မတ်မလီု၊ မေ ၁၈
ဒၟါနူပေါဲဗ္တိုက် က္တဵုဒှ်လဝ် ပ္ဍဲပွိုၚ်ဍုၚ်လ္ၚဵု နူတွဵုရးဍုၚ်မန်ကဵု တွဵုရးကရေၚ်တံဂှ်တုဲ ဗွဝ်ဖျာတိသ္ၚိကၠအ် ဍုၚ်မတ်မလီုဝွံ သွံရာန်ကီု၊ လိၚ်စကီုဂှ် မြက်ဇက်ဒၟံၚ်ရောၚ် ဂွံတီကေတ် ဇရေၚ်ညးမရေၚ်တၠုၚ်ဒၟံၚ်ဒတုဲဖဵုတိသ္ၚိကၠအ်တံရ။
အပ္ဍဲပေါဲဗ္တိုက် မက္တဵုဒှ်လဝ် အပ္ဍဲဒေသၜဳဂြာၚ် ပယျဵုတွဵုရးဍုၚ်မန်ကဵု တွဵုရးကရေၚ် တုဲကၠုၚ်ဂိတုမာတ်ကြပ်အိုတ်တေံကဵု အပ္ဍဲဂိတုဨပရဴတေံဂှ်ကီု သီုကဵုအပ္ဍဲပေါဲဗ္တိုက် လ္ပာ်ဍုၚ်လှာဒကှ်ကဵု ဍုၚ်ဗြဝတဳ ပယျဵုသေံ−ဗၟာတံဂှ် ညးဍုၚ်ကွာန်ဒေသ ဂၠိုၚ်ကဵုကိုဋ် ဒးထောံလသာလဝ်ဌာန်ဒၟံၚ်ရ။
ပ္ဍဲကဵုဏံ ညးဒေသထောံလသာသ္ၚိဌာန် နူကဵုဒေသဗြဝတဳ၊ လှာဒကှ်၊ ကအ်ဗိုတ်၊ ကအ်ဗိန်၊ ဓမ္မသ၊ ကြေဝ်ဏာ ညးသြန်လှုဲနွံတံဂှ် ရာန်တိသ္ၚိကၠအ် လ္တူဍုၚ်မတ်မလီုကီု၊ လိၚ်မံၚ်တံကီု ဂၠိုၚ်ကၠုၚ်ဒၟံၚ်ရောၚ် ညးရေၚ်တၠုၚ်ဒတုဲဖဵုတိသ္ၚိကၠအ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကိစ္စပါဲဒဴဘဲပၞာန်တံလေဝ် နွံဒၟံၚ်ရ။ ရဲလှုဲနွံလ္ၚဵုတံ၊ ရဲပါဲဘဲပၞာန် နူလ္ပာ်ရးတံ စိုပ်ကၠုၚ်လ္တူဍုၚ်တုဲ (သ္ၚိကၠအ်) ဂွံသွံရာန်ကၠုၚ်ညိညရ။ ရဲလှုဲနွံ လ္ပာ်တေံဂှ်တှ်ေ ရာန်လဝ်တိတှ်ေ ရာန်လဝ်ဏောၚ်။ လ္ၚဵုဂှ်လေဝ် လိၚ်မံၚ်ထောံသ္ၚိမွဲလစုတ်ဏောၚ်၊ ပြေပြံၚ်တှ်ေ ညးတံစဴဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် သၟာပရေၚ်ပိုန်ဒြပ်သိုက်လောဲ နူဒေသတံဏံဂမၠိုၚ်ဝွံ နူတမ်ဝါဒိတေံ အဆက်အစေန် ကုဍုၚ်မတ်မလီု နွံဒၟံၚ်တုဲ ရာန်လဝ်ကၠအ်သီုသ္ၚိတံဂှ်တုဲ ဗွဝ်ဖျာလိၚ်စသ္ၚိတံဂှ်လေဝ် အသိၚ်ခိုဟ်ဒၟံၚ်ရောၚ် ညးဆက်ဟီုရ။
အတိုၚ်ဗွဝ်ဖျာလိၚ်စသ္ၚိတံဂှ်မ္ဂး ဂြောဝ်ဂတာ မံၚ်ဒၟံၚ်တွဵုတံဂှ်တှ်ေ မွဲဂိတု အကြာပိကိုဋ် စဵုကဵု ၅ ကိုဋ် ၚုဟ်မၞုံတုဲ လိၚ်စကဵုသၞာံ၊ ၆ ဂိတုတံကီုလေဝ် ကုညးပါဲဒဴဘဲပၞာန်တံဂှ်တှ်ေ လ္ဂောံကဵုအကာဲအရာပရေၚ်မၞိဟ်တုဲ ပိဂိတုလေဝ် လိၚ်ကဵုဒၟံၚ်ရ။
မွဲလ္ပာ်ဂှ်ပၠန် ထဝ်ဒကောၚ်မွဲဒကေဝ် ၚုဟ်တိုန်ဒၟံၚ် စဵုကဵု ၅၀ ကိုဋ်ဒ္ကေဝ်ပြၚ်ဂှ်ရ တိမွဲဂအာၚ်ဂှ် ၚုဟ်တိုန်ကၠုၚ်ဒၟံၚ် စဵုကဵု ၂၀၀ ကိုဋ်ဒ္ကေဝ်တုဲ ဂကောံသွံရာန်ဂအာၚ်တိတံဂှ်လေဝ် ဂွံသွံရာန်ဂၠိုၚ်ဒၟံၚ်ရောၚ် ဂွံတီကေတ် နူညးရေၚ်တၠုၚ်ဒတုဲဖဵုတိသ္ၚိကၠအ်တံရ။
ပရိုၚ်−သြၚ်လောန်တိုၚ်(မ်)
ဗီု−CJ