နေဗျဳဒဝ်၊ ဂျူလာၚ် ၃
သွက်အခေါၚ်ဆက်သ္ဂောံဒက်ပ္တန်ဗော်တုဲ ဗော်ကောန်ဂကူရခေၚ် မဒှ်ဗော်ပရေၚ်ဍုၚ်ကွာန် ကောန်ဍုၚ်အရၚ်ဇြဟတ်ဇၞော်ဂှ် ကဝ်မယှေန်ပေါဲရုဲမာဲကၟိန်ဍုၚ် ကံၚ်ဇြဳပၞာန်ခါန်ကၞက်တံ တးပါဲလဝ်ရ။
အတိုၚ်သၞောဝ်ဒက်ပ္တန်ဗော်ပရေၚ်ဍုၚ်ကွာန် ကံၚ်ဇြဳပၞာန် စၞောန်ပျးလဝ်ဂှ် ဗော်ကောန်ဂကူရခေၚ် အာတ်ပ္တိုန်လဝ် အခေါၚ်ဒက်ပ္တန်ဗော် ဇရေၚ်ကဝ်မယှေန်ပေါဲရုဲမာဲ ပ္ဍဲဂိတုမာတ် ၂၀ သၞာံ ၂၀၂၃ တေံရ။
ဆ္ဂး ကဝ်မယှေန်ပေါဲရုဲမာဲဂှ် စဵုကဵုလအ်ကၠုၚ်ပွိုၚ်မွဲသၞာံ ဟွံဖျေံကဵုအခေါၚ်ဒက်ပ္တန်ဗော်ပရေၚ်ဍုၚ်ကွာန် ကုဗော်ကောန်ဂကူရခေၚ်ဂှ်မွဲသာ် ပ္ဍဲသၞာံဏံ ဂိတုဂျူလာၚ် ၁ ဂှ် တးပါဲလဝ် အခေါၚ်ဒက်ပ္တန်ဗော် မအာတ်ပ္တိုန်လဝ်ဂှ်ရ။
ကံၚ်ဇြဳပၞာန် ထ္ၜးဟိုတ်ဂှ်တှ်ေ ဗော်ကောန်ဂကူရခေၚ်ဝွံ ဒဒှ်ရဟွံကိတ်ညဳကဵု တၚ်စၞောန်ပျး မပါလုပ် ပ္ဍဲၝောံပိုဒ် ၇ သၞောဝ်ဒက်ပ္တန်ဗော်ပရေၚ်ဍုၚ်ကွာန်ဂမၠိုၚ်ဂှ် ဂွံဆဵုကေတ်ဂှ်ရ တးပါဲထောံလဝ် နကဵုဗီုပြၚ် မပါလုပ် ပ္ဍဲနဲသၞောဝ်ဥပဒေ ဒက်ပ္တန်ဗော်တံဂှ်ရောၚ် လလောၚ်ပ္တိတ်လဝ်ပရိုၚ်ရ။
ပ္ဍဲကဵုသၞောဝ်ဥပဒေဒက်ပ္တန်ဗော်ပရေၚ်ဍုၚ်ကွာန် ၝောံပိုဒ် ၇ ဂှ် ဂကောံဒးဒုၚ်လလောၚ်တြး နဒဒှ်ဂကောံဟွံလုပ်သၞောဝ် အတိုၚ်သၞောဝ်ဥပဒေလၟုဟ်မွဲမွဲဂှ်ကီု၊ ကုဂကောံရပ်လွဟ်ဒစဵုဒစး ကုကၟိန်ဍုၚ် ဟွံသေၚ်မ္ဂး ကုဂကောံစၟတ်လဝ် ဒဒှ်ရကလိလောန် ပြဝပကီုပရာပ်တံဂှ် တိုက်ရိုက်ကဵုဒှ် နဲသ္ပဝ်ကဵုဒှ် ဆက်စၠောံကီု ကဵုဇြဟတ်ရီုဗၚ်တံကီုဂှ် အခေါၚ်အာတ်ပ္တိုန် နဒဒှ်ဗော်ပရေၚ်ဍုၚ်ကွာန် ဟွံမွဲပုဟ်ဂှ် သ္ဂးရ။
စပ်ကဵုဒးဒုၚ်တးပါဲထောံ အခေါၚ်ဒက်ပ္တန်ဗော်ဂှ်တုဲ နူကဵုသြၚ်လောန်တိုၚ်(မ်) ဟွံအောန်နူကဵုပိဝါ ကော်လဝ်ဖုၚ် ကုဥက္ကဌ ဗော်ကောန်ဂကူရခေၚ် ဥူတာထောန်လှကီုလေဝ် ဒုၚ်တဲသှ်ကဵုလဝ် ဟွံမွဲရ။
ဥူဖေတာန် သၟာပရေၚ်ဍုၚ်ကွာန်ဝှ်ကြံၚ် လုပ်စိုပ်ပြိုၚ်ပ္ကာန်လဝ် ပ္ဍဲပေါဲရုဲမာဲၜါဝါအဆက်က် နူကဵုဗော်ကောန်ဂကူရခေၚ်ဂှ် ပ္တိုန်လဝ်စရၚ် နကဵုမၞိဟ်က္ဍိုက်ဒၟံၚ်ဍိုပ် ပ္ဍဲဗော်လၟုဟ်တံဂှ်ရ ဗော်ကဵုမၞိဟ် ပါ်တုဲထေက်ကဵုဒးညာတ်ကေတ်ဂှ် ထံက်ထ္ၜးလဝ်ရ။
“မၞိဟ်ကဵုဗော်ဂှ် ပါ်တုဲ ဒးညာတ်ဏောၚ်။ ဗော်ဂှ်ဗော်။ မၞိဟ်ဂှ်တှ်ေ ရဲကၠောန်ဒၟံၚ်လၟုဟ်တံ။ စနူကဵုဗဟဵုတုဲ မၞိဟ်ပ္တိုန်ဒၟံၚ်စရၚ်။ စနူဏံတုဲ ခရိုၚ်ကီု၊ ပွိုၚ်ဍုၚ်ကီု၊ အရာပ်ကီု ဒက်ပ္တန်အာသာ်ဏံဏောၚ်ဂှ်ရ ယဝ်ရနွံဒၟံၚ် အပ္ဍဲဗွိုၚ် ဍေံတံ (UEC) စၟတ်လဝ်ဂှ်မ္ဂး ညအ်ဒှ်ကလောန်ဂှ် အဲညာတ်ကေတ်ရ။ သာ်ဏံဟွံသေၚ် ဗက်ဂၠါဲဒၟံၚ်ဒုဟ် မၞိဟ်တံဂှ်မ္ဂး ပလီုဗော်ဏောၚ်။ ကၠောန်အာ သွက်ဂွံပလီုဗော်ဏောၚ်။ ဟွံကဵုအခေါၚ် ဒက်ပ္တန်ဗော်ပုဟ်ဟီုဂှ် ဗၠေတ်မံၚ်ဏောၚ် မိက်ဂွံဟီုရ” သာ်ဝွံ သ္ဂးရ။
ဗော်ကောန်ဂကူရခေၚ်ဝွံ ပ္ဍဲပေါဲရုဲမာဲသၞာံ ၂၀၂၀ တေံဂှ် နဗ္ၜတ်အလုံဍုၚ်မွဲ ကဆံၚ်ကၟိန်ဍုၚ်ဂှ် ဒှ်ဗော်ပရေၚ်ဍုၚ်ကွာန်ဇြဟတ်ဇၞော် ကလိဂွံလဝ်ဇၞး ဒၞါဲညးစၞးကၠတ်ထဝ် မရနုက်ကဵုစတုတ္ထ ဂၠိုၚ်အိုတ်မွဲရ။
ဟိုတ်နူတၚ်သၞောတ်ဗ္ၜတ် ပါလုပ်ပ္ဍဲသၞောဝ်ဒက်ပ္တန်ဗော်ပရေၚ်ဍုၚ်ကွာန် နူကဵုကဝ်မယှေန်ပေါဲရုဲမာဲ ကံၚ်ဇြဳပၞာန်ခါန်ကၞက် မကလေၚ်စၞောန်ပျးလဝ် ပ္ဍဲသၞာံတုဲကၠုၚ်တေံ ဂိတုဂျာန္နဝါရဳ ၂၆ တေံဂှ်တုဲ ပ္တိုန်လဝ်စရၚ် နဒဒှ်ဗော်စန်ဒက်အာ ကဆံၚ်တွဵုရးရ။
လအာတုပ်သာ်ဂှ်ကီု ညံၚ်ရဴဗော်ကောန်ဂကူရခေၚ်ကီု ဗော်ညဳသၟဟ်မန် အာတ်ပ္တိုန်လဝ်အခေါၚ်ဒက်ပ္တန်ဗော် မစန်ဒက်အာ ပ္ဍဲတွဵုရးဍုၚ်မန်ဂှ်လေဝ် စဵုကဵုလအ်ကၠုၚ်ပွိုၚ်မွဲသၞာံ နူကဵုကဝ်မယှေန်ပေါဲရုဲမာဲ ဟွံဂွံဖျေံကဵုလဝ် အခေါၚ်ဒက်ပ္တန်ဗော်ဏီရ။
အခိၚ်လၟုဟ် ကဝ်မယှေန်ပေါဲရုဲမာဲ ကံၚ်ဇြဳပၞာန်ခါန်ကၞက်ဂှ် ဖျေံကဵုလဝ်အခေါၚ်ဒက်ပ္တန်ဗော် ကုဗော်ပရေၚ်ဍုၚ်ကွာန်လၟုဟ် ၄၇ ဗော်တံဂှ်တုဲ သီုဗော် NLD မပါလုပ် ဗော် ၄၀ ဂှ်တှ်ေ ပလီုထောံလဝ် အတိုၚ်သၞောဝ်ပ္တိုန်စရၚ်ဗော်ပရေၚ်ဍုၚ်ကွာန် ကံၚ်ဇြဳပၞာန် မစၞောန်ပျးလဝ်ဂှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ