ကအ်ကြိက်၊ မေ ၁၉
နူက္ၜၚ်ပၞာန်ကံၚ်ဇြဳပၞာန် ပန်နၚ်လွဟ်ဇၞော်ကြာန်န် ပ္ဍဲကွာန်ကျာ်ဇၞော် ပွိုၚ်ဍုၚ်ကအ်ကြိက် တွဵုရးကရေၚ်ဂှ်တုဲ ညးဗြဴမွဲတၠ ချိုတ်အာလဝ်တုဲ မွဲတၠ ကလိဂွံလဝ်ဝပ်သ္ကာတ်မြဟ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုမေ ၁၆ အခိၚ်လဒေါဝ်တ္ၚဲ ၜိုတ် ၁၂ နာဍဳဂှ်လေဝ် နူကဵုက္ၜၚ်ပၞာန် နွံဒၟံၚ် အပ္ဍဲၜဳဂြာၚ်ဂှ် ပန်ပှော်လဝ် လွဟ်ဇၞော်မွဲမ ကြာန်န်တုဲ ဒတုံဗ္တိုဟ်ထ္ကးအာလဝ် ပ္ဍဲသ္ကုတ်ဇြဳကုန် ဒၞါဲသၟာကမၠောန်ဆုဲပြံၚ်တံမံၚ် မၞုံကွာန်ကျာ်ဇၞော်ဂှ်ရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ်တုဲ သၟတ်ဗြဴအာယုက် ၃၈ မွဲတၠ ချိုတ်အာလဝ် ဒၞါဲဂှ်တုဲ သၟတ်ဗြဴမွဲတၠပၠန်ဂှ် ဇိုၚ်ပိုတ် ကလိဂွံလဝ်ဝပ်ရောၚ် ဂွံတီကေတ်ရ။
အပ္ဍဲပရေၚ်က္ၜၚ်ပၞာန် ပန်ပှော်လွဟ်ဇၞော်ဂှ် သ္ၚိဒၟံၚ်ၜါမ ဇီုကပိုက်လီုလာ်အာလဝ်တုဲ ညးဗြဴဇိုၚ်ပိုတ်ကလိဂွံလဝ်ဝပ်ဂှ်တှ်ေ ပလံၚ်ဗစိုပ်လဝ်ရုၚ်ဂဥုဲရောၚ် ဂွံတီကေတ် ဇရေၚ်ညးဒေသတံရ။
ဗ္ဒိုပ်ဗၠာဲသၟိၚ်ကအ်ဗိန် ပွိုၚ်ဍုၚ်ကအ်ကြိက် ဒးဒုၚ်သီတုဲ ဒပ်ကံၚ်ဇြဳပၞာန်ဝွံ ပ္ဍဲဒေသၜဳဂြာၚ်ဂှ် ထ္ပက်ကရောၚ်ပၞာန် နကဵုပၞာန်ဍာ်၊ ပၞာန်တိုက်တုဲ အရိုဟ်ဒဒှ်တ္ၚဲ ပန်ပှော်ဒၟံၚ်လွဟ်ဇၞော် ပ္ဍဲကွာန်ဒၞါဲညးဍုၚ်ကွာန်ကောန်အရာပ်တံ မံၚ်တန်တဴတံဂှ်ရ။
ဟိုတ်နူပေါဲဗ္တိုက် က္တဵုဒှ်လဝ် အပ္ဍဲဒေသၜဳဂြာၚ် ဂိတုမာတ်ကြပ်အိုတ်တုဲကၠုၚ်တေံဂှ်တုဲ မွဲဒမြိပ်ဂၠံၚ်ရမ္မာဝတဳ ကွာန် ၁၀ ကွာန်ဟွံက ညးဍုၚ်ကွာန်ဒေသမွဲကိုဋ်ပြၚ် ဒးထောံလသာဌာန်ဒၟံၚ်တုဲ ဒၟါနူကံၚ်ဇြဳပၞာန် ပန်ပှော်တုဲ ကောန်အရာပ် ဟွံအောန်နူကဵု ၃၀ ဒးချိုတ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ