ဘာပန်၊ မေ ၂၁
ဒပ်ပံၚ်ကောံမဟာမိတ်ပၠန်ဂတးတံ ဗိုၚ်ဗ္တိုက်ဒၟံၚ် တမ်ဒပ်ကံၚ်ဇြဳပၞာန် ကေုာံ ဗျူဟာပၞာန်ဘာပန် သှ်ေဒၟံၚ်ဗ္ဒါဲဍုၚ်ဘာပန် တွဵုရးကရေၚ်ဂှ်တုဲ ပေါဲဗ္တိုက်ၜါလ္ပာ် သ္ကာတ်မြဟ်ဒၟံၚ်ရောၚ် ဂွံတီကေတ် နူကဵုဒပ်မဟာ ၅ KNLA ရ။
ဒပ်ပံၚ်ကောံမဟာမိတ် ဒပ်မဟာ ၅ KNLA တံ ဗ္တိုက်သီဂွံလဝ် တမ်ဒပ် ခလရ ၁၉၊ ခမရ ၄၃၄၊ စစန ၆၄၂ မဒှ်တမ်ဒပ်သၟဝ်တဲကံၚ်ဇြဳပၞာန် မၞုံဗ္ဒါဲဍုၚ်ဘာပန်တံဂှ်တုဲ ဆက်ကၟာတ်လဒဵု ဗ္တိုက်ဒၟံၚ် ဗျူဟာပၞာန်ဘာပန်သှ်ေဒၟံၚ်တံကဵု တမ်ဒပ်ခမရ ၃၄၁၊ ခမရ ၃၄၀ တံရ။
ပ္ဍဲတမ်ဒပ် ခမရ ၃၄၁၊ ခမရ ၃၄၀ ဒၞါဲၜိုတ်ကဝက်ဂှ်ကဵု ဗျူဟာပၞာန်ဘာပန် ဒပ်ပံၚ်ကောံမဟာမိတ် ဒပ်မဟာ ၅ KNLA တံ ဗိုၚ်ကၟာတ်လဒဵုဗ္တိုက်ဒၟံၚ်တံဂှ် ဒပ်ပံၚ်ကောံတံ ဗ္တိုက်သီဂွံလဝ်တုဲ ဒၞါဲသီုဖအိုတ်ဂှ် ဟွံဂွံဏီပုဟ်ဂှ် သ္ကိုပ်ဗိုလ်ဇၞော်သဝ်ကလာဒိုဝ် ညးမၞုံအခေါၚ်ဟီုဂး ဒပ်မဟာ ၅ ဟီုရ။
ဒပ်ကံၚ်ဇြဳပၞာန်ဂှ်တှ်ေ အပ္ဍဲဗျူဟာဘာပန်ကဵု အပ္ဍဲဗ္ဒိုပ်ဒပ် ခမရ ၃၄၀၊ ခမရ ၃၄၁ နွံဗ္ဒါဲဗ္ဒါဲတံဂှ်ဟေၚ် ဒပ်ပံၚ်ကောံကံၚ်ဇြဳပၞာန်တံ တဝ်စၞေဟ်ဗ္တိုက်ဒၟံၚ်တုဲ ဒပ်ပၞာန်အရီုတံလေဝ် ဟွံစိုပ်ကၠုၚ်ပုဟ်ဂှ် သ္ဂးရ။
ဒပ်ပံၚ်ကောံမဟာမိတ် ဒပ်မဟာ ၅ KNLA တံ သီထိၚ်ဂွံလဝ် ဍုၚ်ဘာပန် အပ္ဍဲဂိတုမာတ် တုဲကၠုၚ်တေံတုဲ ဆက်ထပိုတ်ကၟာတ်ဗိုၚ်ဒၟံၚ် တမ်ဒပ် ကေုာံ ဗျူဟာ သှ်ေဒၟံၚ်တံဂှ်တုဲ ညံၚ်ဗျူဟာ ကေုာံ ဗ္ဒိုပ်တမ်ဒပ်ဂမၠိုၚ် ဟွံဂွံစှ်ေအာဂှ် ဒပ်ကံၚ်ဇြဳပၞာန် ဒုၚ်ဗ္တိုက်ဒၟံၚ် နကဵုအရီုဗၚ်ပၞာန်ကျာရ။
အကြာတဝ်စၞေဟ်ဒၟံၚ် နကဵုပၞာန်ကျာ ဗွဲမသ္ကာတ်မြဟ်သာ်ဏံဂှ် လ္ပာ်ဒပ်ပံၚ်ကောံ ဒပ်မဟာ ၅ တံ သီဂွံလဝ် တမ်ဒပ် ၃ ဒပ် ပါလုပ်သီုကဵု ခလရ ၁၉ သၟဝ်တဲကံၚ်ဇြဳပၞာန်တုဲ ဗျူဟာပၞာန်ဘာပန်ကဵု တမ်ဒပ် ၂ ဒပ်ဟေၚ် သှ်ေဒၟံၚ်ရ။
ဟိုတ်နူဒပ်ကံၚ်ဇြဳပၞာန် ဗ္တိုက်ဂြာတ်မခတိုဟ် နကဵုပၞာန်ကျာတုဲ တုဲကၠုၚ်ပ္ဍဲဂိတုဨပရဴ အခိၚ်ပြဟ်ဟ်တေံ လ္တူဍုၚ်ဘာပန်ဂှ် ညးဍုၚ်ကွာန်ပါဲဒဴဘဲပၞာန် ဟွံအောန်နူကဵု ၈ တၠ ပါလုပ်သီုကဵုခမဳသၚ်တံ ချိုတ်အာလဝ်တုဲ ၁၈ တၠ ဇီုကပိုက်ကလိဂွံလဝ်ဝပ်တုဲ ညးဍုၚ်ကွာန်ဒေသ ဗွဲမဂၠိုၚ်ဂၠေၚ် ဒဵုကဵုအခိၚ်လၟုဟ် ဒးဂြိပ်ဒဴပါဲဒလေတ်ဒၟံၚ်ရ။
မွဲလ္ပာ်ဂှ်ပၠန် ကုန်ဗ္ဒိုပ်ဒပ်ကံၚ်ဇြဳပၞာန် ဖျေံလဝ်ဒပ် အပ္ဍဲတိဍာ်ဒပ်မဟာ ၅ KNU ဂှ်လေဝ် ဒပ်ပံၚ်ကောံဂမၠိုၚ် ဗိုၚ်ကၟာတ်လဒဵုဗ္တိုက်လဝ်တုဲ အပ္ဍဲသၞာံဏံ ထောံလသာဗ္ဒိုပ် ၁၀ ဗ္ဒိုပ်တုဲ ဂြိပ်ဒဴအာလဝ်ရောၚ် ဂွံတီကေတ် နူကဵုဒပ်ပံၚ်ကောံ ဂကောံဇြဟတ်ပၠန်ဂတးတံရ။
ပရိုၚ်−သြၚ်လောန်တိုၚ်(မ်)
ဗီု−KNU/NUG