မတ်မလီု၊ ဂျူလာၚ် ၃
နကဵုဟိုတ် ပ္တိတ်ဂလေံကဵုလဝ် သြန်သွက်သ္ၚိကၠအ်ဂမၠိုၚ် လောန်ၜက်အာနူကဵုသၞောတ် မခုတ်လဝ်ဂှ်တုဲ ကံၚ်ဇြဳပၞာန် ကေတ်ဒၟံၚ်အရေဝ် လ္တူတိုက်သြန်ပုဂ္ဂလိကတံဂှ်တုဲ တိုက်သြန်ဂမၠိုၚ် သရိုဟ်စှ်ေကၠုၚ်မာန်ရောၚ် တၠပညာပရေၚ်ပိုန်ဒြပ်ဂမၠိုၚ် ထံက်ထ္ၜးလဝ်ရ။
ကံၚ်ဇြဳပၞာန်ဂှ် တိုက်သြန်ပုဂ္ဂလိကၜါဂှ်ဝွံ သွက်သ္ဂောံဂွံပရဲပရာဂၠိုၚ်ၚ်ဂးတုဲ ဝးပ္ကဝ် တၚ်စၞောန်တိုက်သြန်ဗဟဵုတံဂှ်တုဲ ပ္တိတ်ဂလေံကဵုလဝ် သြန်သွက်သ္ၚိကၠအ် ဗွဲမဂၠိုၚ်ဂၠေၚ်ဂှ် စၟဳတ်ဂွံဆဵုကေတ်ဂှ်ရ ကေတ်အာအရေဝ်ဏောၚ် ပ္ဍဲဂိတုဂျူလာၚ် ၁ တေံ လလောၚ်ပ္တိတ်ကၠုၚ်ရ။
ပ္ဍဲကဵုတိုက်သြန်တံဏံဂှ် တိုက်သြန်ဒယှ်ဒယှ်မၞိဟ်တီဂၠိုၚ် မပ္တံကဵု တိုက်သြန်ယိုဝ်မ၊ တိုက်သြန်ဨရာဝတဳ၊ တိုက်သြန်ကောန်ဍုၚ်ဗၟာဂမၠိုၚ်၊ တိုက်သြန်ပရေၚ်ဖောအ်ဗြေတ် ကမၠောန်အဇာဍောတ် ကေုာံ အဇာလဒေါဝ်ဂမၠိုၚ်၊ တိုက်သြန်ယူအေဘဳ၊ တိုက်သြန်မျာန်မာမက်ထရိုဝ် ကေုာံ တိုက်သြန်ပရေၚ်သိုၚ်ခၞံ၊ ပရေၚ်သ္ၚိကၠအ် ကေုာံ ပရေၚ်ဖောအ်ဗြေဝ်စမြိုၚ်သ္ဇိုၚ်တံ ပါလုပ်ရ။
တိုက်သြန်ပုဂ္ဂလိက ကေတ်အာအရေဝ်တံဂှ်ဝွံ ပ္တိတ်ဂလေံကဵုလဝ် သြန်သွက်သ္ၚိကၠအ်တံ နူ ၀ ဒဿမ ၃၉ တၟံကၠံ ဂၠိုၚ်အိုတ် စဵုကဵု ၁၆ ဒဿမ ၃၄ တၟံကၠံရောၚ် စောဲစပ်လဝ်ရ။
တိုက်သြန်ထပှ်ဏံဂှ် အတိုၚ်ၝောံပိုဒ် ၁၅၄ သၞောဝ်ဂကောံပရေၚ်သြန်လှုဲ တိုက်သြန်ဗဟဵုဍုၚ်ဗၟာဂှ် ဗွဲမဗဗွဲကဵုသၞောဝ် ဒးကဵုအာဒဏ်သြန် ဗွဲမစိုပ်တရဴဏောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ဂကောံလလောၚ်ပ္တိတ်ပရိုၚ် ကံၚ်ဇြဳပၞာန်ရ။
တၠပညာပရေၚ်ပိုန်ဒြပ်မွဲတၠဂှ် ဟိုတ်နူတၚ်လလောၚ်တြး ကံၚ်ဇြဳပၞာန်တုဲ နကဵုညးဍုၚ်ကွာန်ဂမၠိုၚ် ဓဝ်ပတှ်ေဟွံမွဲလ္တူတိုက်သြန်ဏံရတုဲ ကၟောန်ပ္တိတ်ကၠုၚ်သြန်ညးသ္ကအ်မ္ဂး တိုက်သြန်ဂမၠိုၚ် သရိုဟ်စှ်ေကၠုၚ်မာန်တုဲ ထပ်ဇီုကပိုက်ကၠုၚ် လ္တူအလုံပရေၚ်ပိုန်ဒြပ်မွဲမာန်ရောၚ် သ္ၚဳဂၠိပ်လဝ်ရ။
“ ဒှ်မာန်အိုတ်ဂှ်တှ်ေ နူတိုက်သြန်တံဏံဂှ် ပ္တိတ်ညးသ္ကအ်ဏောၚ်။ ပ္တိတ်ဟီုဂှ် ယဝ်ရတိုက်သြန်ဗဟဵု ထံက်ပၚ်ကဵုဟွံမာန်ပုဟ်ဟီုမ္ဂး တိုက်သြန်ဂမၠိုၚ် သရိုဟ်စှ်ေအာမာန်ရောၚ်။ တိုက်သြန်တံဏံ ဂကောံပရေၚ်သြန်လှုဲတံဏံ သရိုဟ်စှ်ဂှ်ေတှ်ေ ဟွံတုပ်ကဵု ကုမ္ပဏဳတၞဟ်ဟ် သရိုဟ်စှ်ေအာဂှ်ပုဟ်။ ညအ်ဂှ် ကၠုၚ်ဇီုကပိုက်ကဵု ပရေၚ်ပိုန်ဒြပ်ဍုၚ်ဗၟာ အလုံမွဲမာန်ဏောၚ်” သာ်ဝွံ သ္ဂးရ။
ကံၚ်ဇြဳပၞာန်ဂှ်တှ်ေ စၟဳတ်ထ္မံက်ပ္တိတ် ကေတ်အာအရေဝ် သီုညးတာလျိုၚ် တိုက်သြန်ဗဟဵု သာသ္ပအ်လဝ် သွက်ဂွံစၟဳတ်ကောပ်ကာဲ တိုက်သြန်ပုဂ္ဂလိကတံဂှ်ဏောၚ်ဂှ် လလောၚ်ပ္တိတ်ကဵုလဝ်သမ္တီရ။
ပရေၚ်ကေတ်အရေဝ် မက္တဵုဒှ်ကၠုၚ် ဒၟါနူတိုက်သြန်ဗဟဵု သာသ္ပအ်အာလဝ် ပ္ဍဲအရာကောပ်ကာဲ တိုက်သြန်ပုဂ္ဂလိကတံဂှ်တုဲ ညံၚ်ညးဍုၚ်ကွာန်ဂမၠိုၚ်ဂွံတီကေတ်မာန် လလောၚ်ပ္တိတ်လဝ်ဂှ်ဝွံ နကဵုကံၚ်ဇြဳပၞာန် ကအ်ဇကု ဇကုဒက်ကေတ်ရဂှ် တၠပညာပရေၚ်ပိုန်ဒြပ်မွဲတၠ ပါ်ပါဲလဝ်ရ။
“ပ္ဍဲဍုၚ်ဗၟာလေဝ် ဗီုတံဏံဂှ် နူကၠာတေံရ ကေတ်ဒၟံၚ်အရေဝ်။ ကောပ်ကာဲ ကေတ်အရေဝ် သာ်ဏံတံဂှ် နွံ။ ဆ္ဂး ဟွံလလောၚ်ပ္တိတ် ကုညးဍုၚ်ကွာန်တံပုဟ်။ နတၚ်ရန်တၟံသာ်လဵု လလောၚ်ပ္တိတ်ထောံ ညးဍုၚ်ကွာန်တံရောဟီုဂှ် ဟွံတီပုဟ်။ အခိၚ်အကာဲအရာဟွံဒုၚ်လုက်ဒွံသာ်ဏံဂှ် ထပ်ဂစိုတ်ထောံ တိုက်သြန်တံ သာ်ဏံဟီုဂှ် ဒှ်သဘဴကအ်ဇကု ဇကုဒက်ကေတ်ရဏောၚ်” သာ်ဝွံ သ္ဂးရ။
ဟိုတ်နူကံၚ်ဇြဳပၞာန် ကေတ်အရေဝ် လ္တူတိုက်သြန်ပုဂ္ဂလိကတံဂှ်တုဲ နကဵုညးဍုၚ်ကွာန်ဂမၠိုၚ် ယဝ်ရဓဝ်ပတှ်ေစှ်ေကၠုၚ်မ္ဂး ပြသၞာအဆက်လက္ကရဴတံ က္တဵုဒှ်ကၠုၚ် တၟာဂလိုၚ်မာန်တုဲ ကလေၚ်စိုပ်အာ အကာဲအရာတိုက်သြန် အခိၚ်စသီအဝဵုတေံ မာန်ရ။
ပ္ဍဲဍုၚ်သ္အာၚ်ဂှ်တှ်ေ မ္ၚးနူကဵုကမၠောန်ပရေၚ်ပိုန်ဒြပ်လၟုဟ်ဂှ် စနူကဵုကဏ္ဍဗၞိက်ပၠောပ်ပ္တိတ် ကဏ္ဍရေၚ်တၠုၚ်ပရေၚ်သြန်လှုဲတံဂှ် ဒှ်တမ် အခိၚ်အာဒၟံၚ် နကဵုသၞောတ်တိုက်သြန်ဂှ် ကေတ်အရေဝ် ကုတိုက်သြန်တံသာ်ဏံတုဲ လလောၚ်ပ္တိတ်ကုညးဍုၚ်ကွာန်ဂမၠိုၚ်ဂှ်ဝွံ က္တဵုဗဒှ်ကဵုဓဝ်ပတှ်ေဟွံမွဲ လ္တူတိုက်သြန်တံဂှ်ရောၚ် တၠကမၠောန်ပရေၚ်ပိုန်ဒြပ်ဂမၠိုၚ် သ္ၚဳဂၠိပ်လဝ်ရ။
တိုက်သြန်ဂၠးတိဂှ်တှ်ေ ဟိုတ်နူပရေၚ်ပၞာန်သီအဝဵုတုဲ ဒမြိပ်ပရေၚ်ပိုန်ဒြပ်တောတက် ဒေါအ်ဒေၚ်ကၠုၚ်တုဲ ယဝ်ရပရေၚ်ကျာတ်ဝါတ်တံ သာပရေံကၠုၚ်မ္ဂး ဒမြိပ်သြန်ဖောဝ်ကဵု ဒမြိပ်ကလောန်ကၟိတ်ဟွံမွဲတံ ဆက်သ္ဂောံသၠုၚ်တိုန်နွံဒၟံၚ်ရောၚ် ပ္ဍဲဂိတုဂျောန် ၁၂ တုဲကၠုၚ်တေံ ကဵုလဝ်သတိရ။
သ္အာၚ်နူဂှ်ပၠန် ပ္ဍဲသၞာံ ၂၀၂၄ စဏံ လၟိဟ်မၞိဟ်ကၟိန်ဍုၚ် ၃၂ တၟံကၠံဂှ်ဝွံ စိုပ်ကၠုၚ်အကာဲအရာ ကျာတ်ဝါတ်တံဂှ်ရ ကလေၚ်စိုပ်အာဒၟံၚ် အကာဲအရာဂွံညာတ်ကေတ်လဝ် ပ္ဍဲသၞာံ ၂၀၁၅ တေံယျဂှ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media