မတ်မလီု၊ မေ ၁၉
နကဵုသၟတ်ဂမၠိုၚ် ဂ္စါန်ညဳညဳသာသာတုဲ သွက်ဂွံရေၚ်တၠုၚ်ကၠောန်ၜိုတ်အာ သၟဝ်ပရေၚ်က္ဍိုက်ပ်တံ မွဲကရောံမွဲစွံဂှ် နွံပၟိက်တုဲ လညာတ်ဇကုတံဂှ်လေဝ် သွက်ဂွံသဳကၠဳထ္မံက်ထ္ၜး၊ သွက်ဂွံကတ်လ္ၚတ်အိုတ်ဂှ် ဥက္ကဌ ဗော်သွးကောန်ဂကူကရေၚ် KNU ပဒိုဝ်သဝ်ဂွါထူသေ ဖ္တိုက်ဖ္အောဝ်လဝ်ရ။
ပ္ဍဲအရာဟီုဂလာန်ပ္တိုန်ဂုဏ်စရာဲ သွက်တ္ၚဲဗော်သွးသၟတ်ကရေၚ် KYO ပေၚ် ၃၅ သၞာံ ပ္ဍဲဂိတုမေ ၂၃ ကၠုၚ်စိုပ်ဏံဂှ် ဥက္ကဌဗော်သွးကောန်ဂကူကရေၚ် KNU ပဒိုဝ်သဝ်ဂွါထူဝေန် ဒဒှ်ရဖ္တိုက်ဖ္အောဝ်လဝ်ဂှ် ဗလးပ္တိတ်လဝ် ပ္ဍဲဇာဇၞိက်ပရေၚ်မၞိဟ် KYO ရ။
ညးသၟတ်ဂမၠိုၚ်ဝွံ ဒှ်ညးဒးသ္ကိုပ်သ္က အလုံဂကူမွဲတုဲ ညံၚ်သ္ဂောံဒှ် ညးဖ္ဍိုက်ဗပေၚ်တာလျိုၚ်မာန် ကွတ်ပညာ၊ တၚ်ဒုၚ်ဂိုၚ်ကေတ် ဒးနွံထေက်တံဂှ် ဒးဒစးဒုၚ်ပလေဝ်ပလေတ်လဝ် ဇကုဇကုဏောၚ် ဥက္ကဌ KNU ကဵုဇြဟတ်ဖ္တိုက်ဖ္အောဝ်လဝ် ညးသၟတ်တံကဵု လ္တူညးမသ္ကိုပ်သ္ကပါလုပ် ပ္ဍဲဗော်သွးညးသၟတ်တံရ။
သ္အာၚ်နူဂှ်ပၠန် နကဵုညးသၟတ်ဂမၠိုၚ် ပ္ဍဲပေါဲသဳကၠဳတံဂှ် ကလၚ်ချိုတ်တ်ပၠိုတ်တ်တုဲ သွက်ဂွံထ္မံက်ထ္ၜးသဳကၠဳ လညာတ်ဇကုဇကုဂှ်ကီု ယဝ်ရလညာတ်ဗၠေတ်မှာအာမ္ဂး စိုတ်လ္ပလီုမွဲသာ် အတိုၚ်ဇကုညာတ် ထ္မံက်ပ္တိတ်တုဲ သွက်ဂွံကတ်လ္ၚတ်အိုတ်ဂှ် ဥက္ကဌ KNU ပဒိုဝ်သဝ်ဂွါထူဝေန် ကဵုလဝ်ကသပ် ကုညးသၟတ်တံရ။
ရန်တၟံကဵု သၟတ်ကရေၚ်ဂမၠိုၚ် ဂွံပါလုပ်အာ ပ္ဍဲအခန်ကဏ္ဍပၟိက်ဇၞော် ဒၞါဲရေၚ်တၠုၚ်ချဳဒရာၚ်ရုန်ဂ္စါန်ဒၟံၚ် ပရေၚ်ဂကူကရေၚ်ဂှ်တုဲ သၞာံ ၁၉၈၉ ဂိတုမေ ၂၃ ဂှ် ဒက်ပ္တန်လဝ် ဗော်သွးသၟတ်ကရေၚ် KYO ပ္ဍဲဌာန်ဂအုပ် KNU ပ္ဍဲမာနေဝ်ပဠဝ်ရ။
နကဵုဗော်သွးသၟတ်ကရေၚ် ယဝ်ရလွဳၜံၚ်ပ္တိတ်ကဵု သၟတ်ကရေၚ်တၞောဝ်တၟိ မပၠန်ဂတးအာ စဵုကဵုအလုံကောန်ဂကူမွဲ ဂွံဗၠးၜးနူ ဘဝဍိက်ဒးဒုၚ်ဍဵုဍိုက်ဂှ်မ္ဂး ဆက်ရုန်ဂ္စါန်လုပ်အာပေါဲဗ္တိုက်ဏောၚ်ဂှ်လေဝ် KYO လလောၚ်ပ္တိတ်ကဵုလဝ်သမ္တီရ။
တ္ၚဲဗော်သွးသၟတ်ကရေၚ် KYO ပေၚ် ၃၅ သၞာံဂှ်ဝွံ ကၠုၚ်စိုပ်ဂိတုမေ ၂၃ ဏံမဒှ်တုဲ ဒုၚ်တၠုၚ်ဏာ တ္ၚဲ KYO ပေၚ် ၃၅ သၞာံကၠုၚ်စိုပ်ဏံ အတိုၚ်လိက်သ္ကုတ် “ဖ္တိုက်သရိုဟ်စိုတ်ဓာတ်ဍိက်၊ ဝဳၜံၚ်တၞောဝ်ကရေၚ်တၟိ” ဂှ်ရောၚ် နူဇာဇၞိက်ပရေၚ်မၞိဟ် KYO မွဲကဆံၚ် လလောၚ်ပ္တိတ်ထ္မံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−KYO