ထဝါဲ၊ မေ ၂၂
သၞေဟ်ကၚ်စၟဳတ်ကံၚ်ဇြဳပၞာန်(ဘုရားမဲ) မၞုံပ္ဍဲကွာန် (မောၚ်မယ်ရှောၚ်) ပွိုၚ်ဍုၚ်ထဝါဲ ရးတၞၚ်သဳဂှ် ဒးဒုၚ်လုပ်စိုပ်ဗ္တိုက်လဝ်တုဲ ကောန်ဒပ်ကံၚ်ဇြဳပၞာန် ၜါတၠ ချိုတ်အာလဝ်ရောၚ် ဂွံတီကေတ် နူဒပ်ပၞာန်ဗထူရ။
တုဲကၠုၚ် ပ္ဍဲဂိတုမေ ၁၉ အခိၚ်လဒေါဝ်တ္ၚဲ ၜိုတ် ၂ နာဍဳဝိုက်ဂှ် ဒပ်ပၞာန်ဗထူ ကဵု ဒပ်ပၞာန်ဗၠးၜးကောန်ဂကူကရေၚ် KNLA တံ လုပ်စိုပ်ဗ္တိုက်လဝ် သၞေဟ်ကၚ်စၟဳတ် (ဘုရားမဲ) ဖျေံလဝ်ဒပ် နကဵုဇြဟတ် ၃၀ ပြၚ်ဂှ်ရ။
ဒပ်ပံၚ်ကောံ ဂကောံဇြဟတ်ပၠန်ဂတးတံ လုပ်စိုပ်ပန်ပှော်လဝ် သၞေဟ်ကၚ်စၟဳတ် (ဘုရားမဲ) နကဵုကွဳစက် ကြပ်ပ်ဂှ်တုဲ ကောန်ဒပ်ကံၚ်ဇြဳပၞာန် ၂ တၠ ချိုတ်အာလဝ်ရောၚ် ညးဒုၚ်တာလျိုၚ်လလောၚ်ပရိုၚ် ဒပ်ပၞာန်ဗထူ သ္ဂံၚ်ထာတ်မျာတ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲတ္ၚဲဂှ် အခိၚ်ဗ္တံ ၜိုတ် ၁၂ နာဍဳဂှ်လေဝ် ကဵုကရောၚ်ပၞာန်တိုက် ကံၚ်ဇြဳပၞာန် ကၠုၚ်ကပှ်ဇွ ပ္ဍဲသၞေဟ်ကၚ်စၟဳတ် (ဘုရားမဲ) ဂှ်လေဝ် က္တဵုဒှ်လဝ်ပေါဲဗ္တိုက် ပွိုၚ်ၜိုတ် ၂၀ မိနေတ်တုဲ ကောန်ဒပ်ကံၚ်ဇြဳပၞာန် ဟွံအောန်နူကဵု ၂ တၠ ဇီုကပိုက်ကလိဂွံလဝ်ဝပ်ရောၚ် သ္ဂးရ။
အပ္ဍဲပေါဲဗ္တိုက်ဂှ် နူဗ္ဒိုပ်သၞေဟ်ကၚ်စၟဳတ် (ဘုရားမဲ) ကဵု နူဒပ်အမၠံက်ဇဟာ ဘိုၚ်ပန်ပှော်ကဵုလဝ် လွဟ်ဇၞော် ဟွံပိုတ်သ္ကုတ်ကီုလေဝ် လ္ပာ်ဒပ်ပံၚ်ကောံ ဂကောံဇြဟတ်ပၠန်ဂတးတံ ဇီုကပိုက်ဒးဟွံမွဲပုဟ်ဂှ် သ္ဂးရ။
တုဲကၠုၚ် ဂိတုမေ ၁၃ တေံဂှ်လေဝ် သၞေဟ်ကၚ်စၟဳတ်လုပ်ဍုၚ်ကံၚ်ဇြဳပၞာန် မၞုံအရာပ် (အိမ်ရှေ့ပြင်) ဍုၚ်ထဝါဲ ဒးဒုၚ်လုပ်စိုပ်ဗ္တိုက်လဝ်တုဲ ကောန်ဒပ်ကံၚ်ဇြဳပၞာန် ၂ တၠ ချိုတ်အာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−ဒပ်ပၞာန်ဗထူ