မတ်မလီု၊ မေ ၂၁
ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ပၠောပ်လဝ်လမျီုဂှ်တုဲ ပ္ဍဲတွဵုရးဍုၚ်မန် ပြသၞာကောန်ကလောန်အောန် က္တဵုဒှ်ကၠုၚ် ဇၞော်ကဵုဇြဟတ်ဂှ်ရ သွက်ဂွံတဵုပၠောမ်သြောံကသီုသၞာံဏံဂှ် ဒှ်ဒၟံၚ်အခက်အခုဲရောၚ် သၟာဗ္ၚဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲတွဵုရးဍုၚ်မန် တိဨကတဵုပၠောမ်သြောံကသီု ဗ္ဒါဲ ၇ ကိုဋ်နွံဂှ် လၟေၚ်သၞာံ နူလဒေါဝ်ဂိတုမေ စဵုကဵုဂိတုဂျူလာၚ်မံက် ကၠောန်ၜိုတ်တဵုပၠောမ်ဒၟံၚ် သြောံကသီုအိုတ်ရ။
ဆ္ဂး ပ္ဍဲသၞာံဏံ ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တုဲ ကောန်ကလောန်စိုန်သကီု အပ္ဍဲဒေသဂမၠိုၚ် တိတ်အာဍုၚ်သ္အာၚ် နကဵုလၟိဟ်ဗွဲမဂၠိုၚ်ဂၠေၚ်ဂှ်ရ ဒးဂဗဒၟံၚ် ပြသၞာကောန်ကလောန်အောန် ဇၞော်ကဵုဇြဟတ်ရ။
သၟာဗ္ၚမွဲတၠဂှ် ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တုဲ သၟတ်လုပ်ကၠောန် ပ္ဍဲဝါဗ္ၚဂွံတံ တိတ်အာဍုၚ်သ္အာၚ်အိုတ်တုဲ ဒးဆေၚ်ဒၟံၚ်မုက်ကဵု ပြသၞာကောန်ကလောန်အောန်တံ ဇၞော်ကဵုဇြဟတ်ရောၚ် ဟီုရ။
“အခက်အခုဲဂှ်တှ်ေ သၞောဝ်ယိုက်ဂၠေၚ်လျိုၚ်ပၞာန်တိတ်ကၠုၚ်တုဲ ကောန်ကလောန် သ္ဂောံစကာအာ ပ္ဍဲကမၠောန်ဗ္ၚပိုယ်တံဂှ် ဒှ်အာစဵုကဵုဟွံမွဲဟဂှ်ရ။ ဗ္ၚဟီုဂှ် ကၠောန်ဗီုတဵုကၠအ်၊ ဗီုဂူယာ ကၠောန်ကဵုမၞိဟ်မွဲတၠဓဝ်ဂှ် ဟွံဂွံပုဟ်။ ဗ္ၚဂှ် ဒးကၠောန်ကဵုဂကောံသ္ကအ်ဏောၚ်။ ဒးကၠောန်ကဵုမၞိဟ်ဂမၠိုၚ်တုဲ လၟုဟ်တှ်ေ မၞိဟ်ဍောတ်တ်လုပ်ကၠောန်ဝါဗ္ၚဂွံတံဂှ် တိတ်အာဍုၚ်သ္အာၚ်အိုတ်ယျ။ အေ ဂှ်တှ်ေ ပ္ဍဲကဵုပိုယ်တံဂှ် ကောန်ကလောန်သ္ဂောံရပ်စပ်အာ ပ္ဍဲဝါဗ္ၚတံဏံ အောန်စှ်ေကၠုၚ်ဂှ်တှ်ေ ကဵုကၠုၚ်ဒဒိုက်ဇၞော်ကဵုဇြဟတ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ကၠာတေံ အခိၚ်တဵုပၠောမ်သြောံကသီုမ္ဂး ကောန်ကလောန်အပ္ဍဲဒေသတံသၟးဟွံက ကောန်ကလောန်နူဒေသတၞဟ်ဟ်တံလေဝ် ကၠုၚ်စိုပ်ကၠောန်ဒၟံၚ်ကလောန်အိုတ်တုဲ သၞာံဏံဂှ်တှ်ေ ကောန်ကလောန်ဆုဲပြံၚ် ကၠုၚ်စိုပ်ဟွံမွဲ အောန်ဒၟံၚ်ရောၚ် ညးဆက်ဟီုရ။
သၟာဗ္ၚမွဲတၠဂှ်လေဝ် ဟိုတ်နူကောန်ကလောန်အောန်တုဲ အပ္ဍဲဒေသ ၚုဟ်ကောန်ကလောန်တံဂှ် သၠုၚ်တိုန်ကၠုၚ် ဂၠိုၚ်ကဵုဆတုဲ ဒးဂဗဒၟံၚ်ကဵုအကာဲအရာ ကော်ကောန်ကလောန် ၜိုတ်မၞုံပၟိက်ဟွံဂွံတံရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“သၟာဗ္ၚလၟုဟ် ကြပ်သီုဖအိုတ်ဂှ် ဒးဂဗဒၟံၚ်ကဵု ပြသၞာကောန်ကလောန်အောန်တံရ။ ကောန်ကလောန်အောန်ဟီုဂှ် ကောန်ကလောန်ဂွံကၠောန်တွဵုဂှ်လေဝ် ကော်ဟွံဂွံတုဲ ကောန်ကလောန်စၚုဟ်လိၚ်တ္ၚဲတံဂှ်လေဝ် ကော်ဝါတ်ဒၟံၚ်ကီု။ လဆောဝ်လဆောဝ် ဂွံပၠန်လေဝ် ၚုဟ်ဂှ်တှ်ေ အာတ်ဒၟံၚ်ကဵုဆဏောၚ်။ ကၠာတေံတှ်ေ ၜိုတ် ၁၀၀၀၀ ဒ္ကေဝ်ရဏောၚ်။ လၟုဟ်ဂှ်တှ်ေ အာတ်ဂလိုၚ်ပ္တိုန် စဵုကဵု ၁၈၀၀၀ ၊ ၂၀၀၀၀ ဒ္ကေဝ်ရ။ ညအ်ရဂှ် ၜိုတ်ဇကုမၞုံပၟိက် ဟွံဂွံပုဟ်။ အခိၚ်ဇကုနွံပၟိက်ဂှ် ဟွံဂွံပုဟ်။ ကောန်ကလောန်အောန်စှ်ေကၠုၚ်ဂှ် ဍာံဍာံရဏောၚ်” သာ်ဝွံ သ္ဂးရ။
ကောန်ကလောန်အောန်စှ်ေကၠုၚ်တုဲ သၟာဗ္ၚဗွဲမဂၠိုၚ် ပလေဝ်ပလေတ်ကၠုၚ် သ္ဂောံတဵုပၠောမ် မဟဂြာတ်သၟးရတုဲ သၟာဗ္ၚလ္ၚဵုတံဂှ်တှ်ေ ကၠောန်ကၠုၚ် သ္ဂောံဖအောန်ဖျေံဨကတဵုပၠောမ်သြောံကသီုတံဂှ်ရောၚ် ညးဆက်ဟီုရ။
မွဲလ္ပာ်ဂှ်ပၠန် သၟာဗ္ၚဂမၠိုၚ်ဝွံ ရာသဳသၞာံဏံ မ္ၚးနူကဵုပြသၞာကောန်ကလောန်အောန်စှ်ေဂှ် ဂွံတဵုပၠောမ်သြောံကသီုဂှ် ၚုဟ်ကပေါတ်တမ် ထပ်သၠုၚ်တိုန်ကၠုၚ်ကီု၊ ပြသၞာမပလောမ်အောန်တံဂှ်လေဝ် ထပ်ဒးဆေၚ်ဒၟံၚ်မုက်ရောၚ် သၟာဗ္ၚဂမၠိုၚ် ဟီုရ။
ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တုဲ ညးသၟတ်ဂမၠိုၚ် တိတ်စ္ဍးကၠုၚ်ဍုၚ်သ္အာၚ် ဂၠိုၚ်ကၠုၚ်ဂှ်ရ မ္ၚးနူကဵုကမၠောန်တဵုလွဳ အပ္ဍဲဒေသဂှ် စနူကဵုကမၠောန်ပရေၚ်သိုၚ်ခၞံ၊ ရုၚ်စက်ရုၚ်ကလောန်၊ ကမၠောန် SME ကေုာံ ကမၠောန်လွဳတိရစ္ဆာန်တံ ဒှ်တမ် ဒးဆေၚ်ဒၟံၚ်မုက်ကဵု ပြသၞာကောန်ကလောန်အောန်စှ်ေတံ ဇၞော်ကဵုဇြဟတ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ