ဒပ်ပၠန်ဂတးရပ်လွဟ်မန်ၜါဒပ် စပံၚ်တောဲပရေၚ်ပၞာန်

ရေဝ်၊ မေ ၁၉

ဒပ်ပၠန်ဂတးရပ်လွဟ် ဒုၚ်သ္ဇိုၚ်ကဵုဂကူမန်တုဲ မံက်ဂတဝ်ကၠုၚ်နူပၠန်ဂတးက္ညၚ် ဒပ် MSRF ကဵု ဒပ် MSDF တံဝွံ စကၠောန်ဒၟံၚ် လၟေၚ်ကမၠောန်ပရေၚ်ပံၚ်တောဲရေၚ်တၠုၚ် စပ်ကဵုပရေၚ်ပၞာန်တံယျဂှ် ညးတာလျိုၚ်ဂကောံၜါလ္ပာ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

MSRF ကဵု MSDF တံဝွံ လုပ်အာပေါဲဗ္တိုက် စဵုကဵုထပိုတ်ရိုဟ်ကၞက် သၞောတ်တၠအဝဵုပၞာန် ကေုာံ သၞောတ်တၠအဝဵုနာနာတံဂှ်ဏောၚ်တုဲ စဵုကဵုဒက်ပ္တန်ဍုၚ်မန် မဍိုက်ပေၚ်ကဵုအဝဵုအပိုၚ်အခြာမာန် သွက်သ္ဂောံလုပ်အာပေါဲဗ္တိုက် နဒဒှ်ဒပ်မဟာမိတ် မွဲကကောံမွဲကရောံဂှ် ဂိတုဨပရဴ ၇ တုဲကၠုၚ်တေံ တုပ်လဝ်စိုတ်ရ။

နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးရပ်လွဟ် MSRF ဂှ် အတိုၚ်ဒပ်ၜါလ္ပာ်တံ ကေတ်လဝ်တၚ်တုပ်စိုတ်ဂှ် ရေၚ်တၠုၚ်ဒၟံၚ် ပရေၚ်ပံၚ်တောဲတံ တၟာဂလိုၚ်ရောၚ် ဟီုတဴရ။

“အတိုၚ်တၚ်တုပ်စိုတ် အတိုၚ်လလောၚ်ပ္တိတ်လဝ်ဂှ်ရ ပံၚ်တောဲရေၚ်တၠုၚ် ကၠောန်ၜိုတ်ဒၟံၚ် တၟာဂလိုၚ်နွံရ။ တိုန်မံၚ်ဘာဗ္တောန်ကွတ်တံ မွဲစွံလေဝ် နွံရ။ သ္အာၚ်နူဂှ်ပၠန် သ္ဂောံပံၚ်တောဲရေၚ်တၠုၚ်အာ ကုဂကောံပၠန်ဂတး ဖျေံသ္ဇိုၚ်ဍုၚ်မန် တၞဟ်ဟ်တံဂှ်လေဝ် သဳကၠဳဒၟံၚ် နွံရ” သာ်ဝွံ သ္ဂးရ။

ဒပ်ပၠန်ဂတးဍုၚ်မန် MSRF ကဵု ဒပ်စဵုဒၞါဍုၚ်မန် MSDF တုပ်လဝ်စိုတ် သ္ဂောံပံၚ်တောဲလုပ်အာပေါဲဗ္တိုက် နဒဒှ်ဒပ်မဟာမိတ်ဂှ်ဝွံ ပ္ဍဲကမၠောန်ကၠောန်ပ္တိတ်ကပေါတ်ပၞာန်တံကဵု ဘာဗ္တောန်ကွတ်ပၞာန်သ္ဇိုၚ်တံဂှ် သွက်ဂွံကၠောန်ၜိုတ်အာ မွဲစွံ မဒှ်ရ။

သ္အာၚ်နူဂှ်ပၠန် တၚ်နၚ်ပရိုၚ်စပ်ကဵုလ္ပာ်ပၞာန်တံကဵု တၚ်ဆဵုဂဗပရေၚ်ပၞာန်တံဂှ် သွက်ဂွံလှာဲဂတးအာညးသ္ကအ်ဂှ်ကီု၊ ပေါဲဗ္တိုက်ပရေၚ်ပၞာန်တံ မံက်ဂတဝ်ကၠုၚ်မ္ဂး ညံၚ်ဂွံလုပ်အာပေါဲဗ္တိုက် နဒဒှ်မဟာမိတ်မွဲစွံဂှ်လေဝ် တုပ်လဝ်စိုတ်ရ။

ဒံက်တာသဳရိမန်ဆာန် သ္ကိုပ်ဒပ် ဒပ်စဵုဒၞါဍုၚ်မန် MSDF ဂှ်လေဝ် ပြဟ်ဟ်ဏံ ဘာဗ္တောန်ကွတ်ပၞာန်သ္ဇိုၚ်တံကဵု ဘာဗ္တောန်ကွတ်နဲပညာပရေၚ်ပၞာန်တံဂှ် ဖျေံကဵုဒၟံၚ်တုပ်ပ်တုဲ ဗွဲလစှ်ေ ဂှ်တှ်ေ ရံၚ်ကဵုဂီုကၠီုပရေၚ်ပၞာန်တုဲ တန်ဗ္တောန်အံၚ်ဇၞးတုဲမှဟေၚ် လလောၚ်ပ္တိတ်ဏောၚ်ဂှ် သ္ပဒတန်လဝ် ကုသြၚ်လောန်တိုၚ်(မ်) ရ။

သ္အာၚ်နူဂှ်ပၠန် နဒဒှ်ပံၚ်တောဲရေၚ်တၠုၚ်ပရေၚ်ပၞာန် ဒပ်ၜါလ္ပာ်ဂှ်တုဲ သွက်ဂွံဒက်ပ္တန် ဒပ်တၟေၚ်မွဲဒပ် ဗွဲမပြဟ်ဂှ်လေဝ် ရေၚ်တၠုၚ်ဒၟံၚ်ရောၚ် ဒံက်တာသဳရိမန်ဆာန် ဆက်ဟီုရ။

“နဒဒှ်ပရေၚ်ပံၚ်တောဲ ပရေၚ်ပၞာန်ဂှ် သွက်ဂွံဒက်ပ္တန် ဒပ်တၟေၚ် MSDF MSRF မွဲ ဗွဲမပြဟ်ဂှ် ဖျေံစၟတ်စဳဇန်ဒၟံၚ် ကမၠောန်နတဲတံလေဝ် နွံရ။ ဟိုတ်ဂှ်ရ အလုံမုက်ပၞာန်ဍုၚ်မန်မွဲ ပ္ဍဲပရေၚ်ချဳဒရာၚ်ပရေၚ်ပၞာန် မစှ်ေကဵုမဟာဗျူဟာတံဂှ် ဒပ်ပြုပြေၚ်ပၞာန်​တၟေၚ် MSDF ကဵု MSRF ပံၚ်တောဲလဝ်မွဲဂှ်လေဝ် ခြာဟွံလအ် သွက်ဂွံဒက်ပ္တန်ချဳဒရာၚ်အာဂှ် ရေၚ်တၠုၚ်ဒၟံၚ် ဗွဲမပြဟ်ရ” သာ်ဝွံ သ္ဂးရ။

ယဵုဒုၚ်ကေတ်ဆန္ဒညးဍုၚ်ကွာန်မန်တံတုဲ ရန်ကဵုပရေၚ်ညဳသၟဟ် အကြာဇြဟတ်ပၠန်ဂတးမန်ကဵု ဇြဟတ်ပရေၚ်ဍုၚ်ကွာန်မန်တံဂှ်တုဲ ကံၚ်ဇြဳဖေဝ်ဒရာဍုၚ်မန် MSFC ၊ ဒပ်ပၠန်ဂတးဍုၚ်မန် MSRF ကေုာံ ဒပ်စဵုဒၞါဍုၚ်မန် MSDF တံ ဆဵုဂဗသဳကၠဳလဝ်ရ။

နူကဵုပေါဲသဳကၠဳဆဵုဂဗဏံမွဲကဆံၚ် ညးတာလျိုၚ်လ္ၚဵု နူကမ္မတဳက္ဍိုက်ပ်ပရေၚ်ဍုၚ်ကွာန်၊ ပရေၚ်ပၞာန် ဒပ်စဵုဒၞါဍုၚ်မန် MSDF ဂှ် ပါလုပ်ပ္ဍဲကံၚ်ဇြဳဖေဝ်ဒရာဍုၚ်မန် MSFC တုဲ သွက်ဂွံပံၚ်တောဲကေတ်အာတာလျိုၚ် ပရေၚ်ဍုၚ်ကွာန်တံဂှ် ဂိတုဨပရဴ သတ္တာဟပထမတေံ ဂွံလဝ်တၚ်တုပ်စိုတ်ရ။

မွဲလ္ပာ်ဂှ်ပၠန် ကံၚ်ဇြဳဖေဝ်ဒရာဍုၚ်မန် MSFC ကဵု ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSD AD တံ သွက်ဂွံပံၚ်တောဲရေၚ်တၠုၚ်အာ ပ္ဍဲကဏ္ဍပရေၚ်ဍုၚ်ကွာန်၊ ပရေၚ်ပၞာန် ကေုာံ ကဏ္ဍတၞဟ်သ္အာၚ်တံဂှ် ကလိဂွံလဝ်တၚ်တုပ်စိုတ်ရောၚ် ဂိတုဨပရဴ ၂၃ တေံ ပံၚ်တောဲလလောၚ်တြးလဝ်ရ။

ဗော်ဍုၚ်မန်တၟိ AD ကဵု ကံၚ်ဇြဳဖေဝ်ဒရာဍုၚ်မန်တံ ပ္ဍဲပရေၚ်ဍုၚ်ကွာန်၊ ပရေၚ်ပၞာန်၊ ပရေၚ်ရီုဗၚ်ဟံၚ်ပြာ်တံ မပါလုပ် ပ္ဍဲကဵုကဏ္ဍတၞဟ်သ္အာၚ်နာနာတံဂှ်လေဝ် ကမၠောန်ဒးပံၚ်တောဲထ္မံက်ရုပ်ရဴ အတိုၚ်တၚ်တုပ်စိုတ်တံဂှ် ပံၚ်တောဲရေၚ်တၠုၚ်အာ ကဏ္ဍညးကဵုညးဏောၚ်ဂှ် ဟီုပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−MSDF/MSRF