ရေဝ်၊ မေ ၁၈
ဂိတုမေ ၁၆ အခိၚ်လဒေါဝ်တ္ၚဲ ဒပ်ကံၚ်ဇြဳပၞာန် နကဵုဇြဟတ်ဗွဲမဂၠိုၚ်ဂၠေၚ် ရပ်ဒက်ဏာလဝ် ညးထံက်ဂလာန်ဗော် NLD ဒၟံၚ်ကွာန်ဟံၚ်ဂါံ ပွိုၚ်ဍုၚ်ရေဝ် တွဵုရးဍုၚ်မန်ဂှ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
လုပ်စိုပ်ရပ်ဒက်ဏာလဝ် ဥူတေန်ဇြုၚ် အာယုက် ၅၀ သၞာံပြၚ် ညးမဒှ်ရဲထံက်ဂလာန်ဗော် NLD နကဵုဇြဟတ်လၟိဟ်ဗွဲမဂၠိုၚ်ဂၠေၚ် ပ္ဍဲကဵုသ္ၚိညး နကဵုကွဳစက်ပၞာန် ၆ ဖ္ဍိုက်၊ ဇြဟတ် ၃၀ ပြၚ်ရ။
မူဟိုတ်ဂွံရပ်ဒက်ဏာလဝ် ဥူတေန်ဇြုၚ်ရောဟီုဂှ် ဟွံဂွံတီကေတ်ဏီကီုလေဝ် အခိၚ်လၟုဟ် ရပ်ဒက်လဝ် ပ္ဍဲဗ္ဒိုပ်ဗၠာဲသၟိၚ် ၝောံဍုၚ်ရေဝ်ရောၚ် ဂွံတီကေတ် အတိုၚ်ဂလာန် ညးဒေသတံရ။
ဒပ်ကံၚ်ဇြဳပၞာန် လုပ်စိုပ်ရပ်ဒက်ဏာလဝ် ဥူတေန်ဇြုၚ် အခိၚ်လဒေါဝ်တ္ၚဲဒၚ်ၚ်ဂှ်ရ ညးဍုၚ်ကွာန်ဒေသတံ ဒှ်ဓဝိၚ်လကိုတ်တ္ၚဵု က္တဵုဒှ်လဝ်အိုတ်ရောၚ် သ္ဂးရ။
ဥူတေန်ဇြုၚ်ဝွံ အခိၚ်ပေါဲရုဲမာဲ သၞာံ ၂၀၂၀ တေံ ပ္ဍဲကွာန်ဟံၚ်ဂါံ ညံၚ်ဗော် NLD ဂွံဂွံဇၞး သ္ကိုပ်သ္ကတုဲ စန်ဒက်လဝ်မာဲဂှ် ဂွံတီကေတ်ရ။
ညးဒေသလ္ၚဵုတံဂှ်တှ်ေ ဒဒှ်မရပ်စပ် ဥူတေန်ဇြုၚ်ဂှ်ဝွံ ဒၟါနူတၚ်တေၚ်စိုပ် ဆက်စပ်ဒၟံၚ်ကဵု ဒပ်စဵုဒၞါညးဍုၚ်ကွာန် PDF တံ နွံဒၟံၚ်ဏောၚ်ဂှ်တုဲ ဒးဒုၚ်ရပ်ဒက်လဝ် ဒှ်မာန်ရောၚ် သ္ၚဳဂၠိပ်ဒၟံၚ်တံ နွံဒၟံၚ်ရ။
တုဲကၠုၚ် ပ္ဍဲဂိတုဂျာန္နဝါရဳ ၂၂ တေံဂှ်လေဝ် ဒပ်ကံၚ်ဇြဳပၞာန် ရပ်ဒက်ဏာလဝ် တၠဆေၚ်ယှိုဲဒံၚ်ကျဳ ကိုဝ်နေပိုၚ် ကဵု သ္ကအ်ရဲညးၜါတၠ တၞုၚ်ကွာန်အစေန် ပွိုၚ်ဍုၚ်ရေဝ်ဂှ်တုဲ ဒဵုကဵုအခိၚ်လၟုဟ် ဟွံဗလးကၠုၚ်ဏီပုဟ်ဂှ် ဂွံတီကေတ်ရ။
အတိုၚ်လိက်ဒုၚ်စဳရေၚ် ဇြဟတ်ရာမညဖေဝ်ဒရာခေတ်တၟိ NRFF ပၞာန်သီအဝဵုပေၚ်ပိသၞာံဂှ်မ္ဂး ပ္ဍဲတွဵုရးဍုၚ်မန် ဒပ်ကံၚ်ဇြဳပၞာန် ထ္ၜးဟိုတ်နာနာတုဲ ဒၟါနူရပ်စပ်ဒၟံၚ်ဂှ်ရ ညးဒေသ ၉၀၀ ဟွံက ဒးဒုၚ်ရပ်လဝ်ရောၚ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု-CJ