မတ်မလီု၊ မေ ၁၇
အပ္ဍဲကာလသီအဝဵု ပွိုၚ်ပိသၞာံပြၚ်ဏံ ၚုဟ်ထဝ်မဳဠေန်အပ္ဍဲဍုၚ်ဝွံ မွဲဒကေဝ်ဂှ် ၚုဟ်သၠုၚ်တိုန်ကၠုၚ် စဵုကဵု ၅၀ ကိုဋ်ဒ္ကေဝ်ပြၚ်ရောၚ် တၠကမၠောန်ထဝ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်ထဝ်မဳဠေန်အပ္ဍဲဍုၚ် အပ္ဍဲဂိတုမေ သတ္တာဟပထမတေံ ဗွဝ်ဖျာမ္ၚးဏံ ၚုဟ်မၞုံလဝ် မွဲဒကေဝ် ၜိုတ် ၄၇ ကိုဋ်ဒ္ကေဝ်ဂှ် ပ္ဍဲဂိတုမေ ၁၆ ဂှ် ၚုဟ်ထပ်သၠုၚ်တိုန်လဝ် စဵုကဵု ၅၀ ကိုဋ်ဒ္ကေဝ်ပြၚ်ရ။
ၚုဟ်ထဝ်အပ္ဍဲဍုၚ် ဂွံသၠုၚ်တိုန်ကၠုၚ်ဂှ်ဝွံ ကရောံၚုဟ်ဒဝ်ဠာ သၠုၚ်တိုန်ကၠုၚ် တီတီဂှ် သီုကဵုၚုဟ်ထဝ်ဂၠးတိလေဝ် သၠုၚ်တိုန်လဝ် မဒှ်ရောၚ်ဂှ် ဂွံတီကေတ် ဇရေၚ်တၠကမၠောန်ထဝ်ဂမၠိုၚ်ရ။
တၠကမၠောန်ထဝ်မွဲတၠဂှ် ၚုဟ်ထဝ်အပ္ဍဲဍုၚ်ဝွံ ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်တုဲ မၞိဟ်တိတ်ဍုၚ်သ္အာၚ်ဂၠိုၚ်တုဲ ပရေၚ်ရာန်သြန်ဍုၚ်သ္အာၚ်လေဝ် ဂၠိုၚ်ဒၟံၚ်ဂှ်ရ ၚုဟ်ဒဝ်ဠာ ထပ်တိုန်ကၠုၚ်ရောၚ်ဂှ် ဟီုရ။
“ၚုဟ်ထဝ်တိုန်၊ ၚုဟ်လှုဲတိုန် ဟီုဂွံရ။ သၞောဝ်ယိုက်ဂၠေၚ်လျိုၚ်ပၞာန်လေဝ် တိတ်ကၠုၚ်လဝ်ဟွံသေၚ်ဟာ။ တိတ်ကၠုၚ်တုဲ မၞိဟ်တံဂှ်တှ်ေ ဍုၚ်ဇကုခံၚ်ဂှ် တိတ်အာအိုတ်ရ။ ၚုဟ်သြန်ၝာတ်သေံဂှ်လေဝ် ကၠာတေံ နူကဵု ၈၀ ပြၚ် ၉၀ ပြၚ်ဂှ် လၟုဟ်တှ်ေ ၁၁၀ ပြၚ်အာယျ။ လအာတုပ်သာ်ဂှ်ကီု ဒဝ်ဠာအမေရိကာန်ဂှ်လေဝ် တိုန်အာဟွံအောန်ရ” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲကဵုဟိုတ်ၚုဟ်ထဝ်ဂွံတိုန်ကၠုၚ်ဂမၠိုၚ် ဒၟါနူအကာဲအရာ ပရိုၚ်ကောလဟာလ ဥက္ကဌတိုက်သြန် CB ဒးဒုၚ်ရပ်ဂှ်ကဵု ကမၠောန်ကျဖျတံ မဒှ်ရောၚ်ဂှ် ဂွံတီကေတ် နူဗွိုၚ်တၠကမၠောန်ထဝ်တံရ။
ၚုဟ်ထဝ်အပ္ဍဲဍုၚ် ထပ်သၠုၚ်တိုန်ကၠုၚ်ဂှ်ရ အပ္ဍဲဗွဝ်ဖျာ ပရေၚ်သွံရာန် စှ်ေကၠုၚ်တီတီတုဲ ပရေၚ်သွံတြး ထဝ်ဒကောၚ်မဳဠေန်လေဝ် ဒေါအ်ဇူလဝ်ရောၚ် တၠကမၠောန်ထဝ်တံ ဟီုရ။
စပ်ကဵုၚုဟ်ထဝ်အပ္ဍဲဍုၚ် ထပ်သၠုၚ်တိုန်ကၠုၚ်ဂှ်တုဲ လ္ပာ်ကံၚ်ဇြဳပၞာန် ကဵုသတိကေတ်အရေဝ် ကုညးဝေၚ်ၚုဟ်ထဝ်တံ နွံကီုလေဝ် ထိၚ်ၚုဟ်ထဝ် ဟွံမာန်ဏီရ။
ၚုဟ်ထဝ်အပ္ဍဲဍုၚ်ဝွံ ပ္ဍဲလက်ထက်အလဵုအသဳ NLD တုဲကၠုၚ်တေံဂှ် ထဝ်ဒကောၚ်မဳဠေန် မွဲဒကေဝ် နူကဵုနွံကၠုၚ် ဗ္ဒါဲ ၁၃ ကိုဋ်ဒ္ကေဝ်ဓဝ်ဂှ် ကြဴနူဒပ်ပၞာန်သီအဝဵုတုဲ သၠုၚ်တိုန်ကၠုၚ် စဵုကဵုဗ္ဒါဲ ၃ ဆတုဲ ၚုဟ်ဟွံညိၚ်ဂှ်လေဝ် က္တဵုဒှ်ဒၟံၚ် ကြပ်အရိုဟ်ဒဒှ်တ္ၚဲရ။
ပရိုၚ်−သြၚ်လောန်တိုၚ်(မ်)
ဗီု−CJ