သဓီု၊ မေ ၂၂
ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော် အပ္ဍဲဂကောံကွာန်ဝဳယဝ် ပွိုၚ်ဍုၚ်သဓီု တွဵုရးဍုၚ်မန်ဂှ်တုဲ ကောန်အရာပ်ပိတၠ ပါလုပ်သီုကဵုကောန်ၚာ်သၟတ်အာယုက် ၄ သၞာံမွဲတၠ ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်လလောၚ်တြး ခရိုၚ်သဓီု KNU ရ။
တုဲကၠုၚ် ပ္ဍဲဂိတုမေ ၁၈ တေံ ဇိုၚ်သဝ်တ္ၚဲ ၜိုတ် ၄ နာဍဳဂှ် နူတမ်ဒပ်ခမရ ကံၚ်ဇြဳပၞာန် စၟတ် ၉ ဖျေံသ္ဇိုၚ်သဓီုဂှ် ပန်ဏာလဝ် လွဟ်ဇၞော် အပ္ဍဲဂကောံကွာန်ဝဳယဝ် ၅ မရ။
မကမ်လွဟ်ဇၞော် ဒပ်ကံၚ်ဇြဳပၞာန် ပန်ဏာလဝ်ဂှ်ဝွံ ပ္ဍဲကွာန်ထုၚ်ဗိုဝ်လေဝ်ဂှ် ၃ မ၊ ပ္ဍဲကွာန် (သုံးအိမ်စု) ဂှ် ၂ မ ဒတုံဗ္တိုဟ်ထ္ကးအာလဝ်ရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ်တုဲ နူကွာန် (သုံးအိမ်စု) ဂှ် နဝ်(ပေါက်ပေါက်) ကောန်ၚာ်အာယုက် ၄ သၞာံ မွဲတၠ၊ သဝ်ပေအ်ဖိုဝ် အာယုက် ၄၂ သၞာံ၊ နဝ်အိဖျူ အာယုက် ၃၅ သၞာံတံ ဒးမကမ်လွဟ်ဇၞော် ကလိဂွံလဝ်ဝပ်ရ။
အပ္ဍဲမကမ်လွဟ်ဇၞော် ဒတုံဗ္တိုဟ်ထ္ကးအာလဝ်ဂှ် သ္ၚိဒၟံၚ် သဝ်အပေ၊ ဖာမဳ၊ အိဖျူတံ သ္ၚိပိမ ကဵု ကွဳလှာပိ နဝ်အိဖျူ မွဲဖ္ဍိုက် ဇီုကပိုက်လီုလာ်အာလဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး ခရိုၚ်သဓီု KNU ရ။
အတိုၚ်တၚ်လလောၚ်တြး ခရိုၚ်သဓီု KNU ဂှ်မ္ဂး အပ္ဍဲဂိတုဏံ ဒပ်ကံၚ်ဇြဳပၞာန် ဟိုတ်နူပန်ပှော်လွဟ်ဇၞော် ပ္ဍဲပွိုၚ်ဍုၚ်သဓီု၊ ကျာ်ထဝ် ကေုာံ ပွိုၚ်ဍုၚ်ၜဳကလေၚ်တံဂှ်တုဲ ကောန်အရာပ် ၄ တၠ ချိုတ်တုဲ ၂၂ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−KNU