ဍာ်ဗု၊ ဂျူလာၚ် ၄
အပ္ဍဲပေါဲဗ္တိုက် မက္တဵုဒှ်လဝ် ဗ္ဒါဲကွာန်လေဝ်ယှံၚ် ဒေသအပိုၚ်အခြာပရေၚ်ပိုန်ဒြပ်ထဝါဲ ပွိုၚ်ဍုၚ်ဍာ်ဗု ရးဒေသဇၞော်တၞၚ်သဳဂှ် ကောန်သ္ဂံၚ် PDF ပန်တၠ ပြဟ်လလုဲအာလဝ်ရောၚ် ဂွံတီကေတ် ဇရေၚ်ဒပ်ပၠန်ဂတးတံရ။
အကြာဒပ်ကံၚ်ဇြဳပၞာန် လုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲဒေသပရေၚ်ပိုန်ဒြပ်ထဝါဲ မွဲဝါပၠန်ဂှ်ကဵု ဒပ်ပံၚ်ကောံစဵုဒၞါညးဍုၚ်ကွာန်တံဂှ် ပ္ဍဲဂိတုဂျူလာၚ် ၂ အခိၚ်နူဂယးဂှ် ပေါဲဗ္တိုက်ၜါလ္ပာ် က္တဵုဒှ်လဝ်ရ။
ပ္ဍဲပေါဲဗ္တိုက်ဏံ ကောန်သ္ဂံၚ်ဒပ်စဵုဒၞါညးဍုၚ်ကွာန် PDF ပန်တၠ ပြဟ်လလုဲအာလဝ်တုဲ ကွဳစက်မွဲဖ္ဍိုက်လေဝ် ပြဟ်လလုဲအာလဝ်ရောၚ် ကိုဝ်နဂါ ညးဒုၚ်တာလျိုၚ် ဒပ်ဒမၠုက် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်သ္ဂံၚ် PDF ဂမၠိုၚ်ဝွံ အခိၚ်အာစိုပ် သ္ဂောံကြတ်ဗ္တိုက် ကရောၚ်ပၞာန်ကံၚ်ဇြဳပၞာန်ဂှ် ဂဗကဵုကရောၚ်ပၞာန်တုဲ ဒးဒုၚ်ပန်ဂစိုတ်လဝ်ဂှ်ရ ဒးပြဟ်လလုဲအာလဝ်ရောၚ် သ္ဂးရ။
ကောန်သ္ဂံၚ် ပြဟ်လလုဲအာလဝ်ဂမၠိုၚ်ဝွံ ဒှ်ကောန်ဒပ် နူဒပ်ပၞာန်ဗၠးၜးကောန်ဂကူထဝါဲ DNLA တံတုဲ လ္ပာ်ကံၚ်ဇြဳပၞာန် ဇီုကပိုက်ဒး ဟွံမွဲပုဟ်ဂှ် ချူလဝ် ပ္ဍဲချာန်နေဝ်ထလဳဂရာမ် ရဲထံက်ဂလာန်ဒပ်ပၞာန်တံရ။
အတိုၚ်ဂလာန် ဒပ်စဵုဒၞါညးဍုၚ်ကွာန်တံဂှ်မ္ဂး အပ္ဍဲပွိုၚ်ဍုၚ်ဍာ်ဗုဂှ် ဒပ်ကံၚ်ဇြဳပၞာန် ပါ်ကရောၚ်ပၞာန်ၜါကရောၚ်တုဲ လုပ်စိုပ်ထ္ပက်ကၠုၚ်ကရောၚ်ပၞာန်ဂှ်ရ ပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ်ဒၟံၚ်ရောၚ် ဂွံတီကေတ်ရ။
ဒပ်ကံၚ်ဇြဳပၞာန် ဟိုတ်နူထ္ပက်ကၠုၚ်ကရောၚ်ပၞာန်ဂှ်ရ မ္ၚးနူကဵုကွာန်နဗုလာတိုက်လာ မသုန်ကွာန်ဂှ် နူကဵုကွာန်ခမံက်ချံၚ်၊ ဨကနိ၊ ရၚေဝ်၊ လေဝ်ယှံၚ်၊ ဝက်ချံၚ်တံဂှ် ညးဒေသဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံအိုတ်ရ။
တုဲကၠုၚ် ပ္ဍဲဂိတုဂျောန် ၁၉ တေံဂှ်လေဝ် ပ္ဍဲဒေသနဗုလာ မဒှ်ဒေသအပိုၚ်အခြာပရေၚ်ပိုန်ဒြပ်ထဝါဲဂှ် ဒပ်ကံၚ်ဇြဳပၞာန် လုပ်စိုပ်ထ္ပက်ကၠုၚ်ကရောၚ်ပၞာန်ဂှ်ဝွံ မ္ၚးနူကဵုစံၚ်ပလီုလဝ် သ္ၚိဒၟံၚ်ကွာန်မူဒူ မသုန်မဂှ် ညးဒေသမွဲတၠဂှ်လေဝ် ပန်ဂစိုတ်လဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram