သဓီု၊ မေ ၂၁
အပ္ဍဲဂိတုဏံ ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန် အပ္ဍဲခရိုၚ်သဓီု တွဵုရးဍုၚ်မန်ဂှ်တုဲ ညးဍုၚ်ကွာန်ကောန်အရာပ် ၄ တၠ ချိုတ်တုဲ ၂၂ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်လလောၚ်တြး KNU ဗဟဵုရ။
ပ္ဍဲဂိတုဏံ နူဂိတုမေ စၟတ်တ္ၚဲ ၁ စဵုကဵုစၟတ်တ္ၚဲ ၂၀ ကြပ်အရိုဟ်တ္ၚဲ နူတမ်ဒပ်ဖျေံသ္ဇိုၚ်ကံၚ်ဇြဳပၞာန်တံ ပန်ဒၟံၚ်လွဟ်ဇၞော် ပ္ဍဲပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ် ကေုာံ ပွိုၚ်ဍုၚ်သဓီု ပွိုၚ်ဍုၚ်မၞုံ ခရိုၚ်သဓီုတံဂှ်ရ။
ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော်တုဲ ညးဒေသ နူပွိုၚ်ဍုၚ်ၜဳကလေၚ် ၃ တၠ၊ ညးဒေသ နူပွိုၚ်ဍုၚ်ကျာ်ထဝ်ဂှ် ၁ တၠ ဇီုကပိုက်ချိုတ်အာလဝ်တုဲ သ္ၚိဒၟံၚ် ဟွံအောန်နူကဵု ၃၀ လီုလာ်အာလဝ်ရ။
ညးဍုၚ်ကွာန်ဒေသတံ ဇီုကပိုက်ကလိဂွံလဝ်ဝပ်ဂှ်တှ်ေ နူပွိုၚ်ဍုၚ်ၜဳကလေၚ်ဂှ် ၁၆ တၠ၊ နူပွိုၚ်ဍုၚ်သဓီုဂှ် ၅ တၠ၊ နူပွိုၚ်ဍုၚ်ကျာ်ထဝ်ဂှ် ၁ တၠ၊ အပံၚ်ဖအိုတ် ၂၂ တၠ မဒှ်ရောၚ် ဂွံတီကေတ်ရ။
ပန်ပှော်လဝ်လွဟ်ဇၞော် အပ္ဍဲကွာန် ဒၞါဲညးဍုၚ်ကွာန်ကောန်အရာပ်တံ မံၚ်တန်တဴတံဂှ် ဒှ်ဒပ်အမၠံက် စၟတ် ၃၁၄ ဖျေံသ္ဇိုၚ်ၜဳကလေၚ်၊ တမ်ဒပ်ခလရ စၟတ် ၈ ကေုာံ တမ်ဒပ်ခလရ စၟတ် ၉ ဖျေံသ္ဇိုၚ်သဓီုတံရောၚ် KNU သ္ဂးရ။
ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော်တုဲ ညးဍုၚ်ကွာန်ဒေသ ၄၀၀၀ ပြၚ် နူကဵုကွာန် ၇ ကွာန် မပ္တံကဵု ကွာန်ဒံက်ယိတ်၊ ကွာန်အဝန်ကျဳ၊ ကွာန်ယှိုဲယံၚ်ပျ၊ ကွာန်ဇြဳဝန်၊ ကွာန်ပါန်အံၚ်ကုန်၊ ကွာန်မယာန်ကုန်တံဂှ် ဒးထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရ။
ကွာန်ဒးဒုၚ်ပန်ပှော်လွဟ်ဇၞော်တံဂှ်ဝွံ ဒှ်ကွာန်နူကဵုတိဍာ်အုပ်ဓုပ်ခရိုၚ်သဓီု ဒပ်မဟာ ၁ ဗော်သွးကောန်ဂကူကရေၚ် KNU တံရောၚ်ဂှ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−KNU