တၞၚ်သဳ၊ မေ ၁၈
ပ္ဍဲရးတၞၚ်သဳ ပေါဲဗ္တိုက်ဂမၠိုၚ် သ္ကာတ်မြဟ်ဒၟံၚ်ဂှ် တုဲကၠုၚ် အပ္ဍဲဂိတုဨပရဴ ပွိုၚ်မွဲဂိတုတေံ ဟိုတ်နူဒပ်ကံၚ်ဇြဳပၞာန် ကေုာံ ဟိုတ်နူဂကောံဇြဟတ်ပၠန်ဂတးရပ်လွဟ်တံ ရပ်ဒက်ဂစိုတ်ဂယိုၚ်လဝ်တုဲ ကောန်အရာပ် ၁၃ တၠ ချိုတ်အာလဝ်တုဲ ၁၁၃ တၠဟွံအောန် ဒးဒုၚ်ရပ်လဝ်ရောၚ် ဂွံတီကေတ် ဇရေၚ် FE5 Tanintharyi ရ။
အပ္ဍဲဂိတုဨပရဴ တုဲကၠုၚ်တေံ ဒၟါနူဂကောံစဵုဒၞါညးဍုၚ်ကွာန်တံ ၚးတးပသောၚ်ရဲကဵုပရိုၚ်ဒပ်ပၞာန်တံတုဲ ပရေၚ်ဒးဒုၚ်ဂစိုတ်ဂယိုၚ်တံ ကလေၚ်က္တဵုဒှ်ကၠုၚ်တုဲ ဟိုတ်နူဒပ်ကံၚ်ဇြဳပၞာန်ကဵု ဂကောံသၟဝ်တဲဂမၠိုၚ် ပြိုက်ဂစိုတ်ဒၟံၚ် နကဵုတၚ်ရန်တၟံနွံနွံဂှ်ရ ကောန်အရာပ်ချိုတ်တံ နွံဒၟံၚ်ရ။
သ္အာၚ်နူဂှ်ပၠန် အခိၚ်ဒပ်ကံၚ်ဇြဳပၞာန် ထ္ပက်ကရောၚ်ပၞာန် လုပ်စိုပ်ကၠုၚ်ဂှ် ရပ်ဒက်ညးဒေသတံ နဒဒှ်ဇွောံစဵုဒၞါပၞာန်ဂှ်ကီု၊ ရပ်ကော်ဏာ မွဲဒမြိပ်ကရောၚ်ပၞာန်တံဂှ်ကီု၊ အခိၚ်ဒးဒုၚ်ရပ် ချိုတ်အာဂှ်ကီု၊ ထ္ၜးဟိုတ်ကဵု စရၚ်ကၟုဲတုဲ ရပ်ဒက်အာတ်လှုဲတံ နွံလဝ်ရောၚ် FE5 Tanintharyi သ္ဂးရ။
မွဲလ္ပာ်ဂှ်ပၠန် ဂကောံဒပ်စဵုဒၞါညးဍုၚ်ကွာန်တံ ၚးတးပသောၚ်ရဲကဵုပရိုၚ်တုဲ ပ္ဍဲကဵုမၞိဟ်ဒးဒုၚ်ဂစိုတ် ၃ တၠဂှ် မွဲတၠဂှ်ဝွံ မှာရာတုဲ ဒးဒုၚ်ဂစိုတ်လဝ်ရောၚ် ဟီုဂးဒၟံၚ်တံလေဝ် နွံဒၟံၚ်ရ။
တုဲကၠုၚ် ပ္ဍဲဂိတုဨပရဴ ၁၂ တေံ အခိၚ်အာရပ် ဥူကျဳလေဝ် ညးမဍုက်ကေဝ်ကဵု ကံၚ်ဇြဳပၞာန် ဒၟံၚ်ကွာန်(ပြၚ်းထိန်) ပွိုၚ်ဍုၚ်လံၚ်လုၚ်ဂှ် ပန်ဒးအာတုဲ ချိုတ်အာလဝ်ရောၚ် ဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ် လလောၚ်ပ္တိတ်လဝ်ရ။
ဆ္ဂး ညးဒေသကွာန်ဂမၠိုၚ်ကဵု ဂကောံဇြဟတ်အပ္ဍဲဒေသ ၁၃ ဂကောံဂှ် ဥူကျဳလေဝ်ဝွံ ဒှ်ညးကဵုပရိုၚ် ကုကံၚ်ဇြဳပၞာန် ဟွံသေၚ်ဂှ်ရ စပ်ကဵုဒးဒုၚ်ဂစိုတ်တုဲ ညံၚ်သ္ဂောံကလိဂွံဓဝ်ဍာံဂှ် တေၚ်စိုပ်လဝ် ကုအလဵုအသဳညဳသၟဟ်ဂကူ NUG ရ။
ဒပ်ကံၚ်ဇြဳပၞာန်ကဵု ဂကောံသၟဝ်တဲညးတံ ပြိုက်ဂစိုတ်လဝ်တံလေဝ် နွံလဝ်တုဲ အပ္ဍဲဂိတုဨပရဴဂှ် လွဟ်ဇၞော် ဒတုံဗ္တိုဟ်ထ္ကးအာကီု၊ လိုန်ဒးမာၚ် ဒပ်ပၞာန်ပစူလဝ်ဂှ်ကီု ကေုာံ နကဵုတၚ်ရန်တၟံနွံနွံ ဒးဒုၚ်ဂစိုတ်ဂယိုၚ်တံဂှ်တုဲ ကောန်အရာပ် ၅ တၠ ချိုတ်အာလဝ်တုဲ သှ်ေ ၅ တၠဂှ် တၠဒုဟ်ဟွံမံက်မွဲသာ် ဒးဒုၚ်ဂစိုတ်လဝ်ရောၚ် FE5 Tanintharyi သ္ဂးရ။
အပ္ဍဲဂိတုဨပရဴ ပေါဲဗ္တိုက်ကလေၚ်မွဲဝါပၠန်တံ သ္ကာတ်မြဟ်ကၠုၚ်ဗက် ဒၟါနူဒပ်ကံၚ်ဇြဳပၞာန် ရပ်ဒက်တုဲ ပ္ဍဲခရိုၚ်ထဝါဲ ပ္ဍဲကဵုပွိုၚ်ဍုၚ် ၄ ပွိုၚ်ဍုၚ်ဂှ် ညးဍုၚ်ကွာန်ကောန်အရာပ် ဟွံအောန်နူကဵု ၉၄ တၠ ဒးဒုၚ်ရပ်လဝ်တုဲ ၇၆ တၠ ကလေၚ်ဗလးကၠုၚ်တုဲ ၂ တၠ ချိုတ်အာလဝ်ရ။
ညးဍုၚ်ကွာန်ကောန်အရာပ် ဒးဒုၚ်ရပ်လဝ် နူကဵုပွိုၚ်ဍုၚ်ဗိက်ကဵု ပွိုၚ်ဍုၚ်ဘုတ်ပြၚ်း ဟွံအောန်နူကဵု ၁၀ တၠ နွံလဝ်တုဲ ကလေၚ်ဗၠးကၠုၚ်လဝ် သီုညးဖအိုတ်တုဲ ပ္ဍဲခရိုၚ်ထဝါဲကဵု ခရိုၚ်ဗိက် ညးဒးဒုၚ်ရပ်ကဵု ဒပ်ရပ်လွဟ်တံဂှ် ၉ တၠ နွံလဝ်တုဲ အဆက်လက္ကရဴ ဟွံဂွံတီကေတ်ဏီပုဟ်ဂှ် သ္ဂးရ။
တုဲကၠုၚ် အပ္ဍဲသၞာံ ၂၀၂၃ တေံ ပ္ဍဲရးတၞၚ်သဳ ဟိုတ်နူဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးရပ်လွဟ်တံ ဂစိုတ်ဂယိုၚ်လဝ်တုဲ ညးဍုၚ်ကွာန်ကောန်အရာပ် ဟွံအောန်နူကဵု ၂၆၅ တၠ ချိုတ်အာလဝ်ရောၚ် ဂွံတီကေတ် အတိုၚ်လိက်ဒုၚ်စဳရေၚ် FE5 Taninthharyi ရ။
ပရိုၚ်−သြၚ်လောန်တိုၚ်(မ်)
ဗီု−FE5 Tanintharyi