ဍာ်ဗု၊ ဂျူလာၚ် ၃
ရးတၞၚ်သဳ ပွိုၚ်ဍုၚ်ထဝါဲ ပ္ဍဲဒေသအပိုၚ်အခြာပရေၚ်ပိုန်ဒြပ်ထဝါဲ ဗ္ဒါဲကွာန်လေတ်ယှံၚ်ဂှ် အပ္ဍဲပေါဲဗ္တိုက် မက္တဵုဒှ်လဝ် ပ္ဍဲဂိတုဂျူလာၚ် ၂ အခိၚ်နူဂယး ၜိုတ် ၉ နာဍဳဂှ် ၜါလ္ပာ်ပရေၚ်ဇီုကပိုက်တံ နွံဒၟံၚ်ရောၚ် ဂွံတီကေတ် ဇရေၚ်ဂကောံဇြဟတ်ပၠန်ဂတးတံရ။
ဒပ်ကံၚ်ဇြဳပၞာန် ဇြဟတ်ၜိုတ် ၁၀၀ ပြၚ်ဂှ် ထ္ပက်ကၠုၚ်ကရောၚ်ပၞာန် အပ္ဍဲဒေသပရေၚ်ပိုန်ဒြပ်ထဝါဲဂှ်တုဲ က္တဵုဒှ်လဝ်ပေါဲဗ္တိုက်ၜါလ္ပာ် ဗ္ဒါဲကွာန်လေဝ်ယှံၚ် ကုဂကောံဒပ်စဵုဒၞါညးဍုၚ်ကွာန်တံရ။
အပ္ဍဲပေါဲဗ္တိုက်ဂှ် လ္ပာ်ဒပ်ပၠန်ဂတတံ ကောန်သ္ဂံၚ် PDF ပိတၠ ဇီုကပိုက်ကလိဂွံလဝ်ဝပ်တုဲ လ္ပာ်ဒပ်ကံၚ်ဇြဳပၞာန် ဟွံအောန်နူကဵုပန်တၠ ဇီုကပိုက်ကလိဂွံလဝ်ဝပ်ရောၚ် ညးတာလျိုၚ် ဂကောံဒပ်စဵုဒၞါညးဍုၚ်ကွာန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကရောၚ်ပၞာန်ကံၚ်ဇြဳပၞာန်ဝွံ စနူဂိတုဂျူလာၚ် ၁ တုဲကၠုၚ်တေံတုဲ ထ္ပက်ကၠုၚ်ကရောၚ်ပၞာန် ပ္ဍဲကွာန်လေဝ်ယှံၚ် ဒၟံၚ်ကွာန်ခမံၚ်ချံၚ်တုဲ အခိၚ်လၟုဟ် ပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ်ဒၟံၚ်ရောၚ် သ္ဂးရ။
အပ္ဍဲဒေသအပိုၚ်အခြာပရေၚ်ပိုန်ဒြပ်ထဝါဲဂှ် ဒပ်ကံၚ်ဇြဳပၞာန် ထပ်ထ္ပက်ကၠုၚ်ကရောၚ်ပၞာန်မွဲဝါပၠန်ဂှ်ရ ညးဒေသဂၠိုၚ်ကဵုလ္ၚီ နူကဵုကွာန်လေဝ်ယှံၚ်၊ ထုၚ်ကျဳ၊ ဝချံၚ်၊ ခမံၚ်ချံၚ်၊ ဨကနိ၊ ဝါသောန်တဝ်၊ ယၚေဝ်၊ ကုန်သာယာအေန်တံ ဒးဂြိပ်ဒဴပါဲဒလေတ်ဒၟံၚ်အိုတ်ရ။
ဒပ်ကံၚ်ဇြဳပၞာန်ဝွံ ပ္ဍဲဂိတုဂျောန် ၂၂ တုဲကၠုၚ်တေံဂှ်လေဝ် ဟိုတ်နူထ္ပက်ကရောၚ်ပၞာန် လုပ်စိုပ်ကၠုၚ် အပ္ဍဲဒေသပရေၚ်ပိုန်ဒြပ်ထဝါဲဂှ်ရ ညးဒေသဂၠိုၚ်ကဵုလ္ၚီ ထောံလသာသ္ၚိဌာန် ဒးဂြိပ်ဒဴပါဲဒလေတ်လဝ်ရ။
မွဲလ္ပာ်ဂှ်ပၠန် ဒပ်ကံၚ်ဇြဳပၞာန်ဝွံ သွက်ဂွံကလေၚ်ထိၚ်ဒက် ပွိုၚ်ဍုၚ်ဍာ်ဗုမာန်ဂှ် ထ္ပက်ဒၟံၚ်ကရောၚ်ပၞာန် နကဵုဇြဟတ်လၟိဟ်ဗွဲမဂၠိုၚ်ဂၠေၚ်တံ နွံဒၟံၚ်ဂှ်ရ ပေါဲဗ္တိုက်ၜါလ္ပာ်တံ ကလေၚ်သ္ကာတ်မြဟ်ဒၟံၚ်ရ။
ပ္ဍဲရးတၞၚ်သဳ ပေါဲဗ္တိုက်ၜါလ္ပာ်တံ ကလေၚ်သ္ကာတ်မြဟ်ဒၟံၚ်ဂှ် ညးဒဒိုက်ပါဲဒဴဘဲပၞာန် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တံ နွံကၠုၚ် စဵုကဵုဗ္ဒါဲတြဴဠက်ဂှ် ပ္ဍဲဂိတုဂျောန် ၁၂ တေံ ဂကောံသုတေသနဖျေံသ္ဇိုၚ်ဒေသ FE5 Taninthayi လလောၚ်ပ္တိတ်လဝ် လိက်ဒုၚ်စဳရေၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ