မတ်မလီု၊ မေ ၁၉
ညံၚ်သ္ဂောံဗၠးၜးနူပွမယိုက်ဂၠေၚ်လျိုၚ်ပၞာန် အတိုၚ်သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ပၠောပ်လဝ်လမျီုဂှ်တုဲ ပ္ဍဲတွဵုရးဍုၚ်မန် လိၚ်ကောန်ကလောန်ဆုဲပြံၚ်တံတုဲ ကဵုလုပ်ယိုက်ဂၠေၚ်ဒၟံၚ်လျိုၚ်ပၞာန် နွံဒၟံၚ်ရောၚ် သြၚ်လောန်တိုၚ်(မ်) ဂၠိုက်ဂၠါဲဂွံတီကေတ်ရ။
သ္ကိုပ်အုပ်ဓုပ်ကွာန်အရာပ်ကံၚ်ဇြဳပၞာန်ဂမၠိုၚ်ဝွံ ပ္ဍဲအရာကံက်စရၚ် အပ္ဍဲဒေသ သ္ဂောံယိုက်ဂၠေၚ်လျိုၚ်ပၞာန်ဂှ် ညးသၟတ်တံ ဟွံမိက်ယိုက်ဂၠေၚ်လျိုၚ်ပၞာန်ကီု၊ ပါဲဒလေတ်ကၠုၚ်တံ နွံကၠုၚ်တုဲ ထ္ပက်ကၠုၚ်အဇာ ကုကောန်ကလောန်ဆုဲပြံၚ်တံ နွံကၠုၚ်လဝ်ရ။
သ္ကိုပ်အုပ်ဓုပ်ကွာန်အရာပ် မဆေၚ်စပ်ဂမၠိုၚ်ဝွံ ညံၚ်သ္ဂောံဂွံအခေါၚ်ဗၠးၜး နူပွမယိုက်ဂၠေၚ်လျိုၚ်ပၞာန် ကြဴနူလိၚ်ကောန်ကလောန်ဆုဲပြံၚ်တံ နကဵုသြန်ကဵုစှော်ကိုဋ်တုဲဂှ် ပလံၚ်ဗစိုပ် တန်ဗ္တောန်ပၞာန်ကီု၊ သွက်ဘာဗ္တောန်ကွတ်ပၞာန် လၟေၚ်ဂတတံဂှ် ဒစးဒုၚ်ကဵုလှုဲတုဲ လိၚ်ဒၟံၚ်တံ နွံဒၟံၚ်ရောၚ် ဂွံတီကေတ် ဇရေၚ်ညးမစုက်လုက်ကဵု ကံၚ်ဇြဳပၞာန်တံရ။
ပ္ဍဲအရာလိၚ် ကောန်ကလောန်ဆုဲပြံၚ် သ္ဂောံယိုက်ဂၠေၚ်လျိုၚ်ပၞာန်ဂှ် မွဲတၠမ္ဂး အောန်အိုတ် နူ ၂၀ ကိုဋ်ဒ္ကေဝ် စဵုကဵု ၅၀ ကိုဋ်ဒ္ကေဝ် ဒးကဵုဒၟံၚ်သြန်နွံတုဲ ဟိုတ်ဒှ်သာ်ဂှ်ရ သ္ကိုပ်အုပ်ဓုပ်ကွာန်၊ အရာပ်ဂမၠိုၚ် ဗက်အာတ်ကၠုၚ်သြန် အပ္ဍဲဒေသတံ နွံဒၟံၚ်ရ။
“အကာဲအရာ ကော်ကဵုယိုက်ဂၠေၚ်လျိုၚ်ပၞာန်ဂှ် အရာပ်လ္ၚဵုတံဂှ်တှ်ေ နူသ္ကိုပ်အုပ်ဓုပ်တံ မွဲသ္ၚိမူစိဂးတုဲ ကံက်သြန်ရ။ လိၚ်ပပဝ်တာ ဗီုခေတ်ကၠာတေံရ။ မၞိဟ်အာ နကဵုသြန်လိၚ်တံဂှ်တှ်ေ စုတ်ဏာကဵုလဝ်လေဝ် နွံတုဲ ကောန်ၚာ်နူဒေသတၞဟ်ဟ် ကၠုၚ်ကၠောန်ကလောန်အဏံတုဲ ဗွဝ်ဖျာဗက်လိၚ်စဂှ် ဒှ်ကၠုၚ်ရ။ သ္ကိုပ်အုပ်ဓုပ်အရာပ်တံဂှ်လေဝ် မွဲသ္ၚိတှ်ေ မွဲကိုဋ်၊ မွဲကိုဋ်ဘာ် ဗက်ဒၟံၚ်လှုဲ ဗီုဏံ။ ဗက်တုဲတှ်ေ လိၚ်ရဲပကောန်ပၞာန်တံဏောၚ်ဂးတုဲ ပြဟ်ဟ်ဏံ ညးကၠောန်စဒၟံၚ်ရ” သာ်ဝွံ ညးဒေသတွဵုရးဍုၚ်မန် ဟွံမိက်ထ္မံက်ယၟုမွဲတၠ ဟီုရ။
ပ္ဍဲတွဵုရးဍုၚ်မန် ကွာန်အရာပ် ၄၆၈ ကွာန်နွံဂှ် ကံၚ်ဇြဳပၞာန်စၞောန်လဝ် မွဲမွဲလၟေၚ်မ္ဂး မွဲကွာန်မၞိဟ်မွဲ သွက်ဂွံကဵုစရၚ် ဂွံလုပ်ယိုက်လျိုၚ်ပၞာန်ဂှ်တုဲ လ္တူကွာန်အရာပ် ကဵုဟွံမာန်တံဂှ် ကဵုဒၟံၚ်ဇြဟတ်ဂရိုဟ်တံ နွံဒၟံၚ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် ထ္ပက်အဇာမၞိဟ်တုဲ ကဵုကောန်ကလောန်ဆုဲပြံၚ်တံ ယိုက်ကၠုၚ်လျိုၚ်ပၞာန်ဂှ်ရ လၟိဟ်သၟာကမၠောန်အောန်စှ်ေတုဲ ပရေၚ်ကၠောန်ပ္တိတ်တံလေဝ် ဇီုကပိုက်ကၠုၚ်မာန်တုဲ ၜိုန်ရကၠောန်ဒၟံၚ်သာ်ဏံကီုလေဝ် ဒပ်ကံၚ်ဇြဳပၞာန် ဂွံကလေၚ်ယာတိုန်က္ဍိုပ် လ္ပာ်ပၞာန်ဂှ်တှ်ေ ဖဵုဟွံမွဲပုဟ်ဂှ် ပါ်ပါဲလဝ်ရ။
“အစောံစရာဲကမၠောန်ဂှ်တှ်ေ စှ်ေကၠုၚ်ရ။ လၟုဟ်တှ်ေ စၟအ်မၞိဟ်ကၠောန်ကလောန်မာန် အပ္ဍဲဍုၚ်ဂှ် ဒှ်ဒၟံၚ်အခိၚ်တိတ်ဍုၚ်မ္ၚး။ စိုပ်အာ ဍုၚ် ဗီုကဵုဍုၚ်သေံ နွံပၟိက်ဒၟံၚ် ကုကောန်ကလောန်သ္ဇိုၚ် မဂၠိုၚ်ဂၠေၚ်ဂှ်အိုတ်တုဲ အပ္ဍဲဍုၚ်ဂှ်တှ်ေ လၟိဟ်သၟာကမၠောန်တံ စှ်ေကၠုၚ်တုဲ ပ္ဍဲကမၠောန်ပရေၚ်ကၠောန်ပ္တိတ်ဂှ်လေဝ် ဇီုကပိုက်ဂိကၠုၚ် တၟာဂလိုၚ်နွံကၠုၚ်ဏောၚ်။ ညအ်ဂှ် ကမၠောန်ကၠောန်ပ္တိတ်ဗၞိက် ဟွံဆက်စပ်ကဵုပရေၚ်ပၞာန်တံရ။ ဆ္ဂး ပိုယ်မိက်ဂွံဟီုဂှ်တှ်ေ ဗီုပြၚ်ကၠောန်ဒၟံၚ်သာ်ဏံဂှ် လ္ပာ်ပရေၚ်ပၞာန်ဂှ်လေဝ် ဒပ်ညး ဂွံကလေၚ်ယာက္ဍိုပ်မာန်ဂှ်လေဝ် ဒတုဲဖဵုဟွံမွဲပုဟ် မိက်ဂွံဟီုပရူဏံရ” သာ်ဝွံ သ္ဂးရ။
လှာဲမၞိဟ် လိၚ်ကေတ်ကောန်ကလောန်ဆုဲပြံၚ်တံတုဲ ယိုက်ကၠုၚ်လျိုၚ်ပၞာန်တံ နွံဂှ်ရ ဒးဆေၚ်အာမုက် ကုပြသၞာကောန်ကလောန်အောန်တံဏောၚ်တုဲ ပရေၚ်ကၠောန်ပ္တိတ်ဗၞိက်အပ္ဍဲဍုၚ် စှ်ေကၠုၚ်ဂှ်လေဝ် ဇီုကပိုက်ကၠုၚ် ကု GDP ကၟိန်ဍုၚ်ဏောၚ်ဂှ် တၠကမၠောန်ပရေၚ်ပိုန်ဒြပ်တံ သ္ၚဳဂၠိပ်ဒၟံၚ်တံ နွံဒၟံၚ်ရ။
အတိုၚ်တၚ်နၚ် ကံၚ်ဇြဳပၞာန်တံဂှ်မ္ဂး ပ္ဍဲတွဵုရးဍုၚ်မန် သၟာကမၠောန်ဆုဲပြံၚ် ထပှ်ဠက်ပြၚ်နွံဒၟံၚ်တုဲ ဗွဲမဂၠိုၚ်ဝွံ ဒှ်ကောန်ကလောန်ဆုဲပြံၚ် နူရးဨရာဝတဳကဵု ရးဗဂေါဂှ် ဂွံတီကေတ်ရ။
အတိုၚ်လိက်ဒုၚ်စဳရေၚ် ဂကောံလ္ၚတ်ကေၚ်ကာဗမာ ကေုာံ ပဋိပက္ခ BACS ဂှ်မ္ဂး ပ္ဍဲတွဵုရးဍုၚ်မန် သွက်ဘာဗ္တောန်ကွတ်ပၞာန် လၟေၚ် (၁) ဂှ် ညးသၟတ် ၂၀၀ ပြၚ် ဒးဒုၚ်ပကောံပလဝ်ကောန်ပၞာန်ရောၚ် တုဲကၠုၚ် ပ္ဍဲဂိတုဨပရဴ ၁၃ တေံ လလောၚ်ပ္တိတ်လဝ်ရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ ဘာဗ္တောန်ကွတ်ပၞာန် လၟေၚ် ၂ ဂှ် ဂိတုမေ ၁၄ ဏံ စဏောၚ်တုဲ ပ္ဍဲဘာတန်ဗ္တောန်ကဆံၚ်သၠုၚ် ဒပ်ပၞာန်ဗၟာ စၟတ် ၄ ဖျေံသ္ဇိုၚ်ကွာန်ဝါကလိ ပွိုၚ်ဍုၚ်ဇြပ်ဗုဂှ် စကဵုဒၟံၚ်တန်ဗ္တောန်ယျရောၚ် ဂွံတီကေတ် အတိုၚ်တၚ်လလောၚ်တြး ကံၚ်ဇြဳပၞာန်ရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram