိုၚ်ပိတ္ၚဲအဆက်က်ဂှ် လ္ပာ်ကံၚ်ဇြဳပၞာန် ဇီုကပိုက်ချိုတ်တံကဵု ကလိဂွံဝပ်တံ ဂၠိုၚ်ဒၟံၚ်တုဲ လ္ပာ်ဂကောံဒပ်စဵုဒါညးဍုၚ်ကွာန်တံလေဝ် ဇီုကပိုက်ကလိဂွံဝပ်တံ နွံဒၟံၚ်ရောၚ် ဟီုရ။
ကံၚ်ဇြဳပၞာန် ဒးဒုၚ်သီလဝ်ဗ္ဒိုပ်ဂှ်ဝွံ ကၠောန်သ္ပၚးတးဒၟံၚ်တိဍာ် ကွာန်မၞုံမွဲဒမြိပ် ကွာန်(ပဲဒက်) ဂှ်တုဲ ဒဵုကဵုအခိၚ်လၟုဟ် ကလေၚ်ဖျေံဒပ် ပ္ဍဲဗ္ဒိုပ် (ပဲဒက်) ဟွံမာန်ဏီပုဟ်ဂှ် သ္ဂးရ။
မွဲလ္ပာ်ဂှ်ပၠန်လေဝ် ဟိုတ်နူဒပ်ကံၚ်ဇြဳပၞာန် ထောံမခတိုဟ်နကဵုက္ၜၚ်ကျာ ကေုာံ စံၚ်ပလီုပလာ်တံဂှ်တုဲ သ္ၚိဒၟံၚ် နူကွာန်ကနက်သဳရိ ဟွံအောန်နူကဵု ၁၆ မ လီုလာ်အာလဝ်ရ။
ဟိုတ်နူကံၚ်ဇြဳပၞာန် ထောံမခတိုဟ် နကဵုက္ၜၚ်ကျာတုဲ ညးဍုၚ်ကွာန်ဒေသ ၅၀၀၀ ပြၚ် နူကဵုကွာန်ကနက်သဳရိ၊ ကျဲမေန်ကုန်၊ ကျံက်ခမံက်၊ ရၚေဝ်၊ တယိတ်ချံၚ်သ္ကုတ်သၟဝ် ကေုာံ ကွာန်ဂုၚ်ညှေန်သုက် တံမပါလုပ် နူကဵုကွာန် ၇ ကွာန်ဟွံအောန် ဒးဂြိပ်ဒဴပါဲဒလေတ်ဒၟံၚ်ဘဲပၞာန်ရ။
တုဲကၠုၚ် ပ္ဍဲဂိတုမေ သတ္တာဟဒုတိယဂှ်လေဝ် ဟိုတ်နူကံၚ်ဇြဳပၞာန် ထောံမခတိုဟ်ဗ္တိုက် နကဵုက္ၜၚ်ကျာတုဲ ညးဒေသ နူကွာန်ကနက်သဳရိကဵု ကွာန်ရၚေဝ်တံ ၅ တၠ ချိုတ်အာလဝ်တုဲ သီုကောန်ၚာ်သၟတ် မပါလုပ် ဟွံအောန်နူကဵု ၉ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ