ရေဝ်၊ မေ ၂၁
နကဵုဗော်ဍုၚ်မန်တၟိ AD သွက်သ္ဂောံဗ္တိုက်သရိုဟ်တၠအဝဵုပၞာန်တုဲ လလောၚ်လဝ်ပၞာန် ကုကံၚ်ဇြဳပၞာန်ဂှ် အခိၚ်ပေၚ်ပိဂိတုဂှ် ကၠောန်ဗဒှ်လဝ် ပေါဲသောၚ်ကလးဆဵုဂဗ ကုဂကောံမန်နာနာ မၞုံအပ္ဍဲဍုၚ်၊ မ္ၚးဍုၚ်တံ နူလပှ်ကျာရ။
ပေါဲဆဵုဂဗဏံဝွံ သွက်ဂွံသောၚ်ကလး လၟေၚ်ကမၠောန်ဗော်ဍုၚ်မန်တၟိ AD ဂှ်ကီု၊ သ္ဂောံကလၚ်ရမျာၚ် ကေတ်ကသပ်နူဂကောံနာနာတံမာန်ရန်တုဲ ဂိတုမေ ၁၉ ဂှ် ကၠောန်ဗဒှ်လဝ် ပေါဲဆဵုဂဗ ပွိုၚ်ပိနာဍဳရောၚ် နူကဵုဗော် လလောၚ်ပ္တိတ်လဝ်ရ။
ပ္ဍဲပေါဲဆဵုဂဗဂှ် ခမဳသၚ်မန်ဂမၠိုၚ် မပါလုပ် ဂကောံနာနာအပ္ဍဲဍုၚ်မ္ၚးဍုၚ် (၃၀) ဂကောံ ကေုာံ ညးဘိက်ထေက်ဂမၠိုၚ် အပံၚ်သီုဖအိုတ် လၟိဟ် (၆၀) တၠပြၚ် တိုန်စိုပ်လဝ်တုဲ က္ဍိုပ်သ္ကိုပ်လ္ပာ်ဗော်ဍုၚ်မန်တၟိ AD တံဂှ် သောၚ်ကလးလဴထ္ၜးလဝ် အကာဲအရာချဳဒရာၚ်ပရေၚ်ဍုၚ်ကွာန်၊ ပရေၚ်ပၞာန်ရ။
ညးမၞုံအခေါၚ်ဟီုဂး ဗော်ဍုၚ်မန်တၟိ AD နာဲဗညာမန်ဂှ် လၟေၚ်ကမၠောန်ပရေၚ်ဍုၚ်ကွာန်မန်တံ ဇြဟတ်ဂွံခိုဟ်ကၠုၚ်ဂှ် ဂကောံတိုန်စိုပ်ကၠုၚ်ဂမၠိုၚ် ကဵုလဝ်ကသပ် ၁၇ တၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပ္ဍဲကဵုတိုန်စိုပ်ကၠုၚ်ဂမၠိုၚ် ကဵုလဝ်ကသပ်ကုပိုယ်တံ ၁၇ တၚ်ရ။ အဓိကဂှ်တှ်ေ ပ္ဍဲကဵုလၟေၚ်ကမၠောန်ပရေၚ်ဍုၚ်ကွာန်မန်ပိုယ်တံဂှ် ညံၚ်ဇြဟတ်ဂွံခိုဟ်ကၠုၚ်နူဏံဂှ် ဗီုလဵုဂွံပံၚ်တောဲရေၚ်တၠုၚ်အာဂှ်ရော။ အကာဲအရာညးတံ ပံၚ်တောဲပါလုပ်မာန်၊ ထံက်ပၚ်မာန်တံဂှ် ကဵုလဝ်ကသပ် နူကဵုလညာတ်ပရေၚ်ဍုၚ်ကွာန်၊ ပရေၚ်ပၞာန်ရောၚ်” သ္ဂးရ။
ဆ္ဂး တၚ်ကဵုကသပ် ဂကောံအပ္ဍဲဍုၚ်မ္ၚးဍုၚ်တံ ကဵုလဝ် ကုဗော်ဍုၚ်မန်တၟိ AD တံသီုဖအိုတ်ဂှ် နာဲဗညာမန် ဟီုပ္တိတ်လဝ်ဗွဲလစှ်ဂှ်ေ ဟွံမွဲရ။
ဇြဟတ်ရာမညဖေဝ်ဒရာခေတ်တၟိ NRFF ဂှ် တိုန်စိုပ်လဝ် ပေါဲဆဵုဂဗ ဗော်ဍုၚ်မန်တၟိ AD ဂှ်တုဲ တၚ်ကဵုကသပ် ဟွံမွဲကီုလေဝ် စပ်ကဵုပေါဲဗ္တိုက်ဒေသၜဳဂြာၚ်တုဲ သၟာန်လဝ်နွံရောၚ် ညးဒုၚ်တာလျိုၚ်ဂကောံ မာံသၚ်လောန် ဟီုလဝ် သာ်ဏံရ။
“စပ်ကဵုတၚ်သၟာန်ဏံတုဲ က္ဍိုပ်သ္ကိုပ် NMSP-AD မွဲတၠဂှ် အခိၚ်ထိၚ်ဒက်အုပ်ဓလီုလဝ် ဒေသၜဳဂြာၚ်ဂှ် ဗလးမုက်ပၞာန်ဗြဝတဳဂှ်လေဝ် ပေါဲဗ္တိုက်တံ ဟွံတုဲဒှ်ဏီတုဲ သွက်ကံၚ်ဇြဳပၞာန်ဂှ်တှ်ေ ဂွံအာအခေါၚ် ကလေၚ်ထ္ပက်ကရောၚ်ပၞာန် ဒေသၜဳဂြာၚ်ရ။ တုဲပၠန် လ္ပာ်ကံၚ်ဇြဳပၞာန်ဂှ် ဖံက်ပ္ကဝ်ကၠုၚ်အခေါၚ်အရာမၞိဟ်တံ အဆက်က်ရ။ ကြဴနူပန်ပှော်ကၠုၚ်လွဟ်ဇၞော် အပ္ဍဲကွာန် စံၚ်ပလီုသ္ၚိဒၟံၚ်တံ အဆက်က်တုဲဂှ် တိဍာ်အုပ်ဓလီုလဝ်တံဂှ် ဒးဆုတ်ကလေၚ်ထောံမွဲလဂါံ ဒးကလေၚ်ဗလးထောံလဝ်တဲရောၚ် ဟီုရ” သာ်ဝွံ သ္ဂးရ။
ပ္ဍဲပေါဲဗ္တိုက်သီဗ္ဒိုပ်ဗၠာဲသၟိၚ်ကအ်ဗိန် ပယျဵုမန်ကဵုကရေၚ် ဒၞါဲပေါဲဗ္တိုက်ဗော်ဍုၚ်မန်တၟိ သ္ကာတ်မြဟ်အိုတ် က္တဵုဒှ်လဝ်ဂှ် ဗ္တိုက်လဝ်ဒပ်ပံၚ်ကောံမဟာမိတ်တံ ဗွဲမအံၚ်ဇၞးတုဲ အပ္ဍဲဒေသၜဳဂြာၚ်ဂှ် ဗ္ဒါဲမွဲဂိတု ဖျေံကၠုၚ်လဝ်သ္ဇိုၚ်ရ။
မွဲလ္ပာ်ဂှ်ပၠန် ပ္ဍဲဒေသချဳဒရာၚ် ဗော်ဍုၚ်မန်တၟိ AD ဂှ် ညးမကဵုပရိုၚ် ကုကံၚ်ဇြဳပၞာန် ကေုာံ သ္ကိုပ်အုပ်ဓုပ်ကွာန်အရာပ် ကဵုဒၟံၚ်ဇြဟတ်ဂရိုဟ် ကုညးဍုၚ်ကွာန် သ္ဂောံယိုက်လျိုၚ်ပၞာန်တံဂှ် ဒဒှ်ရကေတ်အာအရေဝ် ပိုတ်တ်သ္ကုတ်တ်ဏောၚ် လ္ပာ် AD ဟီုဏာလဝ် ပ္ဍဲပေါဲသောၚ်ကလးဂှ်ရောၚ် မာံသၚ်လောန် လဴထ္ၜးလဝ်ရ။
ဗော်ဍုၚ်မန်တၟိ AD ဝွံ ပါ်တိတ်နူ ဗော်ဍုၚ်မန်တၟိ ဂကောံရပ်လွဟ်ကောန်ဍုၚ်အရၚ် ဒေါအ်ပန်ပှော်ဂှ်တုဲ ပံၚ်တောဲကဵု ဂကောံဇြဟတ်ပၠန်ဂတးတုဲ ဗ္တိုက်သရိုဟ်အာ ဒပ်ပၞာန်သီအဝဵုဂှ်ဏောၚ် ဂိတုဖေဖဝ်ဝါရဳ ၁၄ တေံ လလောၚ်တြးလဝ်ရ။
ကြဴနူဂှ်တုဲ သွက်ဂွံပံၚ်တောဲအာ ကုအလဵုအသဳညဳသၟဟ်ဂကူ NUG နဒဒှ်မဟာမိတ် ပ္ဍဲပရေၚ်ပၞာန်၊ ပရေၚ်ဍုၚ်ကွာန် ကေုာံ ပရေၚ်ကလုတ်တမာန်တံဂှ် ကလိဂွံလဝ်တၚ်တုပ်စိုတ်တုဲ ပ္ဍဲဒေသမုဟ်ဍုၚ်၊ ဇြပ်ဗု၊ ကျာ်မြဟ် ကေုာံ ဒေသကျာ်ပိတံဂှ် စဗ္တိုက်လဝ်ကံၚ်ဇြဳပၞာန် မွဲကရောံဒပ်မဟာမိတ်ဂမၠိုၚ်ရ။
သ္အာၚ်နူဂှ်ပၠန် ကံၚ်ဇြဳဖေဝ်ဒရာဍုၚ်မန် MSFC ကဵု ဗော်ဍုၚ်မန်တၟိ AD က္ဍတ်ပါ်ကၠုၚ် နူပၠန်ဂတးက္ညၚ်ဂှ် သွက်ဂွံပံၚ်တောဲ ပ္ဍဲပရေၚ်ဍုၚ်ကွာန်၊ ပရေၚ်ပၞာန် ကေုာံ ပ္ဍဲကဏ္ဍတၞဟ်သ္အာၚ်တံဂှ် ကလိဂွံလဝ်တၚ်တုပ်စိုတ်ရောၚ် ဂိတုဨပရဴ ၂၃ တုဲကၠုၚ်တေံ ပံၚ်တောဲလလောၚ်တြးလဝ်ရ။
နာဲဗညာမန်ဂှ် နကဵုဗော်ဍုၚ်မန်တၟိ AD ပ္ဍဲပၠန်ဂတးဏံ တၚ်ကော်ဆဴ နွံတၟာဂလိုၚ်ကီုလေဝ် နကဵုဇြဟတ်ထံက်ဂလာန်ညးဍုၚ်ကွာန်တံဂှ် တတ်ထ္ပာ်မာန်ဏောၚ်ဂှ် ဟီုတဴရ။
“ပ္ဍဲပၠန်ဂတးဂှ် တၚ်ကော်ဆဴ နွံတၟာဂလိုၚ်ရ။ Resources limited ၊ Resources ဟွံဍိုက်ပေၚ် ပြသၞာတံဏံ အခက်အခုဲတၞဟ်ဟ် နွံတၟာဂလိုၚ်ရ။ ဆ္ဂး နကဵုတၚ်သ္ဂုတ်သွာတ်ပိုယ်တံ ဗိုန်န်ခိုၚ်ၚ် နကဵုဇြဟတ်ထံက်ဂလာန် ညးဍုၚ်ကွာန် ပ္ဍဲပိုယ်တံဂှ် တတ်ထ္ပာ်အာ တၚ်ကော်ဆဴတံဏံမာန်ဏောၚ်” ဂှ် သ္ဂးရ။
နကဵုဗော်ဍုၚ်မန်တၟိ AD သွက်သ္ဂောံဗ္တိုက်သရိုဟ် သၞောတ်တၠအဝဵုပၞာန် ကေုာံ သၞောတ်တၠအဝဵုနာနာ၊ သွက်သ္ဂောံဗ္တိုက်သရိုဟ်သၞောဝ်သ္ဇိုၚ်ဒက်ပ္တန် ၂၀၀၈ ကေုာံ သွက်ဂွံဒက်ပ္တန်ကၟိန်ဍုၚ်ပံၚ်ကောံဖေဝ်ဒရာ မဍိုက်ပေၚ်ကဵုအခေါၚ်စၞောန်ပျးအပိုၚ် ကောန်ဂကူတံဒှ်တမ် တၚ်ပ္တဝ်က္ဍိုပ်ပရေၚ်ဍုၚ်ကွာန်ဂမၠိုၚ် နွံရ။
အပ္ဍဲကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳ မဒက်ပကောံလဝ် နကဵုတွဵုရး (ဖေဝ်ဒရာယူနေတ်) မၞုံကဵုတၚ်ဒုၚ်လျိုၚ် အခေါၚ်စၞောန်ပျးအပိုၚ် ဍိုက်က်ပေၚ်ၚ် ကေုာံ အခေါၚ်တုပ်သၟဟ် ကောန်ဂကူတံဂှ် ဒက်ပ္တန်အာဍုၚ်မန်ဏောၚ် ဂိတုဨပရဴမံက်တေံ ဗော်ဍုၚ်မန်တၟိ AD လလောၚ်တြးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−NMSP