မတ်မလီု၊ မေ ၂၄
ကြဴနူဒဒန်မသဝ် နွံလ္တူဂၠံၚ်ဇၞော် လ္ဂုၚ်−မတ်မလီု ဗ္ဒါဲကွာန် (တောၚ်ကလေး) ပွိုၚ်ဍုၚ်ၜဳကလေၚ် တွဵုရးဍုၚ်မန် ဒးဒုၚ်ဖံက်ခတိုဟ်မာၚ်တုဲဂှ် လ္တူဍုၚ်မတ်မလီုကီု ပ္ဍဲပွိုၚ်ဍုၚ်လ္ၚဵု အပ္ဍဲတွဵုရးတံဂှ်လေဝ် လာၚ်ဖုၚ်၊ လာၚ်အေန်တာနိတ်ပိုတ်တံ က္တဵုဒှ်လဝ်ရောၚ် ဂွံတီကေတ် ဇရေၚ်ညးဒေသတံရ။
ဒဒန်မသဝ်ဝွံ ဂိတုမေ ၂၃ အခိၚ်နူဂယး ၜိုတ် ၄ နာဍဳဂှ် ဒးဒုၚ်ဖံက်ခတိုဟ်လဝ်မာၚ်တုဲ ဒဒန်မၞုံဇမၠိၚ် ၁၀၀ ပေပြၚ်၊ ဗွိုက် ၂၄ ပေဂှ် သရိုဟ်စှ်ေအာလဝ် အတိုၚ်မွဲတၞုၚ်တုဲ ဇုက်လာၚ်ဖုၚ် ကေုာံ ဇုက်ဝှာၚ်ပါ အေန်တာနိတ် နွံသ္ကဲဒဒန်တံ လီုလာ်အာလဝ်ရ။
ဟိုတ်နူဒဒန်သရိုဟ်လီုအာလဝ်တုဲ ပြဟ်ဟ်ဏံ လာၚ်ဖုၚ်ဂှ်တှ်ေ လာၚ်ဖုၚ် MPT ပိုတ်ဒၟံၚ်ယာယဳတုဲ လာၚ်အေန်တာနိတ်ဂှ်တှ်ေ Welink ၊ Myanmar Net တံ မပါလုပ် လာၚ်အေန်တာနိတ်လ္ၚဵုတံလေဝ် ပိုတ်ဒၟံၚ်ယာယဳရောၚ် ညးဒေသတံ ဟီုရ။
ညးဒေသမတ်မလီုမွဲတၠဂှ် လာၚ်ဖုၚ် ကေုာံ လာၚ်အေန်တာနိတ်လ္ၚဵုတံ ပိုတ်သ္ကုတ်ဒၟံၚ်ဂှ်ရ ဒးရာန်သုၚ်စောဲဒၟံၚ် သေမ်ကာဒ်ဖုၚ်တၞဟ်ဟ်တံတုဲ ကွာန်လ္ၚဵုတံဂှ်တှ်ေ ရာန်သေမ်ကာဒ်ဟွံဂွံတုဲ ဒးဂဗဒၟံၚ်ကဵုအခက်အခုဲ ပရေၚ်ဆက်စၠောံရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“လာၚ်ဖုၚ် MPT ဂှ်တှ်ေ သီုလာၚ်ဖုၚ်၊ သီုလာၚ်အေန်တာနိတ်ဂှ် ဟွံဂွံပုဟ်။ မွဲပၠန်ဂှ် ဝိုၚ်ဖိုၚ် Welink လေဝ် ဟွံဂွံပုဟ်။ အခက်အခုဲဂှ်တှ်ေ နွံမံၚ်။ လ္ၚဵုဂှ်တှ်ေ ရပ်ဒၟံၚ်မွဲကာဒ်ရဏောၚ်။ အေ ဂှ်တှ်ေ စပ်ကဵုလာၚ်ဖုၚ်ဟွံဂွံဏံတုဲ ပရေၚ်ဇီုကပိုက် နွံတၟာဂလိုၚ်ရ။ ဒးဂြိပ်ရာန် ကာဒ်ဖုၚ်တံ အခက်အခုဲသာ်ဏံ ဒးဂဗရ။ ကိစ္စဆက်စၠောံတၞဟ်ဟ်တံလေဝ် နွံတၟာဂလိုၚ်ဏောၚ်။ ဗွဲတၟေၚ် ကွာန်လ္ၚဵုတံဂှ်တှ်ေ ဒၞါဲရာန်သေမ်ကာဒ်ဖုၚ်တံ ဟွံဂွံဂှ် သာပရေံရ။ ဒှ်အခက်အခုဲ၊ ဒှ်ဒဒိုက်ကွေံကွေံဏောၚ်” သာ်ဝွံ သ္ဂးရ။
ဟိုတ်နူလၟေၚ်ဒဒှ်ဏံတုဲ ကမ္ပဏဳပရေၚ်ဆက်စၠောံလ္ၚဵုတံဂှ် ပ္တိတ်လဝ်လိက်ကဵုပရိုၚ် ကုညးဍုၚ်ကွာန်တံ စပ်ကဵုလာၚ်အေန်တာနိတ်ပိုတ်ဂှ်တုဲ ပလေဝ်ပလေတ်ဒၟံၚ် ဗွဲမပြဟ် မွဲဒမြိပ်အခိၚ်ဂှ်လေဝ် သ္ဂးလဝ်ရ။
ဟိုတ်နူဒဒန်မသဝ် ဒးဒုၚ်ပလီုပစူလဝ်တုဲ လာၚ်ဖုၚ် ကေုာံ လာၚ်အေန်တာနိတ်လ္ၚဵု ပိုတ်သ္ကုတ်အာလဝ်ဂှ်ရ ဒဒန်မသဝ်ဝွံ သရိုဟ်စှ်ေလီုအာတုဲ ဒှ်ဒၟံၚ်အကာဲအရာ ရပ်စပ်ဟွံဂွံရောၚ် ဂွံတီကေတ်ရ။
ညးဒေသၜဳကလေၚ်မွဲတၠဂှ် ဟိုတ်နူရပ်စပ် ဒဒန်မသဝ်ဟွံဂွံဂှ်ရ အာကၠုၚ်ဒၟံၚ် နူဂၠံၚ်ဒံက်ယိတ်ကဵု ဂၠံၚ်ကွာန်ခေဝ်မံက်တံဂှ်ကီုလေဝ် ကွဳစက်ကၟာတ်ဆိုအ် က္တဵုဒှ်ဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“လုပ်နူကွာန်ဒံက်ယိတ်တုဲ ဂေတ်အာ လ္ပာ်ကွာန်ခေဝ်မံက်။ တိတ်နူကွာန်ခေဝ်မံက်မ္ဂး စိုပ်ကွာန်ယှိုဲယံၚ်ပျ။ နူဏံ ၁၅ မိနေတ်တှ်ေ ဗလးကဵုမွဲတဲ။ ၁၅ မိနေတ်တှ်ေ ဗလးကဵု ၃၀ ဖ္ဍိုက်။ လ္ပာ်တေံဂှ် ပေၚ် ၁၅ မိနေတ်တှ်ေ ဇူ ၁၀ မိနေတ်တုဲ လ္ပာ်ဏံဂှ် ကလေၚ်ဗလး ၃၀ ဖ္ဍိုက်ပၠန်။ ဂၠံၚ်အာကဵုအလန်ဂှ်တှ်ေ တၟော်ကဵုဂၠံၚ်ပထမဂှ်မ္ဂး ဍန်ညိဏောၚ်။ ဂၠံၚ်ကွာန်ကီုလေဝ် ဂၠံၚ်ဂှ်ပရေံဒၟံၚ်ကွေံကွေံဟွံသေၚ်ပုဟ်၊ ဂၠံၚ်ကာတ္တရာရဏောၚ်။ ဇီုကပိုက်ကဵု ပရေၚ်ဗၞိက်ဂေတ်ဂြိပ်တံရ” သာ်ဝွံ သ္ဂးရ။
ကြဴနူဒဒန်မသဝ် ဒးဒုၚ်ဖံက်ဗ္တိုဟ်မာၚ်တုဲ သီုဍုၚ်မတ်မလီု မပါလုပ် ပ္ဍဲပွိုၚ်ဍုၚ်လ္ၚဵုတံဂှ် ဟိုတ်နူက္တဵုဒှ်ဓဝိၚ်တုဲ မၚ်ရာန်ဒၟံၚ် ကၠေၚ်စက်တံ နကဵုဂအုံဗွဝ် နွံဒၟံၚ်ဂှ်ရ ကၠေၚ်စက်ပိုတ်အိုတ်တံ က္တဵုဒှ်ဒၟံၚ်ရ။
အပ္ဍဲလၟေၚ်ဒဒှ် ဒဒန်မသဝ် ဒးဒုၚ်ဖံက်ခတိုဟ်မာၚ်ဂှ် ညးဍုၚ်ကွာန်အာတရဴ ဍိုက်ကၠုၚ်ကွဳလိုန်ဓာတ် ၄ တၠ ဒတုံစှ်ေအာသၟဝ်ဒဒန်တုဲ ၁ တၠ ချိုတ်တုဲ ၃ တၠ ကလိဂွံလဝ်ဝပ်ရောၚ် ဂွံတီကေတ် အတိုၚ်ဂလာန် ညးဒေသတံရ။
တုဲကၠုၚ် ဂိတုမေ ၁၁ တေံဂှ်လေဝ် ဒဒန်ကြုၚ်အုက် လ္တူဂၠံၚ်ကွဳစက် မတ်မလီု−လ္ဂုၚ် မၞုံပွိုၚ်ဍုၚ်ၜဳကလေၚ် ဒးဒုၚ်ဖံက်ခတိုဟ်မာၚ် ပလီုပလာ်လဝ်တုဲ အတိုၚ်ဒဒန်မွဲတၞုၚ် သရိုဟ်စှ်ေလီုအာလဝ်တုဲ ဒးဂဗဒၟံၚ်ကဵုအခက်အခုဲ ပရေၚ်ပလံၚ်ဗစိုပ်တံရ။
ပရိုၚ်−သြၚ်လောန်တိုၚ်(မ်)
ဗီု−CJ