ၜဳကလေၚ်၊ မေ ၁၈
ဒဒန်ကြုၚ်အုက် မသရိုဟ်လီုစှ်ေအာ နူကဵုကွာန်ယှိုဲယံၚ်ပျ ပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ် သ္ကဲဒဒန်ဂှ် ဒၟါနူဖံက်လဝ်ဂၠံၚ်တိ တုဲဒှ်အာဂှ်ရ စနူဂိတုမေ ၁၇ တုဲ ယာန်ကွဳစက်သီုဖအိုတ် စကဵုအာအခေါၚ်တတ်ကၠောံယျဂှ် ဂွံတီကေတ် အတိုၚ်ဂလာန် ညးဒေသတံရ။
ဒဒန်ကြုၚ်အုက် နွံဒၟံၚ် လ္တူဂၠံၚ်ကွဳစက် လ္ဂုၚ်−မတ်မလီုဂှ်ဝွံ တုဲကၠုၚ်ပ္ဍဲဂိတုမေ ၁၁ ပယျာံဂယးဂှ် ဟိုတ်နူဒးဒုၚ်ဖံက်ဗ္တိုဟ်လဝ်မာၚ်တုဲ သရိုဟ်လီုစှ်ေအာဂှ်ရ အတိုၚ်ဂၠံၚ်ဆက်စၠောံမွဲတၞုၚ် ပိုတ်သ္ကုတ်အာလဝ်ရ။
ကြဴနူဂှ်တုဲ ကွဳစက်ဖ္ဍိုက်ဗၞိက်တံကဵု ယာန်အာတရဴဂမၠိုၚ်ဝွံ စကာကၠုၚ်ဂၠံၚ်ကွာန် ယှိုဲယံၚ်ပျကဵု ကွာန်မိုဝ်ကံၚ်တံဂှ်ကီုလေဝ် ဒၟါနူဂၠံၚ်ဍန်ဂှ်ရ တရဴမ္ဒးအာ ၜိုတ် ၂၀ မိနေတ်ဂှ် ဒးမၚ်ကဵုနာဍဳတုဲ ဒးအာကၠုၚ်လဝ်ရ။
အခိၚ်လၟုဟ် သ္ကဲဒဒန်ကြုၚ်အုက် မသရိုဟ်လီုစှ်ေအာလဝ်ဂှ် ကၠောန်ဂၠံၚ်တိယာယဳ တုဲဒှ်အာဂှ်ရ ပပ္တံနူဂိတုမေ ၁၇ တုဲ သီုကဵုကွဳစက်ဖ္ဍိုက်ပ္တိုန်ဗၞိက်တံ မပါလုပ် ယာန်အာတရဴဂမၠိုၚ် ကဵုအခေါၚ်တတ်ကၠောံစမ်ယျဂှ် ညးဒေသတံ ဟီုရ။
ဂၠံၚ်တိယာယဳလၟုဟ်ဂှ်တှ်ေ ဒဳမွဲလ္ပာ်ရဂွံတုဲ ကွဳစက်စိုပ်ဒၟံၚ်လ္တူဒဒန် သီုလ္ပာ်တေံ၊ လ္ပာ်ဏံတံဂှ်တှ်ေ ဒးတတ်ကၠောံဒၟံၚ် ညးမွဲ မွဲလတုန်ဏောၚ်ဂှ်ရ ကွဳစက်ဆိုအ်ဗတံ ဆက်က္တဵုဒှ်ဒၟံၚ်ရောၚ် သ္ဂးရ။
ဒဒန်ကြုၚ်အုက်ဂှ်ဝွံ အခိၚ်ကသီုမ္ဂး ဍာ်ကၠောံလေပ်ဂှ်ရ ကၠာဂွိုအ်စိုပ်ကသီု ယဝ်ထ္ပက်ဒဒန်ယာယဳ ဟွံမာန်မ္ဂး အခက်အခုဲပရေၚ်ဆက်စၠောံဂၠံၚ်ဍာန်တံ ကလေၚ်က္တဵုဒှ်မာန်ရောၚ် ဂွံတီကေတ် အတိုၚ်ဂလာန်ညးဒေသတံရ။
သၞာံတုဲကၠုၚ် ဂိတုဂျောန် ၂၉ ဂှ် ဒပ်ပံၚ်ကောံ KNLA တံ ဟိုတ်နူဖံက်ဗ္တိုဟ်လဝ်မာၚ် ကုဒဒန်ကြုၚ်အုက် အလန်ပထမဂှ်တုဲ ဒဒန်မွဲကရေက် သရိုဟ်စှ်ေလီုအာလဝ်တုဲ ထ္ပက်လဝ်ဒဒန်ယာယဳရ။
ဒဒန်ကြုၚ်အုက်ဝွံ သွက်ပရေၚ်သွံရာန်ဗၞိက် ပယျဵုသေံ−ဗၟာ သၟးဟွံက သွက်ပရေၚ်သွံရာန်ဗၞိက် ဒေသသ္ကုတ်သၠုၚ်ကျာကၟိန်ဍုၚ်ဗၟာ တွဵုရးဍုၚ်မန်၊ တွဵုရးကရေၚ် ကေုာံ ရးတၞၚ်သဳတံဂှ် ဒှ်သ္ကုတ်ဂၠံၚ်ပၟိက်ဇၞော်မွဲရ။
ဒဒန်ကြုၚ်အုက် ကြဴနူဒးဒုၚ်ဖံက်ဗ္တိုဟ်မာၚ်တုဲ အပ္ဍဲဒေသဂှ် ကၠေၚ်စက်ပိုတ်တံကဵု ကပေါတ်ဗၞိက်လ္ၚဵု ၚုဟ်တိုန်ကၠုၚ် ဂၠိုၚ်ကဵုဆဂှ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ