မတ်မလီု၊ ဂျောန် ၃၀
ၜဲနာနာ တိတ်နူဒေသတွဵုရးဍုၚ်မန်တံဝွံ အပ္ဍဲဂိတုဂျောန်ဏံ နူဍုၚ်အိန္ဒိယ ဟိုတ်နူဗ္ကန်ပၠောပ်ပ္တိုန် အောန်စှ်ေကၠုၚ်ဂှ်ရ ၚုဟ်ၜဲ စှ်ေကၠုၚ်ဂှ် သၟာဗၞိက်ၜဲဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်ၜဲဝွံ အပ္ဍဲဂိတုဂျောန် သတ္တာဟတတိယဂှ် ၜဲသ္ၚေက် (ယှိုဲဝါ) မွဲန ၂၀ ပသာဂှ် နူကဵုနွံကၠုၚ် ၈၂၀၀၀ ဒ္ကေဝ်ဂှ် ပ္ဍဲဂိတုဂျောန် သတ္တာဟလက္ကရဴအိုတ်ဏံ စှ်ေကၠုၚ် စဵုကဵု ၇၈၀၀၀ ဒ္ကေဝ်တုဲ ၚုဟ်ၜဲသ္ၚေက်ဓမ္မတာဂှ်လေဝ် နူ ၇၈၀၀၀ ဒ္ကေဝ်ဂှ် စှ်ေကၠုၚ်လဝ် စဵုကဵု ၇၅၀၀၀ ဒ္ကေဝ်ရ။
ၜဲဇၞော် ဍုၚ်သ္အာၚ်ရာန်ဂၠိုၚ်ဂှ်လေဝ် မွဲနဂှ် နူကဵုဗ္ဒါဲ ၁၂၀၀၀၀ ဒ္ကေဝ်ဂှ် ၚုဟ်စှ်ေကၠုၚ် စဵုကဵုပွဳပွူ ၁၁၀၀၀၀ ဒ္ကေဝ်တုဲ ၜဲနာနာသှ်ေတံဂှ်လေဝ် မွဲနဂှ် နူ ၃၀၀၀ ဒ္ကေဝ် စဵုကဵုဗ္ဒါဲ ၁၀၀၀၀ ဒ္ကေဝ် ၚုဟ်စှ်ေကၠုၚ်ဒၟံၚ်ရ။
သၟာဗၞိက်ၜဲမွဲတၠဂှ် ၚုဟ်ၜဲတံစှ်ေကၠုၚ်ဂှ်ဝွံ ပ္ဍဲဍုၚ်အိန္ဒိယ ဟိုတ်နူအလဵုအသဳတၟိ ကၠောန်လဝ် ကိုန်စဳမာန် ၁၀၀ တ္ၚဲ ညံၚ်ၚုဟ်ၜဲဂွံစှ်ေ ဂှ်တုဲ ဇြဟတ်ရာန်အောန်တုဲ ၚုဟ်စှ်ေကၠုၚ်ရောၚ် ဟီုရ။
“ၚုဟ်ကလေၚ်စှ်ေဒၟံၚ်ညိည။ ၜဲဇၞော်ဂှ်တှ်ေ။ ၜဲ (ပဲစင်းငုံ) တံ မုတံဂှ်လေဝ် ကလေၚ်စှ်ေဒၟံၚ်ရလေဝ်။ အိန္ဒိယ အလဵုအသဳတိုန်လၟုဟ်ဂှ်တှ်ေ ညံၚ်ၚုဟ်ၜဲဂွံစှ်ေ ကိုန်စဳမာန် ၁၀၀ တ္ၚဲဂးတုဲ ကၠောန်ဒၟံၚ်ရ။ ၚုဟ်အပ္ဍဲဍုၚ် ဟွံစှ်ေ ညံၚ်ဂွံစှ်ေကၠောန်တုဲ ၚုဟ်အပ္ဍဲဍုၚ်ပိုယ်လေဝ် ဗက်စှ်ေအာကီုရ” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲဍုၚ်အိန္ဒိယ အခိၚ်ပေါဲသ္ဘၚ် တုဲဒှ်အာဂှ်ရ ဇြဟတ်ရာန်ၜဲ အောန်စှ်ေကၠုၚ်တုဲ ၚုဟ်ၜဲတံဂှ်ဝွံ စဵုကဵုဂိတုအဝ်ဂါတ်ဏံ ဒးဂဗအာကဵု ၚုဟ်စှ်ေတံမာန်ရောၚ် ညးသ္ၚဳဂၠိပ်လဝ်ရ။
မွဲလ္ပာ်ဂှ်ပၠန် ပ္ဍဲအရာပလံၚ်ပ္တိုန်ၜဲတံဂှ် ဟိုတ်နူပေါဲဗ္တိုက်တုဲ နူကဵုသၞေဟ်ကၚ်ပယျဵုတံဂှ်မွဲကဆံၚ် ပလံၚ်ပ္တိုန်ဟွံဂွံတုဲ စွံအဓိကကဵု ဂၠံၚ်တရဴဍာ်တံတုဲ ဒးသုၚ်စောဲဒၟံၚ်ဂှ်ရ ဒးဆေၚ်ဒၟံၚ်မုက်ကဵု ဘဲခရိတ်အိုတ်နာနာ ဇၞော်သၠုၚ်တံရ။
ၜဲနာနာ တိတ်နူတွဵုရးဍုၚ်မန်တံဂှ် အဓိက ဒးပလံၚ်ပ္တိုန်ဒၟံၚ် ဍုၚ်အိန္ဒိယတုဲ ဍုၚ်ကြုက်၊ ဍုၚ်သေံ၊ သေန်ကာပေါဝ်၊ နဳပဝ် ကေုာံ ဍုၚ်ပါကေဿတာန် သှ်ေတံဂှ်လေဝ် တန်တဴကဵုဂကူၜဲ ဗ္ကန်ကေတ်တံဂှ်တုဲ ဒးပလံၚ်ပ္တိုန်ဒၟံၚ်နွံဂှ် ဂွံတီကေတ်ရ။
ပ္ဍဲတွဵုရးဍုၚ်မန်ဂှ် စွံအဓိကကဵု ၜဲဇၞော်၊ ၜဲသ္ၚေက်၊ ၜဲ (ပဲပုပ်) ကေုာံ ၜဲသ္ၚေက်ဓမ္မတာတံဂှ်တုဲ တဵုလွဳဒၟံၚ်တုဲ နကဵုတိဨကတဵုလွဳဂှ်တှ်ေ အပံၚ်ဨက ၁၇၀၀၀၀ ပြၚ် နွံတုဲ လၟေၚ်သၞာံ ဂကူၜဲ ဗ္ဒါဲ ၂၀၀၀၀ တိတ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ