ကျာ်မြဟ်၊ မေ ၁၇
အပ္ဍဲကွာန် နူဒေသၜဳဂြာၚ် ပယျဵုတွဵုရးကရေၚ်ကဵု တွဵုရးဍုၚ်မန် ပေါဲဗ္တိုက်သ္ကာတ်မြဟ်လဝ်ဂှ် ကောန်ဒပ်ကံၚ်ဇြဳပၞာန်တံ ဖျေံလဝ်ဒပ်တုဲ ညးဍုၚ်ကွာန်ဒေသဗွဲမဂၠိုၚ် ဒးဂြိပ်ဒဴပါဲဒလေတ်ဒၟံၚ်ဒၞါဲဗၠးဘဲဂမၠိုၚ် ဟွံဂံၚ်စဴဌာန်ဒၟံၚ်အိုတ်ဏီပုဟ်ဂှ် ဂွံတီကေတ် ဇရေၚ်ညးဒေသတံရ။
အပ္ဍဲမွဲဂိတုပြၚ် တုဲကၠုၚ်တေံ ပ္ဍဲကွာန်ကအ်ဗိန်၊ ကွာန်ဓမ္မသ၊ ကွာန်သၚ်ကၠံ ကေုာံ ပွဳပွူကွာန်ကြေဝ်ဏာတံဂှ် ပေါဲဗ္တိုက်ဒိဓဗတ် အကြာဒပ်ကံၚ်ဇြဳပၞာန် ကဵု ဒပ်မဟာမိတ်ဒပ်ပၠန်ဂတးရပ်လွဟ်တံ သ္ကာတ်မြဟ်လဝ်ရ။
ကြဴနူဂှ်တုဲ ဒပ်ကံၚ်ဇြဳပၞာန် ကလေၚ်ထိၚ်ဂွံလဝ် ကွာန်ဓမ္မသ ကဵု ကွာန်ကအ်ဗိန်ဂှ်တုဲ စနူဂိတုဨပရဴ သတ္တာဟလက္ကရဴအိုတ်ဂှ်တုဲ ညးဍုၚ်ကွာန်ပါဲဒဴဘဲပၞာန်တံ ဂွံကလေၚ်စဴဌာန်ဒၟံၚ်ဂှ် ဖ္တိုက်ဖ္အောဝ်လဝ်ရ။
ဆ္ဂး အပ္ဍဲကွာန်တံဏံဂှ် ဒပ်ကံၚ်ဇြဳပၞာန် လုပ်စိုပ်ဖျေံလဝ်ဒပ် သီုဗ္ဒိုပ်ဗၠာဲသၟိၚ် သီုဒၞါဲဂၠံၚ်ပိပန်သွာၚ်၊ ဂၠံၚ်လုပ်ကွာန်တံကဵု ပ္ဍဲကဵုသ္ၚိကောန်အရာပ် ထပ်သၠုၚ်ၚ်တံဂှ်တုဲ ညးဍုၚ်ကွာန်ပါဲဒဴဘဲပၞာန်ဗွဲမဂၠိုၚ် စဴဌာန်ဒၟံၚ်ဟွံဂွံဏီပုဟ်ဂှ် ညးဒေသတံ သ္ဂးအိုတ်ရ။
“ညးလ္ၚဵုလ္ၚဵု မၞိဟ်တြုံတံဂှ်တှ်ေ စစဴကၠုၚ်ဒၟံၚ်ယျ။ အရာပ်ကံၚ်ဇြဳပၞာန် နွံတံဂှ်တှ်ေ ညးတံ(ကောန်အရာပ်) ဟွံဂံၚ်စဴကၠုၚ်ဏီပုဟ်။ မုဒှ်ရောဟီုတှ်ေ လုပ်ဖံက်ကၠတ်ဂၠံက်လဝ် သ္ၚိညးတံ နွံရ။ ညးတံဖေက်တုဲ ဟွံဂံၚ်စဴအိုတ်ရ” သာ်ဝွံ ညးဒေသကအ်ဗိန်မွဲတၠ သ္ဂးရ။
သ္အာၚ်နူဂှ်ပၠန် အပ္ဍဲကွာန်နွံမွဲဒမြိပ်ဂၠံၚ်ကွဳစက်ရမ္မာဝတဳ မပ္တံကဵုကွာန်ကြေဝ်ဏာ၊ ကွာန်သၚ်ကၠံ၊ ကွာန်ဓမ္မသ၊ ကွာန်ကအ်ဗိန်တံဂှ် အခေါၚ်တတ်ကၠောံအာကၠုၚ်တံဂှ်လေဝ် ကောန်ဒပ်ကံၚ်ဇြဳပၞာန်တံ ကၟာတ်လဒဵုလဝ်တုဲ ပရေၚ်စၟဳတ်တေၚ်ဂြတ်တံလေဝ် နွံဒၟံၚ်ပၠန်ရ။
မွဲလ္ပာ်ဂှ်ပၠန် ပ္ဍဲကဵုကွာန်ကအ်သိုခ်၊ ကွာန်ကအ်ဇြဲ၊ ကွာန်ကြေဝ်ဏာ၊ ကွာန်သၚ်ကၠံ၊ ကွာန်ဓမ္မသ၊ ကွာန်ကအ်ဗိန် ကေုာံ ကွာန်ဗ္ဒါဲဗ္ဒါဲ နူအပ္ဍဲဒေသၜဳဂြာၚ်တံဂှ် သ္ၚိဒၟံၚ်ဗွဲမဂၠိုၚ်ဂၠေၚ် ဒးဒုၚ်ကၠတ်ဂၠံက်လဝ်တုဲ ဒၞါဲဒပ်ကံၚ်ဇြဳပၞာန် ဖျေံလဝ်ဒပ်တံဂှ် ညးဗြဴဂမၠိုၚ် ဒးဒုၚ်ကလိလောန် စပ်ကဵုလိၚ်တံလေဝ် နွံဒၟံၚ်ရောၚ် ပရိုၚ်မံက်တိတ်ဒၟံၚ်ရ။
ပ္ဍဲလၟေၚ်ဒဒှ်သ္ၚိဒးဒုၚ်စံၚ်တံဂှ်လေဝ် ကောန်ဇာတ်ဂြောဝ်ဂတာဂမၠိုၚ် ဒးဂြိပ်ပါဲဒလေတ်လဝ် ဒၞါဲဗၠးဘဲ ထ္ကးပြးအာအိုတ်တုဲ ဇွအုဲအေၚ်ဒၟံၚ်တံ နွံဒၟံၚ်အပ္ဍဲသ္ၚိဂှ်လေဝ် ထပ်ဂွံမိၚ်ကေတ်ဒၟံၚ်ရောၚ် ဂွံတီကေတ် နူကဵုကံၚ်ဇြဳဖေဝ်ဒရာဍုၚ်မန် MSFC ရ။
အကာဲအရာပရေံဒၟံၚ်သာ်ဏံ ဆက်နွံဒၟံၚ်ဂှ် ညးဍုၚ်ကွာန်ဒေသတံ တီဒၟံၚ်ကီုလေဝ် ဟိုတ်နူပရေၚ်ဂီုကၠီု ညးမသှ်ေဒၟံၚ်တံဂှ်တုဲ ဟွံဂံၚ်ဟီုကီု ဟွံဂွံအခေါၚ်ဟီုပ္တိတ်တံဂှ်တုဲ ဒှ်ဒၟံၚ်အကာဲအရာ ဟွံဂံၚ်စဴအိုတ်ရ။
မိသုတဇဝ် သ္ကိုပ်ဌာနဟံၚ်ပြာ် ကေုာံ ပရေၚ်ဗ္စာရဏာမၞိဟ် ကံၚ်ဇြဳဖေဝ်ဒရာဍုၚ်မန် MSFC ဂှ် ဟိုတ်နူအကာဲအရာတံဏံတုဲ မၞိဟ်ဗြဴအာယုက်ဇၞော်ဇၞော်တံကဵု ကောန်ၚာ်သၟတ်ဂမၠိုၚ် ဟွံဂံၚ်စဴဌာန်ဒၟံၚ်အိုတ်ဏီပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဗွဲတၟေၚ် မၞိဟ်ဇၞော်ဇၞော်၊ မၞိဟ်ဗြဴ၊ ကောန်ၚာ် မၞိဟ်ဒးဂွိၚ်တံဂှ် ဟွံဂံၚ်စဴအိုတ်ဏီပုဟ်။ စဴတုဲ ကလေၚ်တိတ်ဟွံလောဲဂှ်လေဝ် ဂွိၚ်ဒၟံၚ်တုဲ စဴဂှ် မိက်ဂွံစဴဒၟံၚ်အိုတ်ယျ။ ဆ္ဂး ဒပ် စကစတံ ဟွံတိတ်တှ်ေ ညးဒေသတံ ဂွံစဴစိုတ်ၜိုဟ်ဟ် ဗွဲတၟေၚ် မၞိဟ်ဂြိပ်ဟွံမာန်တံ ဂွံစဴဂှ် ဒှ်ဟွံမာန်ဏီပုဟ်ဂှ် ညးဒေသတံ ဟီုဂးဒၟံၚ်အိုတ်ရ” သာ်ဝွံ သ္ဂးရ။
ပ္ဍဲကွာန်ဓမ္မသ ဒၞါဲသ္ၚိဒၟံၚ်ကောန်အရာပ် ၃၀၀ ပြၚ်ကဵု စမြိုၚ်သာသနာဂမၠိုၚ် ပၟတ်တူဒှ်အာဆောံဂှ် ညးဍုၚ်ကွာန်ဒေသတံ စဴဌာန်ဒၟံၚ်ဟွံဂွံဏီတုဲ ကမၠောန်ကလေၚ်ပ္တန်ပ္တူတံဂှ်လေဝ် လ္ပာ်ကံၚ်ဇြဳပၞာန် ထ္မံက်ရုပ်ရဴဟွံမာန်ဏီပုဟ်ဂှ် ကောန်ကွာန်မွဲတၠ ဟီုရ။
အပ္ဍဲကွာန်ဓမ္မသ စမြိုၚ်သ္ၚိဒၟံၚ် မ္ဒးလီုလာ်အာလဝ်တံ မပါလုပ် ကွးဘာဂမၠိုၚ် ဂွံဆက်ကတ်ဗ္တောန်ပညာမာန်၊ ပရေၚ်မၚ်မွဲရံၚ်စံၚ်ပရေၚ်ထတ်ယုက်၊ ပၟတ်ဓာတ်လလဳ ကေုာံ ဍာ်သုၚ် အရာနွံပၟိက်ဂမၠိုၚ် သ္ဂောံဂွံဂှ် သွက်ဂွံရေၚ်တၠုၚ်ကဵု ဗွဲမပြဟ်ဂှ် ပ္ဍဲဂိတုမေ ၇ တေံ ဥူအံၚ်ကျဳတုၚ် သ္ကိုပ်ဝန်ဇၞော် တွဵုရးဍုၚ်မန် ကံၚ်ဇြဳပၞာန်ခါန်ကၞက်ဂှ် ဟီုလဝ်ရ။
အပ္ဍဲပေါဲဗ္တိုက်ဒေသၜဳဂြာၚ် စကၠုၚ် နူပေါဲဗ္တိုက်သီဗ္ဒိုပ်ဗၠာဲသၟိၚ်ကအ်ဗိန်ဂှ် ကွာန်မၞုံမွဲဒမြိပ် ဂၠံၚ်ကွဳစက်ရမ္မာဝတဳ ၁၀ ကွာန်ဟွံက ညးဍုၚ်ကွာန်ဒေသ စဵုကဵုမွဲကိုဋ်ပြၚ် ဒးထောံလသာဌာန်ဒၟံၚ်တုဲ ဟိုတ်နူပရေၚ်ပန်ပှော်ကံၚ်ဇြဳပၞာန်တုဲ ကောန်အရာပ် ဟွံအောန်နူကဵု ၃၀ ဒးချိုတ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ