ရေဝ်၊ မေ ၂၂
တွဵုရးဍုၚ်မန် အပ္ဍဲပွိုၚ်ဍုၚ်ရေဝ် ပေါဲဗ္တိုက်ဇီုမုက်တံ ညိၚ်ဝတ်ဒၟံၚ်ကီုလေဝ် ကံၚ်ဇြဳပၞာန်ဂှ် ကၟာတ်လဒဵုလဝ်ဂၠုၚ်စက် အခေါၚ်တတ်ကၠောံအာကၠုၚ် တ္ကအ်သကုတ်ဖိုဟ်ဂှ် ဂွံတီကေတ် ဇရေၚ်ညးဒေသတံရ။
ဂိတုမေမံက်တေံ ဒပ်ပံၚ်ကောံပၠန်ဂတးရပ်လွဟ်တံ လုပ်စိုပ်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် မၞုံတ္ကအ်သကုတ်ဂှ်တုဲ ပေါဲဗ္တိုက်ၜါလ္ပာ် သ္ကာတ်မြဟ်လဝ်ရ။
ကြဴနူပေါဲဗ္တိုက်ဂှ်တုဲ ဂၠုၚ်စက်နွံလ္တူတ္ကအ်သကုတ်တံသီုဖအိုတ်ဂှ် ဒပ်ကံၚ်ဇြဳပၞာန် ကၟာတ်ထောံ အခေါၚ်တတ်ကၠောံအာကၠုၚ် ပ္ဍဲၜဳဂှ်တုဲ စၟဳတ်ပတေၚ်ဂြတ်ဒၟံၚ်တံလေဝ် ကၠောန်ၜိုတ်ဒၟံၚ်ရ။
ညးဒေသမွဲတၠဂှ် စၟဳတ်ဒၟံၚ် ဂၠုၚ်လုပ်တိတ် လ္တူတ္ကအ်ဂှ်တုဲ လျးပၟတ်ဂၠုၚ်ပါမ်ကတံဂှ်လေဝ် စၟတ်လဝ် မွဲအရံၚ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဂၠုၚ်လုပ်တိတ် ဂၠုၚ်လာၚ်တံဂှ် စၟဳစၟတ် တၞးကာဒ်ကောန်ဍုၚ်။ ဂၠုၚ်ညးဒေသတံဂှ်တှ်ေ တိတ်ပါမ်ကမ္ဂး ညံၚ်ဂွံကၠောန်လဝ်ပၟတ် ( ဂၠုၚ်စက်) မွဲအရံၚ်ဓဝ်ဂှ် ဟီုလဝ်ဂှ် ဂွံမိၚ်ရ။ ဍေံတံလေဝ် ( ဒပ်စကစ) နွံဒၟံၚ်အဂှ်။ မၞိဟ်တီကဵုဍေံတံ ( ဒပ်စကစ) ဂှ်တှ်ေ ကဵုအာ။ ဆ္ဂး ပၟတ်ဂၠုၚ်ဂှ်တှ်ေ ဒှ်အရံၚ်ပၟတ် ဍေံတံစၟတ်လဝ်ရ” သာ်ဝွံ သ္ဂးရ။
သ္အာၚ်နူဂှ်ပၠန် နူကွာန်လ္ပာ်ကုန်တံဏံ ရဲအာတ္ကအ်သကုတ်သီုဖအိုတ်ဂှ် ကောန်ဒပ်ကံၚ်ဇြဳပၞာန်ဂမၠိုၚ် ပ္ကိတ်ကဵုတၞးကာဒ်ကောန်ဍုၚ်တုဲ စၟဳတ်ဒၟံၚ်တုဲ ဂၠုၚ်စက်သီုဖအိုတ်ဂှ်လေဝ် နူဇိုၚ်သဝ်တ္ၚဲ ၆ နာဍဳ စဵုကဵုပယျာံဂယး ၆ နာဍဳဂှ် ကၟာတ်လဝ် အခေါၚ်တတ်ကၠောံရ။
မွဲလ္ပာ်ဂှ်ပၠန် ညးကၠောန်ကလောန်ဍာ်တံကဵု တၠဍေံတံဂှ် ဒပ်ကံၚ်ဇြဳပၞာန် ကော်စၟဳတ် နကဵုတၞးကာဒ်ကောန်ဍုၚ်တံ နွံလဝ်တုဲ နကဵုတၚ်ထ္ၜးဟိုတ် ပရေၚ်ဂီုကၠီုဂှ် ဂေတ်ဂေၚ်ချဳဒရာၚ်ဒၟံၚ် အပ္ဍဲၜဳ နကဵုက္ၜၚ်ၜါဖ္ဍိုက်လေဝ် နွံဒၟံၚ်ရောၚ် ဂွံတီကေတ် ဇရေၚ်ညးဒေသတံရ။
ပ္ဍဲပေါဲဗ္တိုက်တ္ကအ်သကုတ်ဂှ် လ္ပာ်ဒပ်ကံၚ်ဇြဳပၞာန် မ္ၚးနူထောံမခတိုဟ် နကဵုက္ၜၚ်ကျာဂှ် သီုပန်ပှော်ဒၟံၚ်လွဟ်ဇၞော် နူက္ၜၚ်ပၞာန်ကီုလေဝ် ကောန်ဒပ်လ္ၚဵု ဒးဒုၚ်ရပ်လဝ်တုဲ လွဟ်လက်နက်မကမ်တံဂှ်လေဝ် ဒပ်ပံၚ်ကောံပၠန်ဂတးတံ သီဂွံလဝ်ရ။
ပေါဲဗ္တိုက်ဂှ်တုဲ ဒဵုကဵုတ္ၚဲဏံ လ္ပာ်ပွိုၚ်ဍုၚ်ရေဝ်ဂှ် လ္ပာ်ဒပ်ပံၚ်ကောံပၠန်ဂတးတံ လုပ်စိုပ်ဗ္တိုက်လဝ်၊ ဝေၚ်လဝ်ပၞာန် ဒၞါဲဒပ်ကံၚ်ဇြဳပၞာန် ဖျေံလဝ်ဒပ်တံဂှ် ဟွံမွဲရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးရပ်လွဟ် MSRF ချဳဒရာၚ်ဒၟံၚ် ပ္ဍဲဒေသရေဝ်ကဵု တၞၚ်သဳဂှ် ဒၟါနူဟိုတ်နာနာတုဲ လ္ပာ်ရေဝ် ထ္မံက်လဝ်ပေါဲဗ္တိုက်တံ ဟွံမွဲကီုလေဝ် ပရေၚ်ပလေဝ်ပလေတ်တံဂှ် ကၠောန်သ္ပဒၟံၚ်တၟာဂလိုၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဒၟါနူဟိုတ်နာနာတုဲ လ္ပာ်ရေဝ်ဂှ် ဝေၚ်လဝ်ပၞာန်ဟွံမွဲကီုလေဝ် ဒပ်မဟာမိတ်ပိုယ်တံ ချဳဒရာၚ်ဒၟံၚ် လ္ပာ်ထဝါဲ−တၞၚ်သဳဂှ် နွံဒၟံၚ်ရ။ ကၠောန်ဒၟံၚ် ပရေၚ်ပလေဝ်ပလေတ်တံ တၟာဂလိုၚ်ရ။ တၚ်နွံပၟိက်တံဂှ်လေဝ် နွံဒၟံၚ်တၟာဂလိုၚ်တုဲ ပြဟ်ဟ်ဏံ ပရေၚ်ပၞာန်ဂှ်တှ်ေ ထ္မံက်ဟွံမာန်ဏီပုဟ်” သာ်ဝွံ သ္ဂးရ။
ဆ္ဂး ဂၠံၚ်ဇၞော်ပျဳထံၚ်သု ရေဝ်−ထဝါဲ စၟတ် ၈ ဂှ် လ္ပာ်ဒပ်မဟာမိတ်ပၠန်ဂတးရပ်လွဟ်တံ ဆက်ထိၚ်ဒက်လဝ်ဖိုဟ်ရောၚ် နာဲနဂါ သ္ဂးရ။
ပွိုၚ်ဍုၚ်ရေဝ်ဝွံ အပ္ဍဲကာလသီအဝဵုဏံ ဒှ်ဒေသ ဒပ်ပၠန်ဂတးရပ်လွဟ်တံ ဖျေံသ္ဇိုၚ်ချဳဒရာၚ်ဒၟံၚ်မွဲတုဲ ဒှ်ဒေသၚးတးဗ္တိုက်ဒၟံၚ် ဗ္ဒိုပ်ဒပ်ကံၚ်ဇြဳပၞာန်၊ ရုၚ်အုပ်ဓုပ်၊ ရဲကဵုပရိုၚ်တံ ဇြဟတ်ခိုဟ်မွဲရ။
ဒၟါနူအကာဲအရာတံဏံတုဲ ကံၚ်ဇြဳပၞာန် လလောၚ်တြးလဝ် ပွိုၚ်ဍုၚ်ရေဝ် နဒဒှ်အမိၚ်ပရေၚ်အုပ်ဓုပ်ပၞာန်မွဲ တွဵုရးဍုၚ်မန်ရ။
ပရိုၚ်−သြၚ်လောန်တိုၚ်(မ်)
ဗီု−TLT